Иез2
1Господьын чапшым мый теве тыгайым ужынам. Тидым ужмеке, кумык возынам да мылам ойлышо йӱкым колынам: «Айдеме эрге! Шогал йол ӱмбаке, Мый тыланет ойлаш тӱҥалам».2Кунам Тудо ойлен, кӧргышкем Шӱлыш пурен да мыйым йол ӱмбаке шогалтен, да мый мыланем Ойлышым колынам.3Тудо каласен: «Айдеме эрге! Мый тыйым израиль эрге-влак деке, Мыйын ваштареш шогалше вуянче калык деке, колтем. Нунат, ача-кочаштат таче кече марте Мыйын ваштареш шогеныт.4Нине еҥ-влак ӱскырт, мут колыштдымо улыт. Мый тыйым нунын деке колтем, тый нунылан каласет: ”Тыге Господь Юмо ойла!”5Нуно колышташ тӱҥалыт але огыт тӱҥал – вет нуно вуянче калык улыт, – но тек палат: нунын коклаште пророк лийын.6Айдеме эрге, тый нунын коклаште иман вондер, коршаҥге да скорпион коклаште илыме семын илет гынат, нунын деч да шомакышт деч ит лӱд. Ит лӱд нунын чурийышт да шомакышт деч, вет нуно вуянче калык улыт.7Колышташ тӱҥалыт але огыт тӱҥал, вет нуно вуянче калык улыт, нунылан Мыйын шомакем ойло.8А тый, айдеме эрге, колышт, мом Мый тыланет ойлем. Тиде вуянче калык гай ӱскырт ит лий. Поч умшатым да мом Мый тыланет пуэм, тудым коч».9Мый ужынам: мый декем кидым шуялтыме, а тушто – вӱдылка книга.10Тудо мыйын ончылнем вӱдылка книгам шарен, тудыжо кок велымат возен пытарыме лийын. Туштыжо шортмаш, ойго да шӱлык нерген ойлышо шомак-влак лийыныт.
Institute for Bible Translation, Finland