2 Куг6
1Давид Израильын эн сай сарзыж-влакым, кумло тӱжем еҥым, угыч поген.2Юмын шондыкым – херувим-влак ӱмбалне шинчыше Господь Саваофын лӱмжӧ дене лӱмдымӧ шондыкым – Иуда мландысе Ваала ола гыч кондаш манын, Давид уло калыкше дене тушко каен.3Нуно Юмын шондыкым Авинадавын кӱкшакаште шогышо суртшо гыч налыныт да у орваш шынден наҥгаеныт. Орвам Авинадавын Узза ден Ахио эргыже-влак вӱден ошкылыныт.4Тыге нуно Юмын шондыкым шындыман орвам Авинадавын суртшо гыч наҥгаеныт. [Господьын] шондыкшо ончыч Ахио каен.5А Давид ден израиль эрге-влак Господь ончылно лира, кӱсле, тимпан, ширгун да кимвал дене шоктеныт. Нине семӱзгар-влак кипарис дене ыштыме лийыныт.6Кунам нуно Нахонын идымже дек лишемыныт, [шондыкым кучаш манын,] Узза кидшым шуялтен, вет ӱшкыж-влак шондыкым изиш гына тӱрын колтен огытыл.7Тыге ышташ тоштмыжлан Господь шыдешкен: Уззам тушанак пуштын, да тудыжо Юмын шондыкшо воктене колен.8Господьын Уззам пытарымыжлан Давид аптыранымашыш пурен. Тиде вер кызытат «Уззан пытымашыже» маналтеш.9Тиде кечын Давидым Господь деч лӱдмаш авалтен. Тудо каласен: «Кузе мый Юмын шондыкым шке декем наҥгаем?»10Господьын шондыкшым шкеж деке, Давид-Олаш, наҥгаяш шонымыжым вашталтен да тудым Геф гыч улшо Овед-Едомын суртышкыжо намиен.11Тушто Господьын шондыкшо кум тылзе лийын. Господь Овед-Едомым да тудын уло ешыжым суапландарен.12Давид кугыжалан увертареныт: «Юмын шондыклан кӧра Господь Овед-Едомын ешыжым да чыла мо улыжым суапландарен». Тунам Давид каен да Овед-Едомын суртшо гыч Юмын шондыкым кугу куан дене Давид-Олаш наҥгаен.13Кунам Господьын шондыкшым нумалше-влак куд ошкылым ыштеныт, Давид надырлан ӱшкыж ден ӧрдыктарыме презым конден.14Йытын ефодым чийыше Давид уло кертмыж дене Господь ончылно куштен.15Тыге Давид да уло Израиль калык Юмын шондыкшым кугу йӱкын куанен, пучым пуалтен наҥгаеныт.16Кунам Господьын шондыкшо Давид-Олашке пурен, Мелхола – Саул ӱдыр – окна гыч ончен шоген. Господь ончылно тӧрштылын да пӧрдын куштышо Давидым ужмеке, Мелхола тудым шотлымыжым чарнен.17Господьын шондыкшым конденыт да Давидын лӱмынак ыштыме скинийыште шке верышкыже шынденыт. Давид Господьлан йӱлалтен пуымо надыр ден татулык надырым конден.18Йӱлалтен пуымо надыр ден татулык надырым кондымеке, Давид Господь Саваофын лӱмжӧ дене калыкым суапландарен.19Вара уло калыклан, погынышо чыла израиль еҥлан, [Дан гыч Вирсавий марте] – пӧръеҥланат, ӱдырамашланат – кажныжлан ик сукыр киндым, кӱктымӧ шыл моклакам да изюм чумыркам пуэден. Тидын деч вара чыланат шке мӧҥгышкышт каеныт.20Шке ешыж дене саламлалташ манын, Давид мӧҥгыжӧ пӧртылын. Тудын ваштарешыже Саулын Мелхола ӱдыржӧ лектын. Тудо [Давид дене саламлалтын] да каласен: «Израильын кугыжаже таче шкенжым пеш чот ончыктыш – шке тарзыж-влакын кул ӱдырамашышт ончылно ала-могай окмак семын чара тӧрштыльӧ!»21Давид Мелхолалан вашештен: «Господь ончылно [кушташ тӱҥалам. Моктымо лийже Господь!] Тудо тыйын ачат ден тудын тукымжо деч мыйым сайраклан шотлен да Шкенжын Израиль калыкшын вуйлатышыжлан шогалтен. Господь ончылно мый ончыкшымат мурен кушташ тӱҥалам.22Мый чапем эшеат волташ, шкемым эшеат ӱлык шындаш тӱҥалам. А тыйын ойлымо кул ӱдырамашет-влаклан мый пагалыме еҥак кодам!»23Мелхолан, Саул ӱдырын, пытартыш кечыже марте шочшыжо лийын огыл.
Institute for Bible Translation, Finland