Иез36
1«Айдеме эрге, Израиль курык-влаклан пророк шомакым ойло, тыге каласе: ”Израиль курык-шамыч, Господьын шомакшым колыштса!2Тыге ойла Господь Юмо: тушман тендан нерген тыге манын: ’А-а, курымашле кӱкшака-влак ынде мемнан улыт!’”3Сандене пророклен ойло, тыге каласе: ”Господь Юмо тыге ойла: нуно тендам пустаҥденыт да чыла могырым темденыт. Мландыдам вес калык-влак руалтен налыныт, еҥ-шамыч тендан нерген осалым ойленыт да мыскыленыт.4Тидлан, Израиль курык-влак, Господьын шомакшым колыштса: тыге ойла Господь Юмо курык ден кӱкшака-шамычлан, курыклоҥ ден лапвер-влаклан, шалатыме вер ден коден кайыме ола-влаклан – тушто мо улым йыр улшо калык-шамыч агеныт да нуным воштылчыкыш савыреныт.5Тидлан Господь Юмо тыге ойла: кугу шыдем дене Мый моло калык ден пӱтынь Идумей ваштареш ойленам. Куанен да игылт воштылын, нуно Мыйын мландем руалтен налыныт, кӱтымӧ верлам агеныт”.6Сандене Израиль мланде шотышто пророклен ойло да курык ден кӱкшака-влаклан, курыклоҥ ден лапвер-шамычлан каласе: ”Тыге ойла Господь Юмо: сырымем дене, кугу шыдем дене Мый тидым ойлем, вет моло калык деч те мыскылымашым чытеда.7Господь Юмо тыге ойла: Кидем нӧлталын, товатлем: йырда улшо калык-влак шкешт мыскылыме лийыт.8А те, Израиль курык-шамыч, одар пушеҥгыла дене леведалтыда да Израиль калыкемлан саскам кондаш тӱҥалыда – вашке тудо тышке пӧртылеш.9Вет Мый тендан деке мелын савырнем, да те угыч куралме да ӱдымӧ лийыда.10Мый ӱмбакыда шуко еҥым – уло Израиль калыкым – вераҥдем. Олалаште илаш тӱҥалыт, чыла шалатымым угыч нӧлталыт.11Тендан ӱмбалне, курык-влак, Мый еҥ ден вольыкым шукемдем, нуно тӱлаҥын шарлат. Ончычсо семынак тендан ӱмбалне еҥ-шамыч илаш тӱҥалыт. Мый тыланда сайым ончычсо деч шукырак ышташ тӱҥалам, да те пален налыда: Мый Господь улам.12Тыгеракын, Мый тендан ӱмбаке еҥ-влакым, шке Израиль калыкем, кондем. Нуно тендан озада лийыт, те нунын мландышт лийыда да тетла нуным йоча деч посна огыда кодо.13Господь Юмо тыге ойла: тыйын нерген тыге маныт: ’Тый еҥ-влакым пытарыше да шке калыкшым йоча деч посна кодышо мланде улат!’14Но тетла еҥ-шамычым пытараш да шке калыкетым йоча деч посна кодаш от тӱҥал, – ойла Господь Юмо.15Тетла калык-влакын игылтмыштым от кол, йот тукым-влак тендам намысыш огыт пурто да ончыкшым калыкетым йоча деч посна огыт кодо, – ойла Господь Юмо”».16Мылам Господьын шомакше лийын:17«Айдеме эрге! Кунам Израиль калык шке мландыштыже илен, тудо мландым койыш-шоктышыжо да пашаж дене шакшылен. Тудын илышыже Мыйын чурием ончылно ӱдырамашын тылзашыж годымсо ару огыллыкшо гай лийын.18Тиде мландыште вӱрым йоктарымыштлан, тудым шояк юмышт дене шакшылымылан Мый нунын ӱмбак шке шыдем опталынам.19Мый нуным калык-влак коклашке шалатен колтенам, нуно элла мучко пуалтен колтымо лийыныт. Мый