4 Куг18
1Израиль кугыжа Осийын, Эла эргын, кумшо ий вуйлатымыж годым Иудан кугыжажлан Езекий, Ахаз эрге, шогалын.2Кугыжаланаш тӱҥалмыж годым тудо коло вич ияш лийын да Иерусалимыште коло индеш ий вуйлатен. Аважын лӱмжӧ Ави, тудо Захарийын ӱдыржӧ лийын.3Давид кугезе кочаж семынак тудо чыла шотыштат Господьлан келшыше пашам ыштен.4Езекий кӱкшакаласе кумалме верлам кораҥден, онакӱ-шамычым шалатен, Ашера меҥге-влакым руэн шуэн да Моисейын ыштыме той кишкыжым пытарен. Вет Израиль эрге-шамыч тудын ончылно тымартеат тамлыпушым тӱтыреныт, тиде кишкым Нехуштан манын лӱмденыт.5Езекий Израильын Господь Юмыжлан инанен илен. Тудын деч ончычсо да тудын деч варасе Иуда кугыжа-влак коклаште тудын гайже лийын огыл.6Езекий Господьлан ӱшанле лийын да Тудын деч кораҥын огыл: Моисей гоч пуымо кӱштымашыже-влакым шуктен шоген.7Господь тудын пелен лийын. Езекий кушко гына каен огыл, чылажымат шот дене ыштен. Тудо Ассирий кугыжа ваштареш шогалын да кид йымачше лектын.8А филистим-влакым Газа марте да тудын йыр кырен шалатен, орол башнян оламат, чоткыдемдыме оламат сеҥен налын.9Езекий кугыжан нылымше ий вуйлатымыж годым – Израильыште тунам Осий, Эла эрге, шымше ий кугыжаланен – Самарий ӱмбак Ассирий кугыжа Салманассар толын да олам авырен налын.10А кум ий гыч тудо олам сеҥен налын. Тыгеракын, Езекийын кудымшо ий вуйлатымыж годым, а Израиль кугыжа Осийын индешымше ий вуйлатымыж годым Самарий сеҥен налме лийын.11Ассирий кугыжа израильтян-влакым Ассирийыш наҥгаен, нуным Халахыште да Гозанысе Хавор эҥер воктене, тыгак Мидийысе олалаште вераҥден.12Вет нуно Господьым, шке Юмыштым, колыштын огытыл, Тудын ойпидышыжым пудыртеныт. Мом Моисей, Господьын тарзыже, кӱштен коден, нуно колыштын да шуктен шоген огытыл.13Езекий кугыжан латнылымше ий вуйлатымыж годым Ассирий кугыжа Сеннахирим Иуда тукымын чоткыдемдыме чыла олаже ӱмбак керылтын да нуным сеҥен налын.14Иуда кугыжа Езекий Лахисыш Ассирий кугыжалан тыге каласаш колтен: «Мый титакан улам. Кай мый дечем. Мылам мыняр тӱлаш палемдет, чыла тӱлем». Ассирий кугыжа Иуда кугыжа Езекийлан кумшӱдӧ талант ший ден кумло талант шӧртньым тӱлаш палемден.15Езекий тудлан Господьын пӧртыштӧ да кугыжан пӧртын поянлыкым погымо верлаштыже улшо чыла шийым пуэн.16Тиде жапыштак Иуда кугыжа Езекий Господьын пӧртшын омса ден омсаянакше-влакым комыжлымо чыла шӧртньым – нуным тудо шкежак комыжлаш кӱштен улмаш – тӧргалтен налын да Ассирий кугыжалан пуэн.17Но Ассирий кугыжа садак Лахис гыч Езекий кугыжа дек Иерусалимыш шке тӧраже-влакым – тартаным, рабсарисым да рабсакым – кугу сарзывий дене колтен. Нуно Иерусалим деке толыныт, Межйӧрышӧ пасуш наҥгайыше корно воктенысе Кӱшыл пӱяш вӱдым колтышо канал воктене шогалыныт18да кугыжам ӱжыныт. Нунын дек полат вуйлатыше Елиаким, Хелкий эрге, возкалыше Севна да курымсерышым возышо Иоах, Асаф эрге, лектыныт.19Рабсак нунылан каласен: «Езекийлан ойлыза: ”Кугу