4 Куг13
1Иуда кугыжа Иоасын, Охозий эргын, коло кумшо ий вуйлатымыж годым Самарийыште Израильын кугыжажлан Иоахаз, Ииуй эрге, шогалын да латшым ий кугыжаланен.2Иоахаз Господьын шинча ончылныжо шуко осал пашам ыштен. Тудо Израильым сулыкыш пуртышо Иеровоамын, Нават эргын, сулыкан корныж дене коштын, тудын деч кораҥын огыл.3Тунам Израиль ӱмбаке Господьын шыдыже ылыжын. Тудо нуным кужу жаплан Азаилын, Сирий кугыжан, да тудын Венадад эргыжын кидышкышт пуэн.4Иоахаз Господьлан кумалын, да Господь тудым колын. Вет Тудо Сирий кугыжан нуным шыгыремдылмыжым ужын.5Господь израильтян-влаклан утарышым колтен, да нуно сириян-шамычын кид йымачышт лектыныт. Израиль эрге-влак шке омашыштышт ончычсо семын тыныслын илаш тӱҥалыныт,6но Израильым сулыкыш пуртышо Иеровоам тукымын сулыкшо-влак деч садак кораҥын огытыл, тиде корно денак коштыныт. Тыгак Самарийыште Ашера меҥгат кодын.7Иоахазын сарзывийже деч лач витле имнешке, лу орва да лу тӱжем йолешке кодыныт. Молыштым Сирий кугыжа пытарен, нуным тошкен коштмо пуракыш савырен.8Иоахазын моло пашаже, чыла мом ыштымыже, сеҥымашыже-влак нерген «Израиль кугыжа-шамычын курымсерыш книгаштышт» возымо.9Вара Иоахаз ача-кочаж-влак деке ушнен, тудым Самарийыште тоеныт. Тудын олмеш кугыжалан Иоас эргыже шогалын.10Иуда кугыжа Иоасын кумло шымше ий вуйлатымыж годым Самарийыште Израильын кугыжажлан Иоас, Иоахаз эрге, шогалын да латкуд ий кугыжаланен.11Господь шинча ончылно Иоас шуко осал пашам ыштен. Тудо Израильым сулыкыш пуртышо Иеровоамын, Нават эргын, сулыкшо-влак деч кораҥын огыл, нуным умбакыжат ыштен.12Иоасын моло пашаже, чыла мом ыштымыже, сеҥымашыже-влак, Иуда кугыжа Амасий дене кредалмыж нерген «Израиль кугыжа-шамычын курымсерыш книгаштышт» возымо.13Вара Иоас шке ача-кочаж-влак деке ушнен. Тудын престолышкыжо Иеровоам шинчын. Иоасым Самарийыште моло Израиль кугыжа пелен тоеныт.14Елисей колышашын черланен. Тудын деке Иоас, Израиль кугыжа, толын да шортын ойлен: «Ачаем, ачаем – Израильын орван да имнян сарзывийже!»15Елисей тудлан каласен: «Йоҥеж ден пикш-влакым нал». Тудыжо йоҥеж ден пикш-влакым налын.16«Кидетым пикшвӱчӧ ӱмбак пыште», – каласен Елисей. Кунам Иоас кидшым пикшвӱчӧ ӱмбак пыштен, Елисей шке кидшым кугыжан кидше ӱмбаке пыштен17да каласен: «Эрвел могыр окнам поч». Тудо почын. «Лӱй!» – кӱштен Елисей, да Иоас лӱен. Елисей каласен: «Тиде Господьын сеҥымаш пикшыже, Сирийым сеҥыше пикш! Тый Афекыште сириян-шамычым икте кодде пытарет!»18Вара Елисей каласен: «Пикш-влакым нал». Иоас налын. «Нунын дене мландым кыре», – Израиль кугыжалан кӱштен. Тудыжо кум гана перен, вара чарнен шогалын.19Юмын еҥ тудлан сырен да каласен: «Вич але куд гана перет ыле гын, тый сириян-шамычым пӱтынек пытарет ыле. А ынде нуным кум гана веле кырен шалатет».20Елисей колен, тудым тоеныт. Вес ийын Израиль мландышке аген коштшо моав-влак керылт пураш тӱҥалыныт.21Ик еҥым тойымо годым моав-шамыч толын лектыныт. Нуным ужмеке, тойышо-влак тиде еҥын капшым Елисейым тойымо курыкпомышыш кудалтен коденыт. Елисейын лужо деке тӱкнымеке, колышо еҥ ылыжын да йол ӱмбаке кынел шогалын.22Азаил, Сирий кугыжа, Иоахазын вуйлатымыж годым израильтян-влакым эре шыгыремдылын.23Но Господь нуным чаманен да серлаген – Авраам, Исаак да Иаков дене ыштыме ойпидышыжлан кӧра нунын деке савырнен. Господь израильтян-влакым пытараш шонен огыл, нуным Шкеж деч кораҥден огыл.24Сирий кугыжа Азаил колен, тудын олмеш кугыжалан Венадад эргыже шогалын.25Тунам Иоас, Иоахаз эрге, ола-влакым Азаил эрге Венадад деч мӧҥгеш поген налын. Нине олам Азаил тудын Иоахаз ачаж дечын сар годым шупшын налын улмаш. Иоас сириян-влакым кум гана кырен шалатен да израиль ола-шамычым мӧҥгеш пӧртылтен.
Institute for Bible Translation, Finland