2 Куг16
1Кунам Давид курык вуй гыч волаш тӱҥалын, тудо Мемфивосфейын Сива тарзыжым вашлийын. Тудыжо кок осёл дене толын, нунын тупыштышт кокшӱдӧ кинде, шӱдӧ чумырка изюм, шӱдӧ чумырка смоква да ик шувыш йошкар арака лийыныт.2Кугыжа Сива деч йодын: «Тидым молан конденат?» Сива вашештен: «Осёл-влак – кугыжан ешыжлан, шинчын кошташышт, кинде ден саска – тарзе-влаклан кочкашышт, а йошкар арака – ир мландыште ярныше-шамычлан йӱашышт».3Кугыжа йодын: «А кушто озатын уныкаже?» Сива вашештен: «Иерусалимыште кодын. Ынде израиль калык мылам кочамын кугыжа кучемвийжым пӧртылта манеш тудо».4Тунам кугыжа Сивалан каласен: «Чыла, мо Мемфивосфейын лийын, ынде тыйын лиеш». Вуйжым савен, Сива вашештен: «Тек мый кугыжа озамын поро кумылжым сулен налам!»5Кунам Давид кугыжа Бахурим деке миен шуын, тушечын Семей лӱман еҥ лектын. Тудо Саулын родо-тукымжо, Геран эргыже, лийын. Семей ошкылшыла шудалын,6[кугыжан] пурла да шола могырым тале сарзе-влак улмым ончыде, Давид да тудын тарзыже-шамыч ӱмбаке кӱм кышкен.7Семей тыге шудалын ойлен: «Кай тышеч! Кай тышеч, пуштшо да йӧрдымӧ айдеме!8Саул тукым вӱрым йоктарыметлан Господь тылат ӱчым шуктен! Тый Саулын престолжым налынат, но ынде Господь кугыжанышым Авессалом эргычын кидышкыже пуэн. Тый вӱр йоктарыше улат, сандене кызыт ойгыш логалынат!»9Авесса, Саруян эргыже, кугыжалан каласен: «Мом тиде колышо пий мыйын кугыжа озамым шӱктара? Мый каем да тудын вуйжым руал шуэм!»10Но кугыжа каласен: «Тиде тендан пашада огыл, Саруян эргыже-влак! [Кораҥза тудын деч,] тек шӱктара. Вет Давидым шудалаш тудлан Господь кӱштен. Сандене ”Молан тый тыге ыштет?” манын тудлан кӧ каласен кертеш?»11Авесса ден чыла тарзыжлан Давид тыге каласен: «Шке шочмо эргым мыйым пушташ кычалеш гын, Вениамин тукым еҥже деч мом вучыман? Кодыза тудым, тек шудалеш, вет тыге ышташ тудлан Господь кӱштен.12Ала Господь мыйын мыскылалтмем ужеш да тиде шудалмылан порылык дене пӧртылта».13Давид ден тудын еҥже-влак шке корнышт дене каеныт, а Семей воктенышт курык тайыл дене шудалын ошкылын да Давид могырыш кӱ ден пуракым кышкен.14Кугыжа да тудын еҥже-влак шонымо верышкышт чот нойышо толын шуыныт да тушан каналташ шогалыныт.15Авессалом да уло израиль калык тиде жапыште Иерусалимыш толыныт. Авессалом дене пырля Ахитофел лийын.16Тунам Авессалом деке Архи тукым гыч Хусий, Давидын йолташыже, толын да каласен: «Эсен лийже кугыжа, эсен лийже кугыжа!»17Авессалом Хусийлан вашештен: «Йолташетлан ӱшанле улметым тыге ончыктет мо? Мо тудын дене пырля каен отыл?»18Хусий Авессаломлан каласен: «Уке, кӧм Господь да тиде калык, уло Израиль ойырен – мый тудын почеш каем да тудын дене кодам.19Кӧлан мый служитлаш тӱҥалам? Тудынак эргыжлан огыл мо? Кузе мый ачатын тарзыже лийынам, тыгак тылат тарзыланаш тӱҥалам».20Авессалом Ахитофеллан каласен: «Умбакыже мом ышташ – каҥашым пу».21Ахитофел Авессаломлан каласен: «Ачатын полатшым ончаш кодымо кулватыж-влак дене мален лек. Тунам уло Израиль тыйын шке ачатлан ужмышудымо лиймет нерген колеш, да тыйын могырыштет улшо еҥ-влак вийым налыт».22Авессаломлан полат леведыш ӱмбалне омашым шынденыт. Тушто уло Израиль шинча ончылно Авессалом ачажын кулватыж-влак деке пурен.23Ахитофелын пуымо каҥашыже-влак тудо жапыште Юмо деч йодмо каҥаш семын шотлалтыныт. Ахитофелын кеч-могай каҥашыжым Давидат, Авессаломат тыге акленыт.
Institute for Bible Translation, Finland