4 Куг19
1Тидым колмеке, Езекий кугыжа вургемжым кушкедын, чоштыра вургемым чиен да Господьын пӧртышкыжӧ каен.2А полат вуйлатыше Елиакимым, возкалыше Севнам да кугурак иерей-влакым – нунат чоштыра вургемым чиеныт – тудо пророк Исаий, Амос эрге, деке колтен.3Нунышт Исаийлан каласеныт: «Езекий тыге ойла: ”Таче орлык, мут кучымо да мыскылалтме кече. Аза теве-теве шочшаш, а тудым ышташ вий уке.4Ала Господь, тыйын Юмет, рабсакын чыла шомакшым колеш? Ассирий кугыжа озаже тудым илыше Юмым мыскылаш колтен. Ала тиде шомакше-влаклан Господь тудым мут кучаш шогалта? Илыше кодшо-влак верчын кумал”».5Кунам Езекий кугыжан тарзыже-влак Исаий дек толыныт,6тудо нунылан тыге вашештен: «Шке озаланда каласыза, Господь тыге ойла: ”Колмо шомакет деч, кудыж дене Ассирий кугыжан тарзыже-влак Мыйым мыскыленыт, ит лӱд.7Мый тудын шонымашыжым вашталтем – тудо уверым колеш да шке мландышкыже пӧртылеш. Тушто Мый тудым керде дене пытарем”».8Тидын деч вара рабсак тушеч каен. Ассирий кугыжан Лахисым коден кайымыже да кызыт Ливна ваштареш кредалмыж нерген колмеке, тудо тушко кугыжа деке каен.9Вара Ассирий кугыжа уверым колын: «Тый денет кредалаш Тиргак, Эфиопий кугыжа, толеш». Тунам тудо шке еҥже-влакым Езекий деке колтен:10«Езекийлан, Иуда кугыжалан, тыге каласыза: ”Ассирий кугыжа кидыш Иерусалим пуымо ок лий” манын ит шоно да инанен илыме Юметлан шкендым ондалаш ит пу.11Мом Ассирий кугыжа-влак чыла моло эл дене ыштеныт, тый колынат. Нуно чылаштым пытареныт. А тый утлен кодам шонет мо?12Вес калык-влакын юмышт нуным утареныт мо? Ача-кочам-влак нине калыкым – Гозан, Харан да Рецефыште илыше-влакым, тыгак Фалассарыште илыше Еден эрге-шамычым – пӱтынек пытареныт.13Кушто кызыт Емаф ден Арпадын, Сепарваим олан, Ена ден Ивван кугыжашт улыт?»14Колтымо еҥ-влакын кидышт гыч Езекий серышым налын да лудын лектын. Вара Господьын пӧртышкыжӧ каен да Тудын ончылно серышым шаралтен пыштен.15Езекий Господь ончылно тыге кумалын: «Господь, Израильын Юмыжо, херувим-влак ӱмбалне шинчыше! Мландымбалысе кугыжаныш-шамычын Юмышт Тый гына улат. Тый кава ден мландым ыштенат.16Савыре пылышет, Господь, да [мыйым] кол! Поч шинчат, Господь, да ончал, кол Сеннахиримын мутшым – тудо [Тыйым], илыше Юмым, мыскылаш колтен!17Тиде чын, Господь – Ассирий кугыжа-влак нине калыкым да нунын мландыштым пустаҥденыт,18а юмышт-влакым тулыш кудалтеныт. Но вет нуно юмо огыл, а айдеме кид дене ыштыме пу ден кӱ полган лийыныт, сандене нуным пытарен кертыныт.19А кызыт, Господь Юмына, мемнам тудын кидше деч утаре! Тек мландымбалысе чыла кугыжаныш-влак пален налыт: Тый гына, Господь, Юмо улат!»20Исаий, Амос эрге, Езекий деке тыге каласаш колтен: «Тыге Господь, Израильын Юмыжо, ойла: ”Ассирий кугыжа Сеннахирим шотышто мо нерген кумалынат, Мый колынам”.21Теве тудын нерген Господьын каласыме шомакше:”Койдара, воштылеш тыйым нарашта Сион ӱдыр,вуйжым рӱзалта почешет Иерусалим ӱдыр.22Кӧм тый мыскылет? Кӧм шӱктарет?Кӧн ӱмбак йӱкет кугемденатда ӱмбакыже кугешнен ончаш тоштат?Израильын святой Юмыж ӱмбаке!23Колтымо еҥет-влак гочын Господьым мыскылен ойленат:’Шуко сарлык орва дене мый курыкыш,Ливанын умбал тайылышкыже кӱзенам.Мый тудын эн кӱкшӧ кедр ден эн сай кипарисше-влакым руэнам,Мый тудын эн умбал верлаштыже, чодыра лоҥгаштыже лийынам.24Мый таве-влакым кӱнченамда йот мландысе вӱдым йӱынам.Египетын чыла эҥержым мыйын йолем коштен’.25Тый колын отыл мо?Чыла тидым Мый шукертак палемденам,акрет кечылаштак шонен пыштенам.А кызыт тидым шуктенам –тый чоткыдемдыме ола-шамычым шалатенат,нунын деч лач кӱ ора-влак кодыныт.26Тушто илыше-шамыч вийдыме лийыныт,нуно лӱдын чытырат, намысыш пуреныт.Нуно пасу кушкыл гай, нӧргӧ лышташнер гай,леведыш ӱмбалне кушкын шуде кошкышо шудо гай лийыныт.27Шинчет мо тый але лектат, але пурет – Мый чыла палем.Мыйын ваштареш ажгынен шогалметымат палем.28Мый декем сӱрза улметлан, кугешныметлан –тидын нерген Мый колынам –нерышкет колчам пижыктем,умшашкет сорлыкым чиктемда толмо корнет денак тыйым мӧҥгеш наҥгаем”.29Теве тыланет, Езекий, палдарыше пале: йогышо пырче деч мо кушмым тиде ийын кочкыда, вес ийын – шке гыч шочшым. А кумшо ийын ӱдыза да тӱредса, виноград аҥа-влакым шындыза да саскаштым кочса.30Тунам Иуда тукым гыч утлен кодшо-влак угыч вожым колтат да саскам пуат.31Утлен кодшо калык Иерусалим гыч шарлаш тӱҥалеш, утаралт кодшо-влак – Сион гыч. Господь Саваофын чон йӱлен тыршымыже тидым ышта.32Садлан Ассирий кугыжа шотышто Господь тыге ойла:”Тиде олашке тудо ок пуро,пикш-влакым тушко ок колто,тудын дек авыртыш дене ок лишем,тудым авырен налаш мланде кӱкшака-влакым ок ыште.33Толмо корныж денак мӧҥгеш пӧртылеш,тиде олашке тудо ок пуро – тыге Господь ойла.34Шкаланем кӧра да Давид тарземлан кӧраМый тиде олам аралем да утарен кодем”».35Тиде йӱдым Господьын Суксыжо толын да Ассирий станыште шӱдӧ кандашле вич тӱжем еҥым пытарен. Эрдене кынелыныт – йырым-йыр лач колышо кап-влак кият.36Тунам Сеннахирим, Ассирий кугыжа, мӧҥгеш савырнен каен да Ниневийыште илен.37Икана, кунам тудо шке Нисрох юмыжын пӧртыштыжӧ кумалын, Адрамелех ден Шарецер эргыже-влак тудым керде дене шуралтен пуштыныт, а шкешт Арарат мландыш куржыныт. Сеннахирим олмеш кугыжалан Асардан эргыже шогалын.
Institute for Bible Translation, Finland