Зак.уш31
1Моисей каен да нине мутым чыла израиль эрге-влаклан ойлен.2Тудо каласен: «Мый ынде шӱдӧ коло ияш улам, тендам умбакыже вӱден каен ом керт. Мылам Господь Юмат каласен: ”Тый Иорданым от вончо”.3Господь Юмыда Шкежак тендан ончыч кая, тушто илыше калык-влакым чурийда ончыч пытара, да те нунын мландыштым поген налыда. Господьын каласымыж семынак, тендам Иисус вӱден наҥгая.4Господь нине калык дене [Иорданын ты велныже лийше] Сигон ден Ог аморрей кугыжа-влак дене ыштыме семынак ышта. Нине кугыжа-влакым Господь кугыжанышышт дене пырля пытарен.5Господь нине калыкым тендан кидыш пуа, да те нунын дене чылажымат мыйын кӱштымем семын ыштышаш улыда.6Пеҥгыде да лӱддымӧ лийза, нине калык деч ида ӧрткӧ, ида лӱд, вет Господь Юмыда Шкежак тендан дене пырля кая. Тудо тендан деч ок кораҥ, тендам коден ок кай».7Моисей Иисусым ӱжын да уло Израиль калык ончылно тудлан каласен: «Пеҥгыде да лӱддымӧ лий, вет Господьын кугезына-влаклан товатлымыж семынак мыланна пуаш сӧрымӧ мландышке тиде калыкым тый вӱден наҥгает да тудым нунылан пайлен пуэт.8Тый дечет ончыч Господь Шке кая. Тудо тый денет пырля лиеш, тый дечет ок кораҥ, тыйым коден ок кай. Ит лӱд, ит ӧрткӧ».9Моисей тиде законым возен налын да Господьын ойпидыш шондыкшым нумалше Левий тукым иерей-влаклан, тыгак израиль эрге-влакын чыла кугуракыштлан пуэн.10Моисей нунылан кӱштен каласен: «Кажне шым ий гыч, парымым кудалтыме ийын, Омаш пайрем годым тиде законым лудса.11Кунам уло израиль калык Господь Юмыда ончыко Тудын ойырен налме верышкыже толеш, тиде законым йӱкын лудса.12Тушко уло калыкым – пӧръеҥ ден ӱдырамашым, йоча-влакым, олаштыда илыше йот калык еҥ-влакым – погыза. Тек нуно колыштыт да тунемыт, тек Господь Юмышт деч лӱдын илат да законышто возымо чыла шомакым шуктен шогат.13Иордан вес могырыш вончен, тусо мландым сеҥен налмышт да тушто илаш тӱҥалмышт деч вара нунын йочашт, кӧмыт тиде законым эше огыт пале, тудым колыт да Господь Юмыда деч лӱдын илаш тунемыт».14Господь Моисейлан каласен: «Тыйын колымо жапет лишемеш. Иисусым ӱжын кондо, да коктын Юмо дене вашлийме омашыш [пурымо вер деке] шогалза – Мый тудлан мом ышташ кӱлмым каласем». Моисей ден Иисус толыныт да Юмо дене вашлийме омашыш [пурымо вер деке] шогалыныт.15Тушко Господь пыл меҥге семын толын да [Юмо дене вашлийме] омашыш пурымо вер деке шогалын.16Господь Моисейлан каласен: «Вашке тый шке кугезе кочат-влак деке кает. А тиде калык миен пурымо мландын йот юмыжо-влаклан яжарланен кумалаш тӱҥалеш. Тудо Мый декем тупынь савырна, тудын дене ыштыме ойпидышем пудырта.17Тудо кечын Мый тиде калыклан шыдешкем да тудым коден каем. Мый тудын деч шке чурием шылтем, да тудо пытарыме лиеш. Тудо кугу ойго ден орлыкыш логалеш да тыге каласа: ”Мемнан коклаште [Господь] Юмына уке, садлан огыл мо тиде ойго мемнан дене лийын?”18Вет тудо, вес юмо-влак деке савырнен, тӱрлӧ осал пашам ышташ тӱҥалеш, сандене Мый тиде кечын [тудын деч] шке чурием шылтем.19Тугеже, шкаланда тиде мурын [мутшым] возыза да тудым израиль калыклан туныктыза. Тек нуно тудым мурат, израиль калык ваштареш тиде муро Мыйын таныкем лиеш.20Кугезе кочаштлан товатлен сӧрымем семынак, Мый нуным [сай,] шӧр да мӱй йогыман мландыш намием. Тушто нуно теммешкышт кочкаш тӱҥалыт да ӧрдат, вара вес юмо-влак деке мелын савырнат да нунылан служитлаш тӱҥалыт. А Мый декем тупынь савырнат да [Мыйын нунын дене ыштыме] ойпидышем пудыртат.21Кунам нуно кугу ойго-орлыкыш логалыт, тиде муро нунын ваштареш танык лиеш – тудым [нуно шкештат,] ончыкылык тукымыштат огыт мондо. [Кугезе кочаштлан] товатлен сӧрымӧ [сай] мландышке эше намиен шуктыде, Мый нунын мом ышташ шонымыштым кызытак палем».22Тудо кечын Моисей тиде мурым возен налын да израиль эрге-влаклан туныктен.23Нав эрге Иисуслан Господь кӱштен каласен: «Пеҥгыде да лӱддымӧ лий, вет израиль эрге-влакым нунылан товатлен сӧрымӧ мландышкем тый наҥгает. Мый тый денет пырля лиям».24Моисей тиде законын чыла мутшым мучаш марте книгашке возен да25Господьын ойпидыш шондыкшым нумалше левит-влаклан тыге кӱштен каласен:26«Тиде закон книгам налза да Господь Юмыдан ойпидыш шондыкшо воктеке пыштыза. Тушто тиде книга тендан ваштареш танык семын лиеш.27Мый палем: те ӱскырт да сӱмсыр улыда. Те кызытат, мыйын эше пеленда илымем годым, Господь ончылно мут колыштдымо улыда. А колымекем, эшеат ӱскырт лийыда!28Мый декем тукымда-влакын чыла кугуракыштым, [судья ден] вуйлатышыда-влакым погыза. Чыла тидым мый нунылан каласем да ваштарешышт таныклан кава ден мландым ӱжам.29Мый палем: колымем деч вара те пужледа, мыйын каяш кӱштымӧ корно гыч кораҥыда. Илен-толын, те ойго-орлыкыш логалыда, вет Господь [Юмыда] ончылно осалым ышташ тӱҥалыда да тидын дене Тудын шыдыжым луктыда».30Вара Моисей израиль калык ончылно тиде мурын мутшым тӱҥалтыш гыч мучаш марте лудын пуэн.
Institute for Bible Translation, Finland