2 Куг15
1Тидын деч вара Авессалом шкаланже чапле орвам, имне-влакым да оролен коштшо витле еҥым налын.2Тудо эрден эр кынелын, ола капка воктенысе корно дек шогалын да ӱчашымашым лукшо йодыш дене кугыжа деке судыш кайыше кажне еҥым шкеж деке ӱжын шоген. Авессалом тудын деч йодын: «Тый могай ола гыч улат?» Кунам тудыжо «Тыйын тарзет Израильын тыгай-тыгай тукымжо гыч» манын вашештен,3Авессалом тудлан тыге ойлен: «Тыйын пашат поро да чын, но кугыжа дене тыйым колыштшо нигӧ уке».4А вара ешарен: «Эх, тиде мландыште мыйым судьялан шогалтышт ыле! Кажне еҥ ӱчашымашым лукшо йодышыж дене мый декем толеш ыле, да мый тудын пашажым чын лончылем ыле».5А кунам иктаж-кӧ тудлан вуйжым савалташ лишемын, Авессалом кидшым шаралтен, тудым ӧндалын да шупшалын.6Кугыжа дек судыш толшо кажне израиль еҥ дене Авессалом тыге ыштен. Тыге тудо нунын шӱмыштым чоян шкеж велке савырен.7Нылле ий эртымеке, Авессалом кугыжалан каласен: «Мый Хевроныш кайынем да Господьлан сӧрымӧ мутем шуктынем.8Сирий мландысе Гесурышто илымем годым мый, тыйын тарзет, сӧрымашым пуэнам: Господь мыйым Иерусалимыш пӧртылта гын, Тудлан надырым кондем».9«Тыныс дене кай», – каласен кугыжа. Тыге Авессалом Хевроныш каен.10Чыла израиль тукымыш тудо шке еҥже-влакым колтен, нунылан кӱштен: «Кунам пуч йӱкым колыда, тунам ”Авессалом Хевронышто кугыжа лийын!” манын кычкыралза».11Авессаломын ӱжмыж почеш пеленже Иерусалим гыч кокшӱдӧ еҥ тарванен. Нунышт, нимом палыде, нимогай уда шонымаш деч посна почешыже каеныт.12Надырым кондымо годым Авессалом Гило ола гыч Ахитофелым, Давидын каҥаш пуышо еҥжым, ӱжын. Шолып кутырен келшымаш эшеат вийым налын, Авессалом йыр калык шукырак да шукырак погынен.13Давид дек уверзе толын да каласен: «Израильтян-влак Авессалом могырыш шогалыныт!»14Тунам Давид Иерусалимыште пеленже улшо тарзыж-влаклан каласен: «Мыланна куржаш кӱлеш, уке гын Авессалом деч огына утаралт! Вашкыза, мыланна кызытак куржаш кӱлеш! Уке гын Авессалом кугу ойгым конда – мемнам пӱтырен куча, оласе чыла еҥым керде дене пытара!»15Кугыжан тарзыже-влак вашештеныт: «Кузе кугыжа озана каласа, тарзет-шамыч тугак ыштат».16Кугыжа да тудын полатыштыже илыше-влак ола гыч каеныт. Тушан кугыжан лу кулватыже гына кодын: кугыжа нуным полатым ончаш коден.17Кугыжа да тудын уло калыкше йолын каеныт, вара Беф-Мерхат воктене чарнен шогалыныт.18Кугыжан чыла тарзыже, хелефей ден фелефей-влак, тыгак Геф гыч пеленже толшо кудшӱдӧ наре еҥ ты верыште Давидым ончылтен каеныт.19Кугыжа Геф гыч улшо Еффей деч йодын: «А тый молан мемнан дене кает? Пӧртыл мӧҥгеш да у кугыжа пелен лий. Вет тый йот тукым, шке мландет гыч поктен колтымо еҥ улат.20Тый шукерте огыл толынат, а