Иез24
1Индешымше ийын луымшо тылзыжын луымшо кечынже мыланем Господьын шомакше лийын:2«Айдеме эрге! Тачысе кечым палемде, тудым шкаланет возен шынде – тиде кечын Вавилон кугыжа Иерусалимым авырен налеш.3Тиде вуянче тукымлан туштен ойло, тыге каласе:”Тыге ойла Господь Юмо:шынде подым, шынде да тушко вӱдым теме.4Тушко шылым, эн сай шыл моклакам –ончыл эрде ден шеҥгелым – пыште.Луан эн сай шыл дене тудым теме,5тидлан эн сай шорык-влакым ойыро.Под йымаке пум пыште, тек вӱд шолеш,тек луан шылат сайын кӱэш.6Вет Господь Юмо тыге ойла:Ойго вӱрым йоктарыше олалан!Ойго рӱдаҥше подлан,кудым огеш лий эрыкташ!Шерева почеш ойырен налде,ик шыл моклака почеш весым луктын кудалтыза!7Тиде ола вӱрым йоктарыме дене амырген,чара кӱ ӱмбаке тудо вӱрым йоктарен –йоктарен огыл тудым мланде ӱмбаке,туштыжо тудым пурак петыра ыле.8Шыдем ылыжташ да ӱчым шукташ манын,Мый тиде вӱрым чара кӱ ӱмбалнак коденам,тушто тудым шылташ ок лий.9Сандене Господь Юмо тыге ойла:Ойго вӱрым йоктарыше олалан!Тулотым ылыжташ Мыят шуко пум пыштем.10Пум ешаре, тулым ылыжте,шылым чот шолто – тек вишкыде ок кодда лу-влак когаргат.11Вара шолын пытыше подым тулшол ӱмбаке шынде –тек тудо чот ыра да тойжо йошкарга,тек тушто улшо лавыра шула, рӱдаҥшыже пыта.12Но чыла тыршымаш арам!Кӱжгӧ рӱдаҥше ок пыте,тидлан эсогыл тулат ок полшо.13Аташланымет тыйым ару огылым ыштен:мыняр Мый тыйым эрыктем,тый садак амыргыше кодат.Шке шыдем ӱмбакет тӱрыснек опталмешке,тый ару от лий.14Тидым Мый, Господь, ойлем.Жап шуэш, Мый шонен пыштымем шуктем –тудым ом вашталте,чаманен ом нал, ом серлаге.Коштмо корнет ден пашат почешМый тыйым судитлаш тӱҥалам, –ойла Господь Юмо”».15Мылам Господьын шомакше лийын:16«Айдеме эрге! Кӧ шинчатым куандара, Мый тудым, вучыдымо азапым колтен, тый дечет налам. Но тый ит ойгане, ит шорт, шинчавӱдым ит йоктаре.17Шыпак кечкыж, шортмо йӱлам ит эртаре. Молгунамсе семынак вуйчиеман код, йолчиемым чий, чуриетым ит петыре да колышым уштымо киндым ит коч».18Эрдене мый калыклан ойленам, а кастеныже ватем колен. Кузе мылам кӱштымӧ лийын, вес кечынже тугак ыштенам.19Еҥ-влак мый дечем йодыныт: «Каласе, тыге ыштымет дене мыланна мом ойлынет?»20Мый нунылан вашештенам: «Мылам Господьын шомакше лийын.21”Каласе Израиль калыклан: тыге ойла Господь Юмо: Мый шке святой верем – тендан кугешнымаш ден вийдам, шинчадам куандарышым, чонланда эн шергым – шакшылаш пуэм. А Иерусалимеш кодымо эрге ден ӱдырда-влак керде деч пытат.22Тунам теат мыйын семын ыштеда – чурийдам огыда петыре, колышым уштымо киндым огыда коч.23Вуйыштыда вуйчием, йолыштыда йолчием лийыт. Те ойгырен шорташ огыда тӱҥал, но сулыкланда верч мерчаш да пырля шыпак кечкыжаш тӱҥалыда.24Иезекииль тыланда палдарыше пале лиеш. Мом тудо ыштен, чыла тидым те ышташ тӱҥалыда. Кунам тиде шукталтеш, те пален налыда: Мый Господь Юмо улам”.25А тый, айдеме эрге, колышт: тудо кечын, кунам Мый нунын чоткыдо карманыштым, куан ден чапыштым, шинчаштым куандарышым, чоныштлан эн шергым поген налам, кунам нуным эрге-ӱдырышт деч посна кодем,26тунам утаралт кодшо еҥ тый декет уверым каласаш толеш.27Тудын толмекше, тыйын умшат почылтеш. Тый кутыраш тӱҥалат, тетла йылмыдыме от лий. Нунылан тый палдарыше пале лият. Тунам пален налыт: Мый Господь улам».
Institute for Bible Translation, Finland