2 Куг7
1Кугыжан шке полатыштыже илаш тӱҥалмекше, Господь тудлан йыр улшо тушманже-влак деч тыныслыкым пуэн.2Тунам кугыжа пророк Нафанлан каласен: «Теве мый кедр дене чоҥымо пӧртыштӧ илем, а Юмын шондыкшо – куэм дене ыштыме омашыште».3Кугыжалан Нафан каласен: «Мом шонен пыштыметым ыште – Господь пеленет лиеш».4Но тиде йӱдымак Нафанлан Господь деч шомак лийын:5«Кай, мыйын Давид тарземлан каласе: ”Господь тыге ойла: тый мо Мылам илаш пӧртым чоҥет?6Тудо жап гыч, кунам Мый израиль эрге-влакым Египет гыч луктынам, тачысе кече марте пӧртыштӧ илен омыл – кусныл коштмо годым омашыште да скинийыште лийынам.7Кушто гына Мый израиль эрге-влак дене лийын омыл, Мыйын калыкемым кӱташ шогалтыме тукымвуй-влак деч, ’Молан Мыланем кедр пӧртым огыда ыште’ манын, иктаж гана йодынам мо?”8Каласе Мыйын Давид тарземлан: ”Господь Саваоф тыге ойла: ’Израиль калыкемын вуйлатышыжым ышташ манын, Мый тыйым шорыкым кӱтымӧ вер гыч налынам.9Кушко гына каен отыл, эре пеленет лийынам, ончылнет чыла тушманетым пытаренам. Мый тыйын лӱметым чапландарем, тудо тӱнясе улшо эн лӱмлӧ еҥ-влакын лӱмышт гай кугу лиеш.10Шке Израиль калыкемлан Мый верым ойыренам, тушан тудын вожшым пеҥгыдемдем. Тудо шке верыштыже тыныслын илаш тӱҥалеш. Израиль калыкемлан судья-влакым шогалтыме годсо жап семын осал еҥ-шамыч тудым тетла шыгыремдылаш огыт тӱҥал. Чыла тушманет деч Мый тылат тыныслыкым пуэм. Мый, Господь, тыланет ойлем: тый дечет Мый кугыжа тукымым шуем.12Жап шумеке, тыят шке ача-кочат-влак дене пырля кияш тӱҥалат. Тунам Мый тыйын урлыкет гыч лекшым кугыжалан шогалтем да тудын кучемвийжым пеҥгыдемдем.13Тудо Мыйын лӱмемлан пӧртым чоҥа, да Мый тудын кугыжа престолжым курымешлан пеҥгыдемдем.14Мый тудлан Ачаже лиям, а тудо Мылам эргым лиеш. Сулыкым ышта гын, Мый тудым, айдеме кид дене розгылен, мут кучаш шогалтем.15Но тудын деч шке порылыкем Саул деч налме семын ом нал, вет тыйым кугыжалан шогалтыме деч ончыч Мый Саулым престол гыч кораҥденам.16Тыйын тукымет да кугыжа кучемвиет Мыйын чурием ончылно курымеш чоткыдо лийыт, тыйын престолет курымеш пеҥгыдын шогаш тӱҥалеш’”».17Нафан чыла тиде мутым да ужмо кончымашыжым Давидлан каласен.18Тунам Давид кугыжа каен, Господь чурий ончылно каласен: «Господь Юмем! Кӧ мый улам да мо мыйын тукымем – Тый мыйым тынар кӱшкӧ нӧлталынат?19Но тидат, Господь Юмем, Тыйын шинча ончылнет шагал лийын – Тый эше шке тарзетын тукымжын ончыкылыкшо нерген увертаренат. Вет тиде – айдеме-влакын йӱлашт, Господь Юмем! 20Мом эше Тыланет Давид каласен кертеш? Тый шке тарзетым палет, Господь Юмем!21Шке шомакет ден кумылет почеш Тый тыгай кугу пашам ыштет да тидым ышташ шонымет нерген шке тарзетлан почат.22Кӱдыратле улат, Господь Юмем! Уке Тый гает весе, Тый дечет моло вес Юмо уке! Чыла колмына тидым пеҥгыдемда.23Тыйын Израиль калыкет гай могай вес калык уло? Мландымбалне тыгай калык икте веле – тудым, сулен налын, шке калыкетым ышташ да шке лӱметым чапландараш манын, Тый тудын деке толынат. Шке калыкет ончылно кӱдыратле да лӱдмашан паша-влакым ыштенат: тудым, сулен налын, Египет гыч луктынат, вес калык-влакым да нунын юмыштым поктен колтенат.24Тый чынжымак Израильым, шке калыкетым, курымешлан шкендыным ыштенат! Тый, Господь, тудын Юмыжо лийынат.25А ынде, Господь Юмем, шке тарзет да тудын тукымжо шотышто сӧрыметым шукто, каласыметым ыште.26Тек Тыйын лӱмет курымешлан чапландарыме лиеш, тек ойлат: ”Господь Саваоф – Израильын Юмыжо!” Давид тарзетын тукымжо Тыйын ончылнет пеҥгыдын шогыжо!27Господь Саваоф, Израильын Юмыжо! Тый шке тарзетлан ”Мый тый дечет кугыжа тукымым ыштем” манынат, садлан мый Тылат тыге кумалаш тоштым.28Господь Юмем! Тый Юмо улат, шомакет-влак ӱшанле улыт, да Тый шке тарзетлан тыгай суапым увертарышыч!29А кызыт Тыйым йодам – суапландаре тарзетын тукымжым, тек тудо эре Тыйын чуриет ончылно лиеш. Вет Тый, Господь Юмем, тидын нерген увертаренат. Курымешлан [Тыйын ончылнет лияш манын,] тек тарзетын тукымжо ӱмбалне Тыйын суапландарымашет лиеш!»
Institute for Bible Translation, Finland