Иез11
1Шӱлыш мыйым нӧлталын да Господьын пӧртшын эрвелке ончышо капкаж деке конден. Капкаш пурымо вер дене коло вич еҥ лийын. Нунын коклаште мый Иазанийым, Азур эргым, да Фалтийым, Ваней эргым, ужынам, нуно калыкын онжо лийыныт.2Господь мыланем каласен: «Айдеме эрге! Теве нине еҥ-влак осалым ышташ шонат да тиде олаште уда ой-каҥашым пуат.3Нуно ойлат: ”Кызыт пӧртым чоҥымо жап огыл. Тиде ола – под, а ме тушто шыл улына”.4Сандене нунын ваштареш пророк шомакым ойло! Айдеме эрге, пророкло!»5Тунам ӱмбакем Господьын Шӱлышыжӧ волен, Господь мылам манын: «Каласе: ”Тыге ойла Господь: мом те ойледа, израиль калык, да мо тендан ушыштыда – Мый палем.6Тиде олаште те шукым пуштында, урем-влакым колышо кап дене теменда.7Сандене Господь Юмо тыге ойла: тиде ола – под, а шыл – пуштмо еҥда-влак, нунын дене те олам теменда. А тендам Мый ола гыч луктам.8Те керде деч лӱдыда? Мый ӱмбакыда кердым колтем, – ойла Господь Юмо. –9Мый тендам ола гыч луктам да йот еҥ-влак кидыш пуэм, тендан дене судым ыштем.10Те керде деч пытеда, Мый тендам Израильыште чек воктене судитлем. Тунам те пален налыда: Мый Господь улам.11Тиде ола тыланда под ок лий, а те тушто шыл огыда лий. Мый тендам Израильыште чек воктене судитлем,12тунам пален налыда: Мый Господь улам. Те пунчал-влакем шуктен огыдал, Мыйын законем-влак почеш огыл, а йыр улшо калык-влакын йӱлашт почеш иленда”».13Кунам мый нине пророк шомакым ойленам, Фалтий, Ваней эрге, колен. Тунам мый кумык возынам да кугу йӱкын каласенам: «О, Господь Юмем! Израильын илен кодшо калыкшым пӱтынек пытарынет мо?»14Мыланем Господьын шомакше лийын:15«Айдеме эрге! Шке тукым иза-шольыч-влаклан, тыйын иза-шольыч ден родо-тукыметлан – пӱтынь Израиль калыклан – Иерусалимыште илыше-шамыч тыге ойлат: ”Господь деч тораште илыза. А тиде мланде мыланна пуалтын”.16Тидлан тыге каласе: ”Господь Юмо тыге ойла: Мый нуным вес калык-влак деке колтенам да элла мучко шалатенам гынат, кайыме мландыштышт Мый нунылан святой вер семын лиям”.17Вара каласе: ”Тыге ойла Господь Юмо: Мый тендам калык-влак кокла гыч погем да шалатен колтымо элла гыч кондем, Израиль мландым тыланда пӧртылтем.18Кунам нуно тушко пӧртылыт, тудым чыла тӱрлӧ йыгыжге йырнык деч эрыктат.19Мый нунылан вес шӱмым пуэм, кӧргышкышт у шӱлышым пыштем. Кӱ гай шӱмыштым Мый оҥышт гыч налам да мут колыштшо шӱмым пуэм.20Тунам нуно Мыйын пунчал-влакем шуктен шогаш, Мыйын законем-влак почеш илаш тӱҥалыт. Нуно Мыйын калыкем, а Мый нунын Юмышт лиям.21А кӧн шӱмжӧ тӱрлӧ йыгыжге йырнык деке савырна, мом ыштылмыштым Мый вуй ӱмбакышт опталам”, – ойла Господь Юмо».22Тидын деч вара херувим-влак шулдырыштым шаралтеныт, пеленышт орава-шамычат каеныт. Херувим-влак ӱмбалне Израиль Юмын чапше лийын.23Господьын чапше ола деч нӧлталтын да ола деч эрвелныла улшо курык ӱмбалан чарнен шогалын.24Шӱлыш мыйым нӧлталын да Халдейыш, тушко пленыш наҥгайыме-влак деке, наҥгаен. Чыла тиде Юмын Шӱлышын пуымо кончымаште лийын. Тидын дене мыйын ужмо кончымаш пытен,25а мый пленыште улшо-шамычлан Господьын мылам мом ончыктымыжым каласкаленам.
Institute for Bible Translation, Finland