Есф7
1Кугыжа ден Аман кугыжанвате Есфирьын сийышкыже толыныт.2Тиде кечынат кочмо-йӱмӧ годым кугыжа Есфирь деч йодын: «Кугыжанвате Есфирь, могай тыйын йодмашет? Тылат чыла пуымо лиеш. Мо тыланет кӱлеш? Пел кугыжанышым йодат гынат, тидат шуктымо лиеш».3Кугыжанвате Есфирь вашештен: «Кугыжа, тыйын поро кумылетым суленам да тиде тыланет келша гын, мыйын шонымем да йодмем почеш мыланем да калыкемлан илышым пӧлекле!4Вет мый да мыйын калыкем кошарташ, пуштедаш да пытараш ужалыме улына. Мемнам куллыкыш ужалат ыле гын, мый ик мутымат ом лук ыле – тидын дене кугыжа нимом ок йомдаре ыле».5Артаксеркс кугыжа Есфирь ватыж деч йодын: «Кӧ тиде тыгай? Кушто тудо? Кузе тудо тыге ышташ тоштын?»6Есфирь вашештен: «Мемнан тушманна – тиде осал Аман!» Тунам кугыжа ден кугыжанвате ончылно Аманым кугу лӱдмаш авалтен.7Кугыжа, шыдешкен, ӱстелтӧр гыч кынел шогалын да полат пеленысе садерыш лектын каен. А Аман, илышыжым арален налже манын, кугыжанвате Есфирьым сӧрвалаш кодын. Аман умылен: кугыжа тудлан кочо пӱрымашым палемден.8Полат пеленысе садер гыч кочмо-йӱмӧ залыш пӧртылмекше, кугыжа Есфирьын кынертен вочмо верже ончылно лап лийше Аманым ужын. Кугыжа кычкырал колтен: «Эше мыйын пӧртыштемак кугыжанватым виешлынеже!» Кугыжан тыгай мутшо деч вара тунамак Аманын чурийжым леведыныт. 9Кугыжан Харбона лӱман ик евнухшо каласен: «Аманын пӧртшӧ воктене витле кынергут кӱкшытан меҥге шога. Тудым Аман тыйын илышетым арален кодышо Мардохейым сакалташ шогалтен». «Тиде меҥгеш Аманым сакыза», – манын кугыжа.10Мардохейлан ямдылыме меҥгеш Аманым сакеныт. Тунам кугыжан шыдыже лушкен.
Institute for Bible Translation, Finland