Есф6
1Тиде йӱдым [Господь] кугыжан омыжым налын, да тудыжо [тарзыжлан] шарнымаш книгам – курымсерышым – кондаш кӱштен. Тудым кугыжалан лудыныт.2Тушто Гавафа ден Фарра нерген возымым муыныт. Нуно кугыжан евнухшо-влак лийыныт, кугыжан пӧлемже-влакым ороленыт. Нуно Артаксеркс кугыжам пушташ кутырен келшеныт улмаш, но Мардохей тидын нерген кугыжалан шижтарен.3Кугыжа йодын: «Мардохейлан пагалымашым кузе ончыктымо? Мо дене тудо палемдалтын?» Кугыжан эн лишыл тарзыже-влак вашештеныт: «Тудлан нимом ыштен огытыл».4[Кунам кугыжа Мардохейын поро пашам ыштымыж нерген йодыштын, кудывечыш Аман толын.] Кугыжа йодын: «Кудывечыште кӧ уло?» Тыгодым кугыжан пӧртын тӱжвал кудывечышкыже Аман пурен. Тудо ямдылыме меҥгешыже Мардохейым сакаш шонымыж нерген кугыжалан ойлаш толын улмаш.5Кугыжан тарзыже-влак вашештеныт: «Кудывечыште Аман шога». Кугыжа Аманым пурташ кӱштен.6Аман пурен. Кугыжа туддеч йодын: «Кугыжа иктаж еҥлан кугу пагалымашым ончыктынеже гын, тудлан мом ыштыман?» Аман шке семынже шоналтен: «Мылам огыл гын, эше кӧлан кугыжа кугу пагалымашым ончыктынеже?»7Аман вашештен: «Кугыжа иктаж-кӧлан кугу пагалымашым ончыктынеже гын,8тек кугыжан чийыме вургемжым кондат, тыгак кугыжан шинчын коштмо, сӧрастарышым чиктыман имньыжым вӱден кондат.9Вургем ден имньым тек кугыжан эн лӱмлӧ онжо кокла гыч иктыжлан пуат. Тек тудо кугу пагалымашым ончыктымо еҥлан кугыжан вургемым чикта, имньым кушкыжыктен, тудым ола урем мучко коштыкта да тудын ончылно увертара: ”Кӧлан кугыжа кугу пагалымашым ончыктынеже, тудын дене теве кузе ыштат!”»10Кугыжа Аманлан кӱштен каласен: «[Тый сай ойым пуышыч.] Кызытак вургем ден имньым нал да кугыжан капкаж воктене шинчыше иудей Мардохей дене мом каласыметым ыште. Кузе ойленат, чыла тугак ыште, нимомат ит кодо».11Аман кугыжан вургем ден имньым налын, Мардохейым чиктен, имньым кушкыжыктен, тудым ола урем мучко коштыктен да ончылныжо увертарен: «Кӧлан кугыжа кугу пагалымашым ончыктынеже, тудын дене теве кузе ыштат!»12Мардохей кугыжан капкаж деке пӧртылын, а ойганыше Аман, вуйжым петырен, вашке мӧҥгыжӧ ошкылын.13Аман мо лиймым Зерешь ватыжлан да чыла лишыл йолташыжлан каласкален. Тудын мунло йолташыже-влак ден Зерешь ватыже каласеныт: «Камвочметын амалже Мардохей гын, а тудо – иудей калык гыч, тугеже тый тудым сеҥен от керт, тудын ончылно пытет, [вет тудын пелен – илыше Юмо]».14Нуно эше мутланен пытарен огытыл, кугыжан евнухшо-влак толын шуыныт да Аманым Есфирьын ямдылыме сийышкыже вашкыкташ тӱҥалыныт.
Institute for Bible Translation, Finland