Иез23
1Мыланем Господьын шомакше лийын:2«Айдеме эрге! Кок ӱдырамаш лийын, ик аван ӱдыржӧ-влак.3Самырык годсек нуно яжар лийыныт, Египетыште яжарланеныт. Тушто нунын чызыштым кормыжтылыныт, самырык чызе вуйыштым кучылтыныт.4Кугуракшын лӱмжӧ Огола, а шӱжаржын Оголива лийын. Мый нуным ватылыкеш налынам, нуно эрге ден ӱдыр-влакым ыштеныт. Огола – тиде Самарий, Оголива – Иерусалим.5Но Огола Мыланем ӱшанле лийын огыл, яжарланаш тӱҥалын. Кап кумыл йодмыжо тудым Ассирийысе пӧржмарийже-влак деке шупшын. Нине сарзе-влак6шемалге-канде тӱсан вургемым чиен коштыныт, кундем вуйлатыше ден ола вуйлатыше лийыныт. Нуно чыланат имне дене кудалыштше самырык мотор пӧръеҥ лийыныт.7Тудо Ассирийын чыла тале эргыж дене яжарланен да, кӧмыт деке кап кумылжо шупшын, нунын шояк юмышт дене шкенжым шакшылен.8Египетыште тӱҥалме яжарланымашыжым тудо коден огыл. Эше самырыкше годым тушто египтян-влак тудын дене маленыт, самырык чызе вуйжым кучылтыныт, кап кумыл йодмыштым шуктеныт.9Сандене Мый тудым Ассирий эрге пӧржмарийже-влак кидыш пуэнам, вет кап кумылжо тудым нунын деке шупшын.10Нуно тудым чараҥденыт, эрге ден ӱдыржӧ-шамычым пленыш налыныт, а шкенжым керде дене пуштыныт. Тыге тудлан мутым кучыктеныт, да тудо ӱдырамаш-влак коклаште мыскылтышыш савырнен.11Чыла тидым Оголива шӱжарже ужын, но тудын кап кумыл йодмыжо эшеат кугу лийын, яжарланымыж дене тудо шке акажым эртен.12Тудымат Ассирий эрге-влак деке – кундем вуйлатыше ден ола вуйлатыше, чапле вургемым чийыше сарзе-шамыч деке – кап кумыл йодмыжо шупшын. Нуно чыланат имне дене кудалыштше самырык мотор пӧръеҥ лийыныт.13Мый ужынам: тудат шкенжым шакшылен – акаж ден шӱжарже ик корно дене каеныт.14Но Оголива яжарланымыжым эшеат шукемден. Тудо пырдыжеш пӱчкын лукмо пӧръеҥ сӱрет-влакым, халдей-шамычын йошкар чия дене сӱретлыме тӱсыштым ужын.15Нунын кыдалыштышт сӧрал ӱштӧ, вуйыштышт чапле вуйчием лийыныт, чыланат сартӧра гай койыныт. Вавилон эрге-влак – Халдейыште шочын кушшо пӧръеҥ-влак – тыге сӱретлыме лийыныт.16Оголиван кап кумыл тулжо нунын дек ик шинчаончалтыш гычак ылыжын, да тудо нунын дек Халдейыш уверзе-шамычым колтен.17Вавилон эрге-влак тудын дек йӧратен модмо вакшышкыже толыныт да тудым шке яжарланымышт дене шакшыленыт. Нунын дене шкенжым шакшылымеке, тудо нунын деч йырнен кораҥын.18Кунам тудо, яжарланымыжым шылтыде, шке чаражым почын, тунам Мыйын чонем, ала-кунам акаж деч йырныме семынак, тудын дечат йырнен кораҥын.19Самырык улмыж годым Египет мландыште яжарланымыжым шарналтен, тудо яжарланымыжым эшеат шукемден.20Кап кумыл йодмыжо тудым пӧржмарийже-влак деке шупшын. Нуныжын тарманышт осёлын гай лийын, а нӧшмыштым ожо семын йоктареныт.21Тыге тый самырык годсо аташланыметым шарналтенат, кунам египтян-шамыч оҥпогетым кормыжтылыныт да самырык чызе вуетым кучылтыныт.22Сандене тылат, Оголива, Господь Юмо тыге ойла: пӧржмариет-влакым, кӧмыт деч йырнен кораҥынат, Мый тыйын ваштареш нӧлталам. Мый нуным ӱмбакет чыла велым кондем:23Вавилон эрге-шамычым, чыла халдей-влакым, Пекодышто, Шоа ден Коаште илыше-шамычым, нунын дене пырля Ассирий эрге-влакым. Нуно чыланат кундем вуйлатыше ден ола вуйлатыше, сартӧра ден он-шамыч, имне дене кудалыштше самырык мотор пӧръеҥ-влак улыт.24Нуно тыйын ӱмбакет саргурал дене, имне да орва-влак, шуко калык дене толыт. Тыйым чыла велым кугу да изи авыртышан, ӧшлӧкым упшалман еҥ-влак авырат. Мый тыйым нунылан судитлаш пуэм, да нуно тыйым шке судышт дене судитлат.25Мый тыйын ӱмбакет ушкалыше шыдем савырем. Нуно, ажгынен, ӱмбакет