Иез22
1Мыланем Господьын шомакше лийын:2«Айдеме эрге, судитле, вӱрым йоктарыше тиде олам судитле! Тудлан чыла йырныкшым луктын каласе.3Каласе: ”Господь Юмо тыге ойла: О, ола! Уремлаштет тый вӱрым йоктарет, тидын дене шкаланет судитлыме жапым лишемдет! Шояк юмо-влакым ыштет, нунын дене шкендым шакшылет!4Вӱрым йоктарымет дене титакыш пуренат, ыштыме шояк юмо-шамычет дене шкендым шакшыленат. Тидын дене тый мут кучыктымо кечет лишемденат, ий-влакет шотлымо улыт. Мый тыйым калык-шамычлан воштылчыкым, эл-влаклан мыскылтышым ыштем.5Кӧ тый дечет умбалне да кӧ лишне – чыланат тыйым, шке лӱметым шӱктарыше олам, пеш чот вуянче олам, игылташ тӱҥалыт!6Израильын онжо-влак, кӧмыт тыйын коклаште иленыт, кажныже кертмышт семын вӱрым йоктареныт.7Илыше-влакет ача ден аваштым нимоэш огыт шотло, йот мланде гыч толшо-шамычым темдат, тулык йоча ден тулык ватым шыгыремдылыт.8Мо святой, тидым тый от шотло, шуматкече-шамычем шакшылет.9Коклаштет еҥ ӱмбак шоякым ойлышо-влак улыт, нуно еҥ вӱрым йоктарынешт. Курыклаштет шояк юмылан кондымо надырым кочкыт, уремлаштет намысле пашам ыштылыт.10Тыште ачан изватыж дене возыт, ӱдырамашын тылзашыжлан кӧра ару огыл улмыж годым тудын дене малат.11Икте тыгай йырнык пашам лишылъеҥжын ватыж дене ышта, весе шке шешкыжым шакшыла, а кумшо шочмо акажым але шӱжаржым, шке ачажын ӱдыржым, виешла.12Тыште взяткым налмылан кӧра еҥ вӱрым йоктарат. Арымеш пуымо годым ашламым налыт, шкаланышт парышым кычалыт, тыгак лишылъеҥым темден, тудын кӱшеш илат, а Мыйым монденыт, – ойла Господь Юмо.13Теве Мый еҥ кӱшеш илыметлан да уремлаштет вӱрым йоктарыметлан кидемым сырен пералтем.14А кунам Мый тыйым мут кучаш шогалтем, тунам чолгалыкет кодеш мо, кидетше виян лиеш мо? Мый, Господь, тидым каласенам да тидым ыштем.15Мый тыйым калык-влак коклаш шалатем, элла мучко пуалтен колтем, йырнык пашатлан мучашым ыштем.16Калык-влак шинча ончылно тый шкендым шке намысыш пуртет, тунам умылет: Мый Господь улам”».17Мылам Господьын шомакше лийын:18«Айдеме эрге! Израиль калык Мыланем куштыра гай лийын. Нуно чыланат коҥгасе вулно, той, кӱртньӧ да шемвулно гай, шийым левыктыме деч вара кодшо шлак гай лийыныт.19Сандене Господь Юмо тыге ойла: те чыланат куштыра гай лийында, садлан Мый тендам Иерусалимыште погем.20Кузе коҥгаш шийым, тойым, кӱртньым, шемвулным да вулным пырля пыштат да, левыкташ манын, тулым пошат, тыге Мыят кугу шыдем дене тендам погем да коҥгаш пыштен левыктем.21Мый тендам погем да ӱмбакыда шыдемын тулжым пошем – те тушто левыктыме лийыда.22Кузе коҥгаште ший левыкталтеш, тугак теат тиде олаште левыктыме лийыда. Тунам пален налыда: тиде Мый, Господь, тендан ӱмбак шыдем опталынам».23Мылам Господьын шомакше лийын:24«Айдеме эрге! Тиде мландылан каласе: тый сулык деч эрныктыдыме мланде улат, шыде кечын йӱр тыйым ок вӱдыжтаре!25Тушто пророк-влак шке коклаштышт кутырен келшеныт, нуно ырлыше да мом кучымыштым кӱрыштшӧ лев гай улыт. Нуно еҥ-влакым пытарат, пого ден поянлыкым поген налыт, тулык вате чотым шукемдат.26Тиде мландын иерейже-шамыч Мыйын законем пудыртат, Мыланем святитлымым шакшылат. Нуно святой ден святой огыл коклаште ойыртемым огыт ыште, арум ару огыл деч ойыркалаш огыт туныкто, шуматкече-влакемым кӱлдымыш луктыныт. Нуно Мыйын лӱмем шӱктарат.27Тушто он-шамыч мом кучымыштым кӱрыштшӧ пире гай улыт. Сут улмыштлан кӧра вӱрым йоктарат, еҥ-влакым пытарат.28А пророк-шамыч чыла тидым ошемдат: кончымашышт – пуста, ончык ужмашышт – шояк. Нуно ойлат: ”Господь Юмо тыге ойла”, кунам Господь тидым ойлен огыл.29Тыглай калык коклаштат икте-весыштым темдат, агат, йорло ден незерым шыгыремдылыт, шке праваштым арален кертдыме йот калык еҥым пызырат.30Тиде мландым пытараш огыл манын, Мый нунын коклаште тугай айдемым кычалынам, кӧ пырдыжым олмыкта да тиде мланде верч Мыйын ончылнем пырдыж шелшыш шогалеш, но муын омыл.31Садлан мый ӱмбакышт шке шыдем опталам, кугу шыдемын тулжо дене нуным пытарем, чыла мом ыштымыштлан мутым кучыктем, – ойла Господь Юмо».
Institute for Bible Translation, Finland