кугыжа, Ассирий кугыжа, тыге ойла: тый молан инанен илет?20Тый яра мутым веле ойлыштат. А сарлан шонен моштымаш ден вий-куат кӱлыт. Мыйын ваштарешем шогалын, кӧлан инанет?21Теве тый Египетлан, тиде тодылалтше омыж пондылан, эҥерташ шонет. Кӧ тудлан эҥерта, тиде вондо тудын кидышкыже керылт пура да шӱтен лектеш. Теве мо лиеш нунын дене, кӧмыт фараонлан, Египет кугыжалан, инанат.22Але те мыланем ’Ме шке Господь Юмыланна инанен илена’ маныда? Но Езекий огыл мо Тудын кӱкшакаласе кумалме вер ден жертвенникше-влакым пытарен да Иуда ден Иерусалимлан ’Иерусалимыште улшо тиде жертвенник ончылно гына кумалза’ манын каласен?”23Ассирий кугыжа озам дене сделкым ыште: мый тылат кок тӱжем имньым пуэн кертам, но тый нунылан имнешке-влакым муын кертат мо?24Кузе тый озамын кеч эн изи вуйлатышыжым чактарен кертат? Египетын орва ден имньыжлан инанет?!25Господьын кумылжо почеш огыл мо мый тиде кундемым пустаҥдаш толынам? Тудо мылам каласен: ”Тиде мландыш кай да тудым пустаҥде”».26Тунам Елиаким, Хелкий эрге, Севна да Иоах рабсаклан вашештеныт: «Мемнан дене, шке тарзет-влак дене, арамей йылме дене кутыро – ме умылена. Пырдыж ӱмбалне улшо калык ончылно мыланна еврей йылме дене ит ойло».27Рабсак нунылан каласен: «Мо, мыйын озам нине мут-влакым тыйын озатлан да тылат веле каласаш колтен шонет? Уке, пырдыж ӱмбалне шинчыше еҥ-влакланат! Нуно тендан дене пырля шке шурыштым кочкаш да шке шондыштым йӱаш тӱҥалыт».28Тунам рабсак шогалын да кугу йӱкын еврейла каласен: «Кугу Ассирий кугыжан мутшым колыштса!29Кугыжа тыге ойла: тек Езекий тендам огеш ондалкале. Тудо тендам мыйын кидем деч утарен ок керт.30”Мемнам Господь утара, тиде ола Ассирий кугыжан кидышкыже пуымо ок лий” манмыж дене Езекий тек шӱмыштыда Господьлан инанымашым огеш шочыкто.31Ида колышт Езекийым! Ассирий кугыжа тыге ойла: мый денем тыныс ойпидышым ыштыза да мый декем лекса. Тунам те кажныже шке виноград ден смоква пушеҥгыда гыч саскам кочкыда да шке тавыда гыч вӱдым йӱыда.32А вара мый толам да тендан гаяк вес мландыш – шурно ден йошкар аракан, кинде ден виноград аҥан, олив ӱйым пуышо пушеҥге ден мӱян мландыш – тендам наҥгаем. Те огыда коло, илаш тӱҥалыда! Ида колышт Езекийым. ”Господь мемнам утара” манмыж дене тудо тендам ондалкала.33Иктаж вес калыкын юмыжо Ассирий кугыжан кидше деч шке мландыжым утарен мо?34Кушто Емаф ден Арпадын юмыжо-влак? Кушто Сепарваимын, Ена ден Ивван юмыжо-шамыч? Нуно мыйын кидем деч Самарийым утареныт мо?35Нине мландын юмышт кокла гыч кӧ шке мландыжым мыйын кидем деч утарен? Мо, Господь мыйын кидем деч Иерусалимым утара шонеда?»36Калык шып шинчен, ик мутымат пелештен огыл. Кугыжа тыге кӱштен каласен улмаш – «тудлан ида вашеште».37Полат вуйлатыше Елиаким, Хелкий эрге, возкалыше Севна да курымсерышым возышо Иоах, Асаф эрге, Езекий деке кушкедме вургеман толыныт да тудлан рабсакын чыла шомакшым каласеныт.
Institute for Bible Translation, Finland