Зак.уш13
1Тендан коклаште пророк але омым увертарыше еҥ лектеш да палдарыше палым але ӧрыктарыше пашам ончыкташ сӧра,2да ойлымыж семынак палдарыше палыже але ӧрыктарыше пашаже шукталтеш, тыгодым ты еҥ тыланда палыдыме юмо-влак почеш каяш да нунылан кумалаш ӱжеш гын,3тиде пророкым але омым ужмо гоч увертарышым ида колышт. Вет тиде Господь Юмыда тендам терга, Тудым уло шӱмда да уло чонда дене йӧратеда мо манын палынеже.4Господь Юмыда почеш кайыза да Тудын деч лӱдса, Тудын кӱштымашыже-влакым шуктен шогыза да Тудым колыштса, Тудлан служитлыза да ӱшанле кодса.5А тиде пророк але омым увертарыше еҥ пуштмо лийшаш: тудо тендам Господь Юмыда деч кораҥаш ӱжын, Господь Юмыдан каяш кӱштымӧ корныж гыч кораҥдаш тӧчен. А вет Господь тендам Египет гыч луктын, туштыжо те кул лийында. Пытарыза шкендан кокла гыч осалым!6Тыйым изат але шольыч, [ачатын] але аватын эргыже, шке эргыч але ӱдырет, але йӧратыме ватет, але эн лишыл йолташет ”каена, тылат да кугезет-влаклан палыдыме вес юмо-влаклан кумалаш тӱҥалына” манын шолып ӱжеш гын, –7тыйын йырет, тый дечет лишне але тораште, ик мланде тӱр гыч вес тӱр марте илыше калык-влакын юмыштлан кумалаш ӱжеш гын, –8ты еҥын мутшо дене ит келше, тудым ит колышт. Ит чамане тудым, осал пашажым ит шылте.9Пушт тудым! Тудым пушташ манын, ӱмбакше кӱм тый икымше кудалтышаш улат, вара тек моло-влак кудалтат.10Кӱм кышкен, тудым пушт, вет ты еҥ тыйым Господь деч, тыйын Юмет деч, кораҥдаш шонен. А вет Господь тыйым Египет гыч луктын, туштыжо те кул лийында.11Тунам уло Израиль, тидын нерген колын, лӱдеш да тыгай осалым тетла ышташ ок тӱҥал.12Господь Юмыдан тыланда илаш пуымо иктаж-кудо олаштыже тендан калык кокла гычак йӧрдымӧ еҥ-влакын лекмышт да ты олаште илыше-влаклан ”каена да, тыланда палыдыме вес юмо-влаклан служитлаш тӱҥалына” манын, нуным чын корно гыч кораҥдымышт нерген колыда гын,14тиде пашам шымлен лекса – чыла умылен налза, сайын йодыштса. Тиде чыныш лектеш да тендан коклаште тиде йырнык паша чынжымак лийын гын,15ты олаште илыше-влакым керде дене пытарыза. Тиде олам, тушто мо улым, Господьлан надыр шотеш пӧлеклен, пӱтынек пытарыза, вольыкымат керде дене пуштса.16Тушто улшо чыла погым ола капка воктеке чумырыза да олам тиде уло погыж дене пырля йӱлалтыза. Тиде Господьлан, тендан Юмыланда, йӱлалтен пуымаш лиеш. Тек тиде ола курымешлан шалатыме вер семын кодеш да нигунамат угыч чоҥымо огеш лий.17Пытарышаш арвер гыч шкаланда нимомат ида кодо! Тунам Господьын шыдыже пыта: тыланда Тудо порылыкшым ончыкта, тендам чаманен налеш, калыкдам шукемда – тыге Тудо [тыланда ойлен], ача-кочада-влаклан товатлен сӧрен.18Господь Юмыдам те колышташ да Тудын кӱштымашыже-влакым, кудыштым мый кызыт тыланда увертарем, шуктен шогаш, Господь ончылно [поро] да чын пашам ышташ тӱҥалыда гын, тунам чыла тиде лиеш.
Institute for Bible Translation, Finland