Иез37
1Мыйын ӱмбалнем Господьын кидше лийын. Тудо мыйым шке Шӱлышыж дене наҥгаен да лапвер покшеке волтен шогалтен, тудыжо лу дене темше лийын.2Тудо мыйым йырым-йыр лу-влак коклаште коштыктен, нуныжо лапвер ӱмбалне пеш шуко да чот кошкышо лийыныт.3Тудо мый дечем йодын: «Айдеме эрге, нине лу-влак ылыжыт мо?» Мый вашештенам: «Господь Юмем, тидым Тый гына палет».4Тунам Тудо мыланем каласен: «Нине лу-влаклан пророклен ойло, нунылан каласе: ”Кошкышо лу-шамыч, Господьын шомакшым колыштса!5Нине лу-влаклан Господь Юмо тыге ойла: Мый кӧргышкыда шӱлышым пуртем, да те ылыжыда.6Мый тендан ӱмбалне шӧн ден чогашылым куштем да коваште дене леведам. Мый тыланда шӱлышым пуэм, да те ылыжыда. Тунам пален налыда: Мый Господь улам”».7Кӱштымӧ семынак, мый пророклен ойлаш тӱҥалынам. Кунам пророк шомакым ойленам, лу-влак, шолткен, икте-весышт деке лишемаш тӱҥалыныт – нуно ваш-ваш ушналтыныт.8Мый ужынам: нунын ӱмбалне шӧн ден чогашыл кушкыныт да ӱмбачын коваште петырен, но кӧргыштышт шӱлыш лийын огыл.9Тунам Тудо мылам каласен: «Шӱлышлан пророклен ойло. Пророкло, айдеме эрге, шӱлышлан каласе: ”Господь Юмо тыге ойла: шӱлыш, тӱнян ныл могыржо гыч тол да нине пуштмо-влак ӱмбаке шӱлалте – тек нуно ылыжыт!”»10Тудын кӱштымыж семынак, мый пророк шомакым ойленам, да нунын кӧргышкышт шӱлыш пурен. Кап-влак ылыжыныт да йол ӱмбаке шогалыныт – нуно пеш чот шукын лийыныт.11Господь мылам каласен: «Айдеме эрге, нине лу-влак Израиль калык улыт. Теве нуно ойлат: мемнан луна кошкен, ӱшанна йомын, ме пытенна.12Садлан пророк шомакым ойло, нунылан каласе: ”Тыге ойла Господь Юмо: калыкем, Мый шӱгардам почам да тендам тушечын луктам, тендам Израиль мландыш кондем.13Кунам Мый шӱгарда-влакым почам да тушечын тендам луктам, те пален налыда: Мый Господь улам.14Мый кӧргышкыда шӱлышем пуртем, да те ылыжыда. Мый тендам шке мландышкыда вераҥдем, да те пален налыда: тидым Мый, Господь, каласенам да тидым ыштенам, – ойла Господь”».15Мыланем Господьын шомакше лийын:16«Айдеме эрге! Нал пондым да тушан возо: ”Иуда да тудын дене ик ушемыште улшо Израиль эрге-влак”. Вара вес пондым, Ефремын пондыжым, нал да тушан возо: ”Иосиф да тудын дене ик ушемыште улшо Израиль калык”.17Нине кок пондым пырля кучо, тек нуно кидыштет ик тичмаш лийыт.18Кунам калыкетын эргыже-влак тый дечет йодыт: ”Мом тиде ончыкта, умылтаре?”,19нунылан каласе: ”Господь Юмо тыге ойла: Мый Иосифын да тудын дене ик ушемыште улшо Израиль тукым-шамычын пондыштым – тудо кызыт Ефремын кидыштыже – налам да Иудан пондыж дене ваш ушем. Мый кокыт гыч иктым ыштем – нуно Мыйын кидыштем ик тичмаш лийыт”.20Кунам нине кок пондо, кушан тый возенат, нунын шинча ончылнышт кидыштет лийыт,21каласе: ”Господь Юмо тыге ойла: израиль эрге-влак могай калык-шамыч коклаште улыт, Мый нуным тушеч луктам, чыла вер гыч погем да шке мландышкышт кондем.22Тиде мландыште, Израильын курыклаштыже, Мый нуным ик калыкым ыштем. Нунын ик кугыжашт лиеш, тетла нуно кок калык огыт лий да кок кугыжанышлан огыт шелалт.23Тӱрлӧ шояк юмышт, йырныкышт да осал пашашт дене шкеныштым тетла огыт амырте. Сулыкым ыштен илыме верлашт гыч Мый нуным утарем да эрныктем. Нуно Мыйын калыкем, а Мый нунын Юмышт лиям.24Мыйын Давид тарзем нунын кугыжашт лиеш, чылаштын ик кӱтӱчышт лиеш. Нуно Мыйын кӱштымашем-влак почеш илаш, Мыйын пунчал-шамычем шуктен шогаш тӱҥалыт.25Иаков тарземлан Мый мландым пуэнам, да нуно тушто, ача-кочаштын илыме мландыштышт, илаш тӱҥалыт. Тушто нуно шкешт, йочашт да йочашт-влакын йочашт курымеш илаш тӱҥалыт. Мыйын Давид тарзем курымешлан нунын онышт лиеш.26Мый нунын дене тыныс ойпидышым ыштем, тиде ойпидыш курымашле лиеш. Мый нуным пеҥгыдемдем, шукемдем да нунын коклаште курымешлан шке святой верем шогалтем.27Нунын дене Мыйын илыме верем лиеш. Мый нунын Юмышт, а нуно Мыйын калыкем лийыт.28Мыйын святой верем нунын коклаште курымеш лиеш. Тунам калык-влак пален налыт: Мый Израильым святитлыше Господь улам!”»
Institute for Bible Translation, Finland