Зак.уш12
1Теве могай пунчал ден устав-влакым те Господьын, ача-кочада-влакын Юмыжын, тыланда пуымо мландыште шуктен шогышаш улыда. Мланде ӱмбалне мыняр илаш тӱҥалыда, нуным эре шуктен шогыза.2Поктен колтышаш калык-влакын шке юмыштлан кумалме чыла верыштым пытарыза: кӱкшӧ курыклаште, чоҥгаталаште да кажне ладыра пушеҥге йымалне.3Жертвенникыштым шалатыза, онакӱштым пытарыза, Ашера меҥгыштым йӱлалтыза. Шке ыштыме шояк юмыштым пытарыза, тек нунын лӱмыштымат огыт шарналте.4Господьлан, шке Юмыланда, нунын шке юмыштлан служитлыме семын ида служитле.5Господь Юмыда чыла тукымда кокла гыч иктыжын мландыштыже верым ойырен налеш, тудым шке лӱмжын илыме вержым ышта. Те тушко коштшаш улыда.6Тушко йӱлалтен пуымо пӧлек ден надырдам, лектышдан луымшо ужашыжым, сӧрымӧ надырдам, шке кумылын пуымо пӧлекдам, [татулык надырдам,] шолдыра ден тыгыде вольыкдан икымше шочшо презе ден пачаштым кондыза.7Тушто Господь Юмыда ончылно шке ешда да тарзыда дене кочса, шке кид дене ыштыме пашадан саскажлан куаныза, вет тендам Господь Юмыда суапландарен.8Тушто те кызытсе семын, кузе кажныжлан чынла чучеш, туге ыштышаш огыдал.9Те эше ласкалык верыш, Господь Юмыдан тыланда пуышаш мландышкыже, пурен огыдал.10Но те Иорданым вончеда да Господь Юмыдан пуымо мландыштыже илаш тӱҥалыда. Господь тыланда йыр улшо тушман-влак деч тыныслыкым пуа, да те лӱдыкшӧ деч посна илаш тӱҥалыда.11Тунам Господь Шкаланже верым ойырен налеш, тудым шке лӱмжын илыме вержым ышта. Мом мый [таче] тыланда кӱштем, тушко чыла кондыза: йӱлалтен пуымаш ден надырым, луымшо ужашым, пӧлекым, Господь [Юмыланда] сӧрымӧ чыла эн чапле надырым.12Господь Юмыда ончылно тушто куанен пайремлыза – те, эрге-ӱдырда-влак, пӧръеҥ ден ӱдырамаш кулда-влак да олаштыда илыше левит-влак, кудыштын шке мланде пайышт уке.13Шекланыза, йӱлалтен пуымо надырдам кушан логалын, тушан ида кондо.14Лач тудо верыште, кудым Господь [Юмет] тукымда-влак кокла гыч иктыжын мландыштыже ойырен налеш, йӱлалтен пуымо надырет кондо да чыла, мом мый [таче] кӱштенам, шуктен шого.15Кочмет шумо годым тый чыла илыме верыштет, вольыкым шӱшкылын, шылжым кунар шонет – кузе тыйым Господь вольык дене суапландарен – кочкын кертат. Тиде шылым кеч-кӧ – аруат, ару огыл еҥат – ирказа але пӱчӧ шыл семын кочкын кертеш.16Лач вӱрым ида коч: тудым вӱд семын мландышке йоктарыза.17Илыме верыштет шке шурнетын, йошкар аракатын да олив ӱетын луымшо ужашыштым, тыгак шолдыра да тыгыде вольыкетын икымше шочшо презе ден пачаштым, Юмылан сӧрымӧ кеч-могай надырым, шке кумылын пуымо пӧлекым да моло пӧлекым тылат кочкаш ок лий.18Чыла тидым Господь Юмет ончылно, Тудын ойырен налме верыште [веле] коч. Тек тый денет пырля эргыч ден ӱдырет-влак, пӧръеҥ ден ӱдырамаш кулет-влак, тыгак тыйын олаштет илыше левит [ден ӧрдыжъеҥ]-влак кочкыт. Шке пашатын саскажлан куанен, Господь Юмет ончылно пайремле.19Ончо, илыме чыла кечыштет левит-влак нерген ит мондо.20Господь, тыйын Юмет, мландетым кумдаҥдаш сӧрен. Кунам Господь сӧрымыжым шукта, а тыйын шылым кочмет шуын колта, да тый ”шылым кочшаш ыле” манын каласет – тунам шонымет семынак шылым кочкын кертат.21Господь Юметын шке лӱмжылан илаш ойырен налме верже тый дечет пеш мӱндырнӧ лиеш гын, тый кӱштымем семынак, Господь [Юметын] пуымо шолдыра але тыгыде вольыкшым шӱшкылын, шылым шке илыме верыштет мыняр шонет, тунар кочкын кертат.22Тиде шылым ирказа але пӱчӧ шыл семын коч, тудым ару да ару огыл еҥат кочкын кертыт.23Но шеклане – вӱрым ит коч, вет вӱр – тиде чон: тый тудым шыл дене пырля ит коч.24Ит коч вӱрым, тудым вӱд семын мландышке йоктаре.25Ит коч вӱрым, тунам тый денет да ончыкылык тукымет дене [курым-курымеш] сай лиеш, вет Господь шинча ончылно тиде [поро] да чын лиеш.26А святой пӧлек ден сӧрымӧ надыретым Господь [Юметын] ойырен налме верышкыже, [Тудын лӱмжым ӱжын кумалме верышке,] кондышаш улат.27Йӱлалтен пуымо надыретым – тудын шыл ден вӱржымат – Господь Юметын жертвенникешыже йӱлалте. Но моло надырын вӱржым Господь Юметын жертвенникышкыже йоктарыман, а шылым кочкын кертат.28Шеклане, мыйын пуымо чыла кӱштымашем шуктен шого. Господь Юмет ончылно поро да чын пашам ышташ тӱҥалат гын, тунам тый денет да ончыкылык тукымет дене курым-курымеш сай лиеш.29Господь Юмыда тендан чурий ончыч калык-влакым пытара, те кызыт нунын мландышкышт каеда да нуным поктен колтеда. Кунам те тиде мландым поген налыда да тушто илаш тӱҥалыда,30кунам нине калык пытарыме лийыт, шекланыза – нунын почеш каен, оптышыш ида логал. Нунын юмышт нерген ида йодышт. ”Нине калык шке юмыштлан кузе кумалыныт, мыят тыгак ышташ тӱҥалам” манын, ида ойло.31Господьлан, шке Юмыланда, нунын шке юмыштлан служитлымышт семын ида служитле. Вет нуно шуко тыгайым ыштат, мо деч Господь йырна, мо Тудлан ужмышудымо. Нуно шке юмыштлан надыр шотеш эсогыл шке эрге-ӱдырыштым йӱлалтен пуат.32Ончыза, мыйын кӱштымем чыла шуктен шогыза. Тушко нимомат ида ешаре, тушечын нимомат ида кораҥде.
Institute for Bible Translation, Finland