нуным илыш корнышт, пашашт почеш судитленам.20Нуно могай гына калык деке миен огытыл, чыла вере Мыйын святой лӱмем намысыш пуртеныт. Вет нунын нерген тыге ойленыт: ”Тиде – Господьын калыкше, нунылан Тудын мландыж гыч каяш логалын”.21Вес калык-влак коклаште Израиль калык Мыйын святой лӱмем намысыш пуртен, тидлан Мый ойгаҥынам.22Сандене Израиль калыклан каласе: ”Господь Юмо тыге ойла: Израиль калык, мом ышташ шонымем Мый тыланда кӧра огыл, а шкемын святой лӱмемлан кӧра ыштем. Могай гына калык деке толында, чыла вере те Мыйын лӱмем намысыш пуртенда.23Кеч кугу лӱмем калык-влак коклаште тыланда кӧра намысыш пуртымо лийын, Мый тудын святой улмыжым ончыктем. Кунам Мый калык-шамычын шинча ончылнышт тендан дене мом ыштымем гоч святой улмем ончыктем, нуно пален налыт: Мый Господь улам, – ойла Господь Юмо.24Мый тендам калык-влак кокла гыч налам, чыла эл гыч погем да шке мландышкыда кондем.25Тендан ӱмбак Мый яндар вӱдым шыжыктем, да те эрныктыме лийыда. Мый тендам чыла йырныкда деч, чыла шояк юмыда деч эрныктем.26Мый тыланда у шӱмым пуэм, кӧргышкыда у шӱлышым пуртем. Тендан оҥда гыч кӱ гай шӱмдам налам да мут колыштшо шӱмым пуэм.27Кӧргышкыда шке Шӱлышем пуртем, да те Мыйын кӱштымаш-влакем почеш илаш да пунчал-шамычем шуктен шогаш тӱҥалыда.28Те Мыйын кугезе кочаланда пуымо мландыште илаш тӱҥалыда. Те Мыйын калыкем, а Мый тендан Юмыда лиям.29Тендам Мый ару огыл улмыда деч утарем. Мый тыланда киндым пуэм да тудым шукемдем, тетла шужымашым ом колто.30Шужымашлан кӧра вес калык-шамыч ончылно намысыште ида лий манын, Мый пушеҥгылаште саскам да пасулаште лектышым шукемдем.31Тунам те осал корно ден уда пашадам шарналтеда, чыла сулык ден йырнык пашаланда шкаланда шке йыгыжге лийыда.32Пален шогыза, тидым Мый тыланда кӧра огыл ыштем, – ойла Господь Юмо. – Израиль калык, коштмо корнет деч вожыл, вожылмет деч йошкарге!33Тыге ойла Господь Юмо: чыла сулыкда деч эрыктымеке, Мый тендам олалашкыда илаш пӧртылтем. Мом шалатыме, тудо угыч чоҥымо лиеш.34Пуста мландым, кудыжо эртен кайыше-шамычын шинчаштышт ир мланде лийын, угыч курал-ӱдаш тӱҥалыт.35Тунам каласат: ’Тиде пуста мланде кызыт Эдем сад гай лийын. Пустаҥдыме, шалатыме да коден кайыме ола-влак чоҥен пеҥгыдемдыме улыт, тушто еҥ-шамыч илат’.36Тунам йырда илен кодшо калык-влак пален налыт: тиде Мый, Господь, мом шалатымым угыч чоҥем, пуста мландым угыч ӱдем. Мый, Господь, тидым каласенам да тидым ыштем!37Тыге ойла Господь Юмо: Израиль калыкын йодмыжлан Мый угыч вашештем да нунылан теве могай порылыкем ончыктем: Мый еҥже-влакым кӱтӱ семын шукемдем.38Кузе Иерусалимыште пайрем жап годым надыр шорык шуко лиеш, туге пустаҥше ола-влак еҥ-шамыч дене темыт. Тунам пален налыт: Мый Господь улам!”»
Institute for Bible Translation, Finland