2 Куг17
1Ахитофел Авессаломлан каласен: «Латкок тӱжем еҥым ойырен налын, таче йӱдым Давидым поктен кайынем.2Улнышо да вийдыме улмыж годым ӱмбакше кержалтам да лӱдыктем. Пеленже улшо еҥ-влак чыланат куржын пытат. Шкет кодшо кугыжам пуштам3да уло калыкым тылат пӧртылтем. Вет тый лач ик айдемын чонжым кычалат, а уло калык тыныслыкым налеш».4Тыгай шомак Авессаломлан да Израильын кугуракше-влаклан келшен.5Но Авессалом каласен: «Архи тукым гыч Хусийым ӱжын кондыза. Тудын мом каласымыжым колыштына».6Хусий Авессалом деке толын. Авессалом тудлан каласен: «Теве мом Ахитофел темла. Тудын шомакше почеш ышташ мо? Уке манат гын, шке шоныметым каласе».7Хусий Авессаломлан вашештен: «Тиде гана Ахитофел уда каҥашым пуэн».8Вара шке мутшым умбакыже шуен: «Тый вет шке ачатым да тудын еҥже-влакым палет. Нуно патыр, игыж-влак деч посна кодымо ава маска гай ажгыныше [да ир сӧсна гай осал] улыт. Тидын деч посна тыйын ачат тале сарзе, тудо калык дене пырля малаш ок тӱҥал.9Кызыт тудо иктаж-могай курыкпомышыш але вес верыш шылын шинчын. Икымше кредалмаште тыйын еҥет-влак кокла гыч икмыняр ужашыже пыта гын, тидын нерген колшо-влак каласат: ”Авессалом почеш кайыше-шамычым кырен шалатеныт”.10Тунам лев гай шӱман эн лӱддымӧ еҥат лӱдмыж дене лунчырга. Вет уло Израиль пала: тыйын ачат – тале сарзе, да тудын пелен лӱддымӧ еҥ-влак улыт.11Теве мыйын каҥашем: тек теҥыз серысе ошма пырче наре шуко чотан пӱтынь израиль сарзывий, Дан гыч Вирсавий марте, тый декет погына. Нуным вӱден кайыше тый лият.12Тунам Давид кеч-кушто лийже, ме тудын ваштарешыже каена да мланде ӱмбак лупс вочмо семын ӱмбакше кержалтына. Тудын еҥже-влак кокла гыч иктат илыше ок код.13Тудо иктаж-могай олаш чакнен куржеш гын, уло Израиль тиде ола деке кандырам конда. Ме олам эҥерыш шупшын волтена, тудын деч ик кӱат ок код».14Авессалом да пӱтынь Израиль каласеныт: «Архи тукым Хусийын каҥашыже Ахитофелын деч сайрак!» Ахитофелын пуымо каҥашыжым укеш лукташ да Авессаломлан азапым кондаш манын, Господь тыге ыштен.15Садок ден Авиафар иерей-влаклан Хусий каласен: «Авессалом ден израиль кугурак-влаклан Ахитофел тыгай каҥашым, а мый теве тыгайым пуэнам.16Сандене кызытак Давидлан увертарыза: тиде йӱдым ир мландыште эҥер гоч вончымо вер дене ынже код, вашкерак вес велыш вончыжо, уке гын кугыжа да тудын еҥже-влак чыланат пытат».17Ионафан ден Ахимаас Рогель памаш воктене вучен шогеныт. Тушко тарзе ӱдырамаш толын да нунылан уверым ойлен, вара нунышт каеныт да тидым Давид кугыжалан каласкаленыт. Олаште нуным нигӧ ужшаш огыл улмаш.18Но ты гана нуным ик рвезе ужын да тидын нерген Авессаломлан каласен. Ионафан ден Ахимаас тушечын пеш вашке каеныт да Бахуримыш ик еҥын пӧртшӧ дек толыныт. Тудыжын кудывечыштыже таве лийын. Нине еҥ-влак таве кӧргыш шылын шинчыныт.19Пӧртын озаватыже таве рож ӱмбаке леведышым шарен, а ӱмбакше шӱрашым шавалтен, сандене таве улмым ужын огытыл.20Тудын пӧртышкыжӧ Авессаломын еҥже-влак толыныт да йодыныт: «Ахимаас ден Ионафан кушто улыт?» Ӱдырамаш вашештен: «Нуно эҥерым вончен каеныт». Авессаломын еҥже-влак нуным кычалыныт, но муын огытыл да Иерусалимыш пӧртылыныт.21Нунын кайымекышт, Ахимаас ден Ионафан таве гыч лектыныт да Давид кугыжа дек миен каласеныт: «Тарваныза да писынрак эҥерым вончыза! Ахитофел тендан шотышто теве тыгай каҥашым пуэн...»22Давид ден тудын еҥже-влак тарваненыт да Иорданым вонченыт. Волгыжмешке, Иорданым вончыдымо ик еҥат кодын огыл.23Каҥашыжым шотыш налдымым ужын, Ахитофел осёлжым ӧртньӧрлен да мӧҥгыжӧ, шке олашкыже, каен. Пӧртшӧ шотышто тудо кӱштымашым коден да пикталт колен. Тудым ачажын шӱгарешыже тоеныт.24Давид Маханаимыш толын, а Авессалом израильтян-влак дене Иорданым вончен.25Авессалом Иоав олмеш сарзывуйлан Амессайым шогалтен. Амессай Изреель гыч улшо Иеферын эргыже лийын. Аваже тудын Авигея, Наасын ӱдыржӧ, Иоавын Саруя аважын шӱжарже, лийын.26Израильтян-влак да Авессалом стан дене Галаад мландеш шогалыныт.27Кунам Давид Маханаимыш толын, тушко Сови, Аммонысо Равва гыч Наас эрге, тыгак Ло-Девар гыч Махир, Аммиэл эрге, да Роглим гыч Верзеллий, галаад калыкын эргыже, толыныт.28Нуно [шарен ямдылыме] лу вакшышым, [лу] кӱмыжым да шун ате-влакым конденыт. Давид ден тудын еҥже-шамычлан тыгак шыдаҥым, шожым, ложашым, яшмыкпурсам, кугупурсам, пуштылмо пырчым, мӱйым, торыкым, шорык-влакым, ушкал шӧр гыч ыштыме сырым кочкашышт конденыт. Нуно ойленыт: «Ир мландыште еҥ-влак шуженыт, ноеныт да нунын йӱмышт шуэш».
Institute for Bible Translation, Finland