2 Куг18
1Давид пеленже улшо еҥ-влакым ончен лектын да нуным вуйлаташ тӱжемвуй ден шӱдывуй-шамычым шогалтен.2Еҥ-влакым тудо кум тӱшка дене колтен. Ик тӱшкажым Иоав вуйлатен, кокымшым – Авесса, Саруян эргыже, Иоавын шольыжо, а кумшым – Геф гычын Еффей. Кугыжа сарзе-влаклан каласен: «Мый тендан дене пырля каем».3Но нунышт вашештеныт: «Тыланет каяш ок кӱл. Ме мӧҥгеш куржына гын, тидым нигӧ шотыш ок нал. Мемнан кокла гыч пелыже колат гын, тидланат тӱткыш ок лий. А тыйын илышет лу тӱжем еҥын илышыжым шога. Сандене тый мыланна ола гыч полшен шогет гын, сайрак лиеш».4Кугыжа вашештен: «Йӧра, каласымыда семынак ыштем». Сарзе-влакын шӱдӧ да тӱжем еҥ дене лектын кайымышт годым кугыжа капка воктене шоген.5Иоавлан, Авессалан да Еффейлан тудо тыге кӱштен каласен: «Мыланем кӧра Авессалом дене лыжгарак лийза». Сарзывуй-влаклан Авессалом шотышто кугыжан кӱштен ойлымыжым сарзе-шамыч чылан колыныт.6Сарзе-влак израильтян-шамыч ваштареш лектыныт, да Ефрем чодыраште кредалмаш тӱҥалын.7Давидын еҥже-влак израиль калыкым кырен шалатеныт. Тиде кечын пеш шукын пытеныт, чылаже коло тӱжем [еҥ] колен.8Кредалмаш тусо уло кундемым авалтен. Тиде кечын чодыра еҥ-влакым керде деч шукырак пытарен.9Авессалом вучыдымын Давидын еҥже-влакым вашлийын, тыгодым тудо мул ӱмбалне шинчен. Кунам мулжо кугу тумын укшыжо йымак кудал пурен, Авессалом ӱпшӧ дене укш коклаш пижын шинчын да кава ден мланде коклаште кечалтын, а мул умбакыла кудалын.10Тидым ик еҥ ужын да Иоавлан каласен: «Мый тумышто кечыше Авессаломым ужым».11Тидым каласыше еҥлан Иоав манын: «Тый тудым ужынат? Молан тушанак пуштын отыл? Мый тылат лу сикль шийым да ӱштым пуэм ыле».12Тудыжо Иоавлан тыге вашештен: «Тӱжем сикль шийым пуат гынат, мый кугыжа эрге ӱмбак кидемым ом нӧлтал ыле. Вет мемнан ончылнак кугыжа тылат, Авессалан да Еффейлан ”Мыланем кӧра Авессалом дене лыжгарак лийза” мане.13Мый вес семын ыштем гын, шке илышемлан лӱдыкшым кондем ыле. Вет кугыжа тидын нерген садак пален налеш ыле, а тый мыйын велке от шогал ыле».14Тунам Иоав каласен: «Мом мый тый денет мутайкален шогем!» Тудо кум умдым налын да нуным Авессаломын оҥышкыжо керын. Тунам тудыжо тумышто эше илыше кечен улмаш.15Иоавын саргурал нумалше лу еҥже Авессаломым авырен шогалын да шуралтен пуштын.16Тидын деч вара Иоав пуч дене пуалтен. Сарзе-влак Израильым поктен кайымыштым чарненыт да мӧҥгеш пӧртылыныт, вет Иоав нуным чарен шогалтен.17Авессаломын капшым чодырасе келге вынемыш шуэныт, ӱмбакыже кӱм кышкен, кугу орам ыштен шынденыт. А израильтян-влак шке мӧҥгышкышт куржын пытеныт.18Авессалом эше илымыж годымак Кугыжан лапверыште шкаланже чапкӱм шогалтен улмаш. Тудо тыге шонен: «Лӱмем арален кодаш мыйын эргым уке». Чапкӱм тудо шке лӱмжӧ дене лӱмден. Таче кече мартеат тудо «Авессаломын чапкӱжӧ» маналтеш.19Ахимаас, Садок эрге, Иоавлан каласен: «Мый куржам да кугыжалан ”Господь чын судым ыштен, тыйым тушман кид деч утарен” манын увертарем».20Но Иоав тудлан вашештен: «Таче уверым от наҥгай. Тый вес гана кает, таче огыл, вет кугыжан эргыже колен».21Иоав ик эфиоплан каласен: «Кай, кугыжалан мом ужметым увертаре». Эфиоп вуйжым савен да куржын.22Но Ахимаас, Садок эрге, Иоавлан адакат каласен: «Кеч-мо лийже, но эфиоп почеш мыят куржнем». Иоав вашештен: «Эргым, молан тыланет куржаш? Тый поро уверым от кондо».23«Тыге гынат, мый куржам», – [каласен Ахимаас]. Тунам [Иоав] каласен: «Курж». Ахимаас лапверысе корно дене куржын да эфиопым ончылтен каен.24Давид тунам ола пырдыжын кӧргӧ да тӱжвал капкаже-влак кокласе пӧлемыште шинчен. Орол капка леведыш ӱмбак кӱзен. Тудо вуйжым нӧлталын да ик еҥын куржын толмыжым ужын.25Орол кугыжам ӱжын да тидын нерген увертарен. «Тудо шкетын гын, тугеже уверым конда», – каласен кугыжа. Саде еҥ чакрак да чакрак лишемын.26Орол куржшо вес еҥымат ужын. «Эше икте куржеш!» – капка дек шогалтыме еҥлан тудо кычкыралын. «Тидат уверым конда», – каласен кугыжа.27«Икымше еҥжын куржмыжо Ахимаасын, Садок эргын, гай коеш», – манын орол. «Тудо сай еҥ, – каласен кугыжа. – Увержат сай лийшаш».28Толын шумеке, Ахимаас кугыжалан кычкыралын: «Тыныс лийже!» Тудо кугыжалан мланде марте вуйжым савен да каласен: «Господь, тыйын Юмет, моктымо лийже! Кугыжа озам ваштареш шогалше еҥ-влакым Тудо кидышкет пуэн!»29«Авессалом дене чыла сай?» – йодын кугыжа. «Кугыжан тарзыже Иоавын мыйым тышке колтымыж годым пеш кугу пуламыр ыле. А мо тушто лийын, мый ом пале», – Ахимаас вашештен.30«Ӧрдыжкӧ шогал да тушто вучалте», – каласен кугыжа. Тудыжо кораҥ шогалын.31[Ахимаас деч вара] эфиоп толын шуын. «Мыйын кугыжа озамлан сай увер! – тудо каласен. – Тыйын ваштареш шогалше-влакын кидышт деч утарымыж дене Господь таче чын судым ыштен».32«Авессалом дене чыла сай?» – кугыжа йодын. «Рвезе дене мо лийын, кугыжа озамын чыла тушманже да тудын ваштареш шогалше-влак денат тек тидак лиеш», – вашештен эфиоп.33Кугыжа чытырналт каен. Тудо капка ӱмбалнысе пӧлемыш каен да тушто шортын. Тушко кӱзышыжла, тыге ойлен: «Эргым, Авессалом эргым! Мыйын Авессалом эргым! Тыйын олмешет мылам колаш лийже ыле, Авессалом! Эргым, мыйын эргым!»
Institute for Bible Translation, Finland