кержалтыт: нер ден пылышетым пӱчкыт, а кодшо сарзет-влакым керде дене пытарат. Эрге ден ӱдырет-шамычым руалтен кучат, а утлен кодшо-влакым тул пӧжга.26Нуно ӱмбачет вургемым кушкед кышкат, сӧрастарыш-влакетым поген налыт.27Египетыштак тӱҥалме аташланыметлан, яжарланыметлан Мый мучашым ыштем. Тетла тый тусо пӧръеҥ-влак ӱмбак от ончал, Египет нерген от шарналте.28Вет Господь Юмо тыге ойла: кӧмыт тылат ужмышудымо улыт да кӧмыт деч тый йырнен кораҥынат, Мый тыйым нунын кидыш пуэм.29Нунын тый декет нимогай чаманымашышт ок лий: мом пашам ыштен погенат, нуно чыла поген налыт, тыйым чарам, вургем деч посна кодат. Яжарланыме годсо чаралыкет, аташланымет, яжарлыкет – чылажат почмо лийыт.30Вес калык-влак дене яжарланыметлан да нунын шояк юмышт дене шкендым шакшылыметлан теве мо тыйым вуча.31Тый акатын корныжым тошкенат, сандене тыйын кидышкет Мый тудын чашыжым кучыктем».32Тыге ойла Господь Юмо:«Тый акатын чашыж гыч,келге да кумда чашыж гыч, йӱат.Тыйым воштылаш да мыскылаш тӱҥалыт,вет тиде чаше келгашан.33Тый тудым йӱын руштат, тыйым ойго авалта:тиде – шучкылык ден пытымашын чашыже,Самарий акатын чашыже.34Тый тудым подылат, пундаш марте йӱат,вара шырпын шалатет да оҥетым коркален пытарет.Тидым Мый каласенам», – ойла Господь Юмо.35Сандене Господь Юмо тыге ойла: «Тый Мыйым монденат да Мый декем тупынь савырненат, садлан аташланымет ден яжарланыметлан мутым кучо!»36Господь мылам каласен: «Айдеме эрге, Огола ден Оголивам судитле! Чыла йырнык пашашт нерген нунылан луктын каласе.37Вет нуно яжарланеныт, кидышт вӱраҥын. Нуно шояк юмо-влак дене яжарланеныт, эсогыл Мылам ыштыме эргыштым тул надыр шотеш нунылан кочкашышт конденыт.38Теве эше мом нуно Мыйын ончылнем ыштеныт: тудо кечынак нуно Мыйын святой верем шӱктареныт да шуматкече-влакем шакшыленыт.39Вет кунам шке шояк юмыштлан эргыштым шӱшкылыныт, тудо кечынак Мыйын святой верышкем толыныт да тудым шакшыленыт. Теве мом нуно Мыйын пӧртыштем ыштылыныт!40Тидын деч посна нуно уверзе-шамычым умбалне илыше пӧръеҥ-влак деке колтеденыт. Кунам нунышт толыныт, тый нунылан кӧра мушкылтынат, шинчатым чиялтенат да сӧрастарыш-влакетым пижыктенат.41Тый кынертен вочмо мотор верышкет вераҥынат, тудыжын ончылно ӱстел погымо лийын, да тушко Мыйын тамлыпушан тӱтыртыш-влакем да елеем шынденат.42Тушеч куанен йӱкланыше калыкын йӱкшӧ шоктен. Тиде кашак деке эше ир мланде гыч йӱшӧ еҥ-шамычым ӱжын конденыт, нунышт ака ден шӱжарын кидышкышт кидшолым пижыктеныт, вуйышкышт мотор вуйшӱдышым пыштеныт.43Тунам Мый тиде яжарланен лунчыргышо ӱдырамаш шотышто каласенам: ”Тек тудо нунылан яжар ӱдырамаш гай лиеш, вет тудо чынжымак тыгай!”44Кузе яжар ӱдырамаш деке толыт, тыге нуно тудын деке коштыныт. Тыге нуно Огола ден Оголива деке, аташ ӱдырамаш-влак деке, толеденыт.45Но чын ыштыше пӧръеҥ-влак нунылан судым ыштат, яжар-шамычым да вӱрым йоктарыше-влакым судитлыме суд дене нуным судитлаш тӱҥалыт. Вет нуно яжарланеныт, кидыштым вӱр дене амыртеныт».46Господь Юмо тыге ойла: «Нунын ваштареш калык тӱшкам погыман да нуным шучкылык ден агымашлан пуыман!47Калык тӱшка нуным кӱм кышкен пуштеш, керде дене руа. Нунын эрге-ӱдырыштым пуштеш, а пӧртыштым йӱлалта.48Тыге Мый тиде мландыште аташланымашлан мучашым пыштем. Тидым ужын, моло ӱдырамаш-влак ушым шындат, тендан семын огыт аташлане.49Аташланымыланда те мутым кучаш тӱҥалыда, шояк юмыда дене сулыкыш пурымылан наказатлыме лийыда. Тунам пален налыда: Мый Господь Юмо улам».
Institute for Bible Translation, Finland