кызыт мый тыйым адакат вес верыш наҥгаем? Куш каем, шкежат ом пале. Пӧртыл мӧҥгеш, пеленет иза-шольыч-влакымат нал. Тек Господь тый декет поро да ӱшанле лиеш».21Но кугыжалан Еффей тыге вашештен: «Господь дене да кугыжа озам дене товатлем: кеч-кушто кугыжа ынже лий – илыше кодам але колаш логалеш – тарзет пеленетак кодеш».22Давид каласен: «Тугеже мый денем ошкыл». Тыге Геф гыч Еффей да пеленже улшо еҥ-влак шке ешышт дене Давид пелен каеныт.23Кунам еҥ-влак каеныт, уло мланде кугу йӱкын шортын. Кугыжа шке калыкше дене, Кедрон йогыным вончен, ир мланде могырыш ошкылын.24Туштак [иерей] Садок да Юмын ойпидыш шондыкшым Вефар гыч нумал кондышо левит-влак лийыныт. Нуно Юмын шондыкым шынденыт, а Авиафар, уло калыкын ола гыч лекмешкыже, кӱкшака верыште шоген.25Кугыжа Садоклан каласен: «Юмын шондыкым олашке пӧртылтӧ, [тек тудо шке верыштыже шинча]. Господьын поро кумылжым сулен налам гын, Тудо мыйым пӧртылта. Тунам мый шондыкым да Тудын илыме вержым ужам.26Но Господь мылам ”тый декет поро кумылем уке” манеш гын, мый ямде улам: тек Тудо мый денем мом шонымыжым ышта».27Кугыжа иерей Садоклан эше каласен: «Умылет, тылат олашке пӧртылман, кай тыныс дене. Пырля шке Ахимаас эргыч ден Авиафарын Ионафан эргыжым нал. Пӧртылза коктынат шке эргыда дене.28А мый, тендан деч уверым налмешке, ир мландыште эҥер гоч вончымо вер дене лиям».29Садок ден Авиафар Юмын шондыкым Иерусалимыш пӧртылтеныт да шкештат тушанак кодыныт.30А Давид Елеон курыкыш кӱзен. Тудо шортын-шортын чарайола ошкылын, вуйжо леведме лийын. Пеленже кайыше-влакат вуйыштым леведыныт да шортыныт.31Давидлан увертареныт: «Авессаломын шолып кутырен келшымашкыже Ахитофел ушнен». «Господь, [мыйын Юмем,] шалате Ахитофелын шонымашыжым!» – кугу йӱкын каласен Давид.32Давид курык вуйыш, Юмылан кумалме верыш, кӱзен шуын. Тушто ваштарешыже Архи тукым гыч Хусий [йолташыже] толын. Хусий ӱмбалне вургем кушкедме, а вуйышкыжо пуракым шавыме лийын.33Давид тудлан каласен: «Мый денем кает гын, корнышто мылам нелылыкым веле кондет.34Тый лучо олашке пӧртыл да Авессаломлан тыге каласе: ”Кугыжа, [иза-шольыч-влак да кугыжа ачат куржыныт. Ынде] мый тыйын тарзет лиям. [Мыйын илышем арален кодо.] Тымарте мый ачатын тарзыже лийынам, а кызыт тыйын тарзет улам”. Тыге тый мылам Ахитофелын шонымашыжым шалаташ полшет.35Тый денет пырля Садок ден Авиафар иерей-влак лийыт. Чыла, мом кугыжан пӧртыштыжӧ колат – нунылан ойло.36Тушто тыгак Садокын Ахимаас эргыже да Авиафарын Ионафан эргыже лийыт. Колмо чыла уверым мылам нунын гоч колтыза».37Лач тиде жапыште, кунам Давидын Хусий йолташыже Иерусалимыш пӧртылын, Авессалом олашке пура улмаш.
Institute for Bible Translation, Finland