Зак.уш30
1Кунам тыланда ойлымо нине шомакем – суапландарымаш ден каргымаш – тендан дене шукталтеш, да те, Господь Юмыдан тендам шалатен колтымо верлаште вес калык-влак коклаште илымыда годым нине шомакым шарналтен,2шочшыда-влак дене Господь Юмыда дек савырнеда да, мыйын таче пуымо чыла кӱштымашем шуктен, Тудым уло шӱм-чонда дене колышташ тӱҥалыда –3тунам Господь Юмыда тендам серлага да пленыште улшо еҥда-влакым мӧҥгеш пӧртылта. Тудо тендам шалатен колтымо верла гыч, вес калык-влак кокла гыч мӧҥгеш поген конда.4Кеч те [ик каватӱр гыч] вес каватӱр марте шалатыме лийыда, Господь Юмыда тендам тушечынат пога да мӧҥгеш конда.5Господь тендам кугезыда-влакын сеҥен налме мландышкышт конда, да тиде мланде тендан лиеш. Господь тыланда шке порылыкшым ончыкта – те кугезыда-влак деч шукырак лийыда.6Господь Юмыдам уло шӱм-чон дене йӧратыза манын, Тудо тендан шӱмда да ончыкылык тукымдан шӱмышт гыч мут колыштдымашым пӱчкын луктеш – тунам те илаш тӱҥалыда,7да Господь Юмыда чыла тиде каргымашым тендам ужмышудымын ончышо да шыгыремдыл поктылшо тушманда-влак ӱмбаке колта.8Те Господь [Юмыда дек] угыч савырнеда да Тудым колышташ, мыйын таче тыланда пуымо Тудын кӱштымашыже-влакым шукташ тӱҥалыда.9Господь Юмыда чыла ыштыме пашаштыда кугу воранымашым пуа, тендам шуко шочшо да вольык дене, кугу пасу лектыш дене суапландара. Суапым ыштымыж годым Господь [Юмыда] тендан шотышто угыч куанаш тӱҥалеш, лач тыге Тудо тендан кугезыда-влак шотыштат куанен.10Тиде шукталтше манын, те Господь Юмыдам колыштшаш, тиде закон книгаште возымо Тудын кӱштымашыже, пунчалже [да законжо-влакым] шуктен шогышаш, Господь Юмыда деке уло шӱмда да уло чонда дене савырнышаш улыда.11Мыйын таче тыланда пуымо кӱштымаш неле огыл, тендан деч тудо тора огыл.12Тиде кӱштымаш каваште огыл, сандене те тыге каласен огыда керт: ”Мыланна тиде кӱштымашым колаш да шуктен шогаш манын, кӧ пылпомышко кӱза да тудым мыланна конда?”13Тиде кӱштымаш теҥыз вес могырышто огыл, сандене те тыгеат каласен огыда керт: ”Мыланна тиде кӱштымашым колаш да шуктен шогаш манын, кӧ теҥызым вонча да тудым мыланна конда?”14Тиде шомак тендан деке пеш лишне, тудо – тендан умшаштыда да тендан шӱмыштыда, шуктен веле шогыза.15Таче мый тыланда илыш ден суапым але колымаш ден осалым ойырен налаш пуэм.16Мыйын таче пуымо [Господь Юмыдан кӱштымашыже-влакым колышташ], Господь Юмыдам йӧраташ, Тудын корныж дене кошташ, Тудын кӱштымашыже, пунчалже да законжо-влакым шуктен шогаш тӱҥалыда гын, те илаш да шукемаш тӱҥалыда, сеҥен налшаш мландыштыда Господь Юмыда тендам суапландара.17Но те Господь деке тупынь савырнеда, Тудым колыштмым чарнеда да, алгаштарымашыш логалын, вес юмо-влакым шотлаш да нунылан служитлаш тӱҥалыда гын,18мый таче тендам шижтарем: те пытеда! [Господь Юмыдан пуымо] мландыштыже – тудым сеҥен налаш Иордан вес велке вончеда – те кужун илаш огыда тӱҥал.19Мый таче таныклаш кава ден мландым ӱжам: тыланда мый илышым але колымашым, суапландарымашым але каргымашым ойырен налаш пуэнам. Ойырен налза илышым – тунам теат, тендан шочшыда-влакат илаш,20Господь Юмыдам йӧраташ, Тудым колышташ тӱҥалыда, Тудлан ӱшанле лийыда. Тыге ыштен, те Авраам, Исаак да Иаков кугезе кочада-влаклан Господьын пуаш товатлен сӧрымӧ мландыштыже кужун илаш тӱҥалыда».
Institute for Bible Translation, Finland