4 Куг1
1Ахав колымеке, Моав Израиль ваштареш шогалын.2Охозий Самарийысе пӧртшын кӱшыл пӧлемжын окна решоткаж гоч камвозын да эмганен. Тудо шке еҥже-влаклан каласен: «Кайыза да Веельзевул деч, Екронысо юмо деч, йодса – тиде эмганымаш деч паремам мо?» [Нунышт йодаш каеныт.]3Тунам Господьын Суксыжо Фесвий гыч улшо Илиялан каласен: «Самарий кугыжан колтымо еҥже-влак ваштареш кае да нунылан каласе: ”Израильыште Юмо уке мо? Молан те Екронысо Веельзевул юмо деч каҥашым йодаш каеда?”4Сандене Господь тыге ойла: ”Вочмо вакшышет гыч от кынел, тый колет!”» Илия каен [да чыла тидым нунылан каласен].5Колтымо еҥ-влак Охозий дек пӧртылыныт. Тудо нунын деч йодын: «Молан те мӧҥгеш толында?»6Нуно вашештеныт: «Ваштарешна ик айдеме лекте да каласыш: ”Кайыза, тендам колтышо кугыжа дек пӧртылза да тудлан каласыза: ’Тыге Господь ойла: Израильыште Юмо уке мо? Молан тый Екронысо Веельзевул юмо деч каҥашым йодаш колтет? Тыге ыштыметлан вочмо вакшышет гыч от кынел, тый колет’”».7Кугыжа йодын: «Ваштарешда лекше да нине шомакым каласыше еҥ могайрак ыле?»8Нуно вашештеныт: «Тудо коваштым чиен, а кыдалыштыже шӱштӱштӧ ыле». Кугыжа каласен: «Тиде Фесвий гыч Илия».9Тудо Илия дек витльывуйым витле сарзыж дене пырля колтен. Витльывуй Илия дек толын – тудыжо тунам курык вуйышто шинчен – да каласен: «Юмын еҥже! Кугыжа тылат волаш кӱшта!»10Илия витльывуйлан вашештен: «Мый чынжымак Юмын еҥже улам гын, тек кава гыч тул вола да тыйым еҥет-влак дене пырля йӱлалтен пуштеш!» Тунам кава гыч тул волен да витльывуйым сарзыже-влак дене пырля йӱлалтен.11Тунам кугыжа Илия дек вес витльывуйым витле сарзыж дене колтен. Тудыжо толын да Илиялан каласен: «Юмын еҥже! Кугыжа тылат вашкерак волаш кӱшта!»12Илия тудлан вашештен: «Мый чынжымак Юмын еҥже улам гын, тек кава гыч тул вола да тыйым еҥет-влак дене пырля йӱлалтен пуштеш!» Тунам кава гыч Юмын тулжо волен да витльывуйым сарзыже-влак дене пырля йӱлалтен.13Кугыжа кумшо витльывуйым витле сарзыж дене колтен. Тиде витльывуй Илия деке кӱзен, ончыланже сукен шинчын да тудым сӧрвален йодын: «Юмын еҥже, чамане мыйын чонем да нине витле тарзетын чоныштым!14Вет кава гыч тул волен да мемнан деч ончыч толшо кок витльывуйым да нунын сарзыштым йӱлалтен