4 Куг12
1Ииуйын шымше ий вуйлатымыж годым кугыжалан Иоас шогалын да Иерусалимыште нылле ий кугыжаланен. Аважын лӱмжӧ Цивья лийын, тудо Вирсавий гыч улмаш.2Иерей Иодайын туныктен шогымыжлан кӧра Иоас илыме чыла кечылаштыже Господьлан келшыше пашам ыштен.3Лач кӱкшакаласе кумалме вер-влак тыгак кодыныт. Калык тушто надырым конден, тӱтыртышым йӱлалтен.4Иоас иерей-влаклан каласен: «Господьын пӧртышкыжӧ святой пӧлек семын кондымо чыла шийым погыза: тиде – кажне чонлан кондымо йозак ший, сӧрымӧ почеш кондымо ший да Господьын пӧртышкыжӧ шке кумылын кондымо ший.5Тек иерей-влак тиде оксам шке полышкалышышт деч налыт да, храмыште мом олмыкташ кӱлеш, тидлан кучылтыт».6Но иерей-влак храмым Иоас кугыжан коло кумшо ий вуйлатыме жапланат олмыктен огытыл.7Тунам Иоас иерей Иодай ден моло иерейым ӱжын да нунылан каласен: «Молан те храмым эшеат огыда олмыкто? Тетла шке палымыда-влак деч шийым ида нал, мыняр погенда – храмым олмыкташ пуыза».8Иерей-влак тидын дене кӧненыт, «тетла калык деч шийым огына нал, храмым олмыктымо пашалан вуйын огына шого» манын каласеныт.9Иерей Иодай ик яшлыкым налын, комдышешыже рожым ыштен да жертвенник воктеке, Господьын пӧртышкыжӧ пурымо верын пурла могырешыже, шынден. Пурымо верым оролышо иерей-влак тушко Господьын пӧртышкыжӧ кондымо чыла шийым оптеныт.10Яшлыкын ший дене теммыжым ужмеке, тушко кугыжан возкалышыже да кугу иерей толыныт. Нуно Господьын пӧртышкӧ кондымо шийым мешаклашке шотлен пыштеныт.11Шотлен налме шийым нуно Господьын пӧртыштӧ пашам вуйлатен шогышо-влаклан пуэныт. Нунышт тудым Господьын пӧртыштыжӧ пашам ыштыше плотник ден чоҥышо-влаклан,12пырдыжым оптышо ден кӱм руышо-шамычлан тӱлаш кучылтыныт. Тиде окса тыгак Господьын пӧртшым олмыктымо пашалан кӱлшӧ чодыра ден руымо кӱм налаш да моло роскотым тӱлаш каен.13Но ший атым, вашкӱзым, кӱмыжым, тӧтыретпучым да моло шӧртньӧ ден ший арверым ышташлан Господьын пӧртышкыжӧ кондымо шийым кучылтын огытыл.14Шийым пашам ыштыше-влаклан пуэныт, тыгак Господьын пӧртшым олмыкташ кучылтыныт.15Пашазе-шамычлан пашадарым пуэдыше еҥ-влак дечын шийым кучылтмышт шотышто отчётым йодын огытыл – нунышт чынле еҥ лийыныт.16А титак верч надыр ден сулык верч надырлан кондымо шийым Господьын пӧртышкыжӧ конден огытыл, тудо иерей-влаклан лийын.17Тиде жапыште Азаил, Сирий кугыжа, Геф ола ӱмбаке кержалтын да тудым руалтен налын. Варажым тудо Иерусалим ӱмбак каяш шонен.18Тунам Иуда кугыжа Иоас шке ача-кочаже-влакын – Иудан Иосафат, Иорам да Охозий кугыжаже-влакын – храмыш пӧлек шотеш чыла мом пуымыштым, шкенжын мом пуымыжым, тыгак Господьын пӧртшӧ ден кугыжан пӧртын поянлыкым погымо верлаште улшо чыла шӧртньым Азаиллан, Сирий кугыжалан, колтен. Тудыжо вара Иерусалим деч каен.19Иоасын моло пашаже, чыла мом ыштымыже нерген «Иуда кугыжа-шамычын курымсерыш книгаштышт» возымо.20Иоасын тарзыже-влак тудын ваштареш заговорым ыштеныт да Иоасым Силлаш наҥгайыше корнымбалне улшо Бет-Миллоэш пуштыныт.21Тудым пуштшо тарзыже-влак Иозакар, Шимеат эрге, да Иегозавад, Шомер эрге, лийыныт. Тыге Иоас колен, тудым ача-кочаж-влак пелен Давид-Олаште тоеныт. Тудын олмеш кугыжалан Амасий эргыже шогалын.
Institute for Bible Translation, Finland