2 Куг8
1Тидын деч вара Давид филистим-влакым кырен шалатен да шке кид йымакше налын. Тудо нунын деч Мефег-Гааммам шупшын налын.2Давид тыгак моав-шамычым кырен шалатен. Тудо нуным мландымбак пыштен да кандыра дене висен. Висыме кажне кок кутышым пушташ кӱштен, а ик кутышым илышым коден. Тыге моав-влак Давидын тарзыже лийыныт да тудлан йозакым тӱленыт.3Вара Давид Цован кугыжажым – Адраазарым, Рехов эргым – кырен шалатен. Тудыжо Евфрат эҥер воктенысе мландым угыч кид йымакше налаш кая улмаш.4Давид тудын деч тӱжем шымшӱдӧ имнешкым да коло тӱжем йолешке сарзым поген налын. Тудо орван имне-влакын шӧныштым пӱчкын, [шкаланже] шӱдӧ имньым веле коден.5Адраазарлан, Цован кугыжажлан, полшаш Дамаск гыч сириян-влак толыныт. Но Давид нунымат кырен шалатен. Чылаже коло кок тӱжем сириян колен.6Давид шке орол отрядшым Сирийысе Дамаскыште шогалтен. Сириян-шамыч Давидын тарзыже лийыныт да тудлан йозакым тӱлаш тӱҥалыныт. Кушко гына Давид каен, Господь чыла вере тудлан сеҥымашым конден.7Давид Адраазарын тарзыж-влак деч шӧртньӧ авыртыш-шамычым налын да нуным Иерусалимыш конден. [Нуным вара египет кугыжа Сусаким налын. Тидыже тудын Иерусалим ӱмбак кержалтмыж годым, Соломонын Ровоам эргыже кугыжаланыме жапыште, лийын.]8А Адраазарын Бефа ден Берофай олалаштыже Давид кугыжа пеш шуко тойым руалтен налын. [Тудын дене Соломон варажым кугу той чаным, меҥге-влакым, изи чан-шамычым да тӱрлӧ ате-ӱзгарым ыштен.]9Фой, Емафын кугыжаже, колын: Адраазарын сарзывийжым Давид кырен шалатен.10Давид кугыжам саламлаш да Адраазарым кырен шалатымыжлан таушташ манын, тудо Иорам эргыжым колтен. Фой Адраазар дене кредал илен улмаш. Иорам пеленже ший, шӧртньӧ да той дене ыштыме арвер-влакым намиен.11Давид кугыжа чыла тидым Господьлан святитлен пуэн. Кырен шалатыме моло калык деч – сириян, моав, аммон, филистим да амалик-влак деч – поген налме ший ден шӧртньӧ денат тудо тыгак ыштен. Цован Адраазар кугыжаж деч, Рехов эрге деч, налмымат тудо Господьлан пӧлеклен.13Шинчалан лапверыште латкандаш тӱжем идумейым кырен шалатымеке, Давидын лӱмжӧ чапланен.14Идумейыште тудо шке орол отрядшым шогалтен. Нуно Идумей мучко шогеныт, да идумей калык тудын тарзышкыже савырнен. Давид кушко гына каен, Господь тудлан чыла вере сеҥымашым конден.15Давид пӱтынь Израиль дене кугыжаланен, шке калыкше коклаште чын суд ден чынлыкым ыштен.16Иоав, Саруян эргыже, тӱҥ сарзывуй лийын, Иосафат, Ахилуд эрге – курымсерышым возышо.17Садок, Ахитув эрге, да Ахимелех, Авиафар эрге, иерей лийыныт. Сераий – возкалыше,18Ваней, Иодай эрге, хелефей ден фелефей-шамычын вуйлатышышт лийын. Давидын эргыже-влак кугыжан полатысе тӧра лийыныт.
Institute for Bible Translation, Finland