Иез3
1Тудо мылам каласен: «Айдеме эрге! Мо тыйын ончылнет – коч, коч тиде вӱдылка книгам, вара кай да Израиль калыклан ойло».2Тунам мый умшам почынам, да Тудо мыланем тиде книгам кочкаш пуэн.3Тудо каласен: «Айдеме эрге! Коч Мыйын пуымо книгам, тудын дене мӱшкыретым теме!» Мый кочкынам, умшаштем книга мӱй гай шере лийын.4Тудо мыланем каласен: «Айдеме эрге! Израиль калык деке кай да нунылан Мыйын шомакем ойло.5Тый палыдыме да умылаш лийдыме йылман калык деке огыл, а Израиль калык деке колтымо лият.6Палыдыме да умылаш лийдыме йылман калык-влак деке колтымо от лий – нунын шомакыштым тый от умыло ыле. А такшым Мый тыйым нунын деке колтем гын, нуно тыйым колыштыт ыле.7Но Израиль калыкын тыйым колыштмыжо ок шу, вет тудо Мыйым ынеж колышт – уло Израиль тукым ӱскырт да мут колыштдымо.8Но Мый тыйым нунын гаяк ӱскыртым да пеҥгыде саҥганым ыштем.9Мый тыйым кӱ деч пеҥгыдыракым, тулгӱ гайым, ыштем. Кеч нуно вуянче тукым улыт, нунын деч ит лӱд, ит чытыре».10Тудо мыланем каласен: «Айдеме эрге, тылат каласыме чыла шомакем тӱткын колышт да нуным шарне.11Шке калыкетын пленыш наҥгайыме эргыж-влак деке кай да нунылан ойло. Колышташ тӱҥалыт але уке, нунылан каласе: ”Тыге ойла Господь Юмо!”»12Тидын деч вара мыйым Шӱлыш нӧлталын, да мый шеҥгелнем кӱдырчӧ гай кугу йӱкым колынам: «Господьын чапше каваште моктымо лийже!»13Тыгак чонан ӱжака-влакын икте-весышт дек тӱкнышӧ шулдыр йӱкышт, воктенышт улшо орава-влакын лӱшкымышт да кугу кӱдырчын рашкалтымыже шоктеныт.14Шӱлыш мыйым нӧлталын да тушеч наҥгаен. Мый кочылык дене темше да тургыжланыше чонан каенам, вет ӱмбалнем Господьын пеҥгыде кидше лийын.15Мый Тел-Авивыш, Ховар эҥер воктеке, тушко илаш кусарыме-влак деке толынам. Тушто нунын дене шым кече тӱҥгылгышӧ гай шинченам.16Шым кече эртымеке, мыланем Господьын шомакше лийын:17«Айдеме эрге! Мый тыйым Израиль калыкын оролжылан шогалтенам. Тый Мыйын умшам гыч лекше шомакым колышташ да Мыйын шижтарен ойлымем Израиль калыклан увертараш тӱҥалат.18Мый осалым ыштыше еҥлан ”тый колет!” манам, а тый, илыше кодшо манын, тудым от шижтаре, осал корныж гыч кораҥже манын от ойло гын, тиде еҥ осалым ыштымыжлан кӧра кола, а колымыжлан мут кучаш Мый тыйым шогалтем.19Но тый осал еҥым шижтарет, а тудо осал пашаж деч, осал корныж гыч ок кораҥ гын, осалым ыштымыжлан кӧра кола, а тый шке чонетым арален кодет.20Чын ыштыше еҥ шке чынлыкше деч кораҥеш, осалым ышта, да Мый тудын корнышкыжо шӱртньымӧ кӱм пыштем гын, тудо кола. Тый тудым шижтарен отыл, сандене тудо шке сулыкшылан кӧра кола. Тудын ондак ыштыме поро пашаже-влак шарналтыме огыт лий, а тудын колымыжлан Мый тыйым мут кучаш шогалтем.21Но, чын ыштыше еҥ сулыкыш ынже пуро манын, тудым шижтарет, да тудо сулыкым ыштымыжым чарна гын, шижтарыметлан кӧра тудо илаш тӱҥалеш, а тый шке чонетым утарен кодет».22Тушто мыйын ӱмбалнем Господьын кидше лийын, да Тудо мыланем каласен: «Лек тӧрверыш, Мый тушто тыланет шке шомакем ойлем».23Мый тӧрверыш лектынам да ужынам: тушто Господьын чапше шога. Тудыжо Ховар эҥер воктене ужмо чап гай лийын. Мый кумык возынам.24Кӧргышкем Шӱлыш пурен да мыйым йол ӱмбаке шогалтен. Господь мыланем каласен: «Кай да мӧҥгыштет тӱкылалт шич.25Тыйым, айдеме эрге, кандыра дене кылдат, да тый калык коклаш лектын от керт.26Мый тыге ыштем: тыйын йылмет умшаношмет дек пижын шинчеш – тый йылмыдыме лият да нуным шылтален от керт, вет нуно вуянче тукым улыт.27Но кунам Мый тый денет кутыраш тӱҥалам, умшатым почам, да тый нунылан ойлаш тӱҥалат: ”Тыге Господь Юмо ойла!” Кӧ колыштнеже – тек колыштеш, а кӧ ынеж колышт – тек огеш колышт, вет нуно вуянче тукым улыт.
Institute for Bible Translation, Finland