Иез4
1А тый, айдеме эрге, кермычым нал да ончыкет пыште, тушан Иерусалим олам сӱретле.2Тудым йыр авырен нал: сеҥен налаш полшышо чоҥежым ыште, мланде кӱкшака-влакым нӧлтал, ола ваштареш станым шогалте, йырым-йыр пырдыжым шалатыше курал-влакым шогалте.3Кӱртньӧ калайым нал, тудым ола ден шке коклаштет кӱртньӧ пырдыж семын шогалте да шке чуриетым тудын деке савыре: теве ола пуйто авырен налме, тудым тый авырет. Чыла тиде Израиль калыклан палдарыше пале лиеш.4Вара шола ӧрдыжышкет воч да ӱмбакет Израиль калыкын сулыкшо-влакым пыште. Шола ӧрдыж дене тыге кийыме чыла кечыштет тыйын ӱмбалнет Израильын сулыкшо-влак лийыт.5Мыняр ий тудо сулыкым ыштен илен, тынар кечым Мый тылат палемденам – кумшӱдӧ индешле кече тый Израиль калыкын сулыкшым ӱмбалнет нумалаш тӱҥалат.6Тидым шуктымеке, угычын воч, но ынде – пурла ӧрдыжыш, да Иуда калыкын сулыкшо-влакым ӱмбалнет нумал. Мый тылат нылле кечым палемденам, кажне ийлан – ик кече.7Авырен налме Иерусалим велыш чуриетым савыре, шокшетым кергалте да, кидетым нӧлталын, тудын ваштареш пророклен ойло.8Авырен налме кечет-влак пытымешке, ик ӧрдыж гыч весыш савырнен ит керт манын, Мый тыйым кандыра дене кылдем.9Нал шыдаҥым, шожым, немычпурсам, яшмыкпурсам, тар шӱрашым, вистым – нуным ик атыш пырля пыште да киндым кӱэшт. Тый тудым ӧрдыжвалне кийымет годым, кумшӱдӧ индешле кече жапыште кочкаш тӱҥалат.10Киндым кажне кечын палемдыме жапыште коло сикль дене коч.11Вӱдымат кажне кечын палемдыме жапыште гинын ик кудымшо ужашыжым йӱ.12Киндетым шож лепошка семын коч, тудым еҥ-влакын шинча ончылнышт айдеме шуреш кӱэшт.13Лач тыге Израиль эрге-шамыч ару огыл киндым вес калык-влак коклаште кочкаш тӱҥалыт, кӧмыт дек Мый нуным поктен колтем», – каласен Господь.14Тунам мый каласенам: «О, Господь Юмем! Мый нигунам шкемым амыртен омыл: самырык годсо жап гыч таче кече марте колышо але янлык пуштмо вольыкым кочкын омыл, нимогай ару огыл шылым умшашкем налын омыл!»15Тудо мыланем вашештен: «Йӧра, айдеме шур олмеш вольык терысым кучылт кертат, тудын ӱмбалне киндетым кӱэшт».16Господь мылам каласен: «Айдеме эрге! Иерусалимым Мый кинде деч посна кодем. Тургыжланен, еҥ-влак киндым висен кочкаш, вӱдым подылтыш дене лӱдын-лӱдын йӱаш тӱҥалыт,17вет кинде ден вӱд ситышын огыт лий. Нуно лӱдмышт дене тӱҥгылгат, сулыкыштлан кӧра мерчен кошкат.
Institute for Bible Translation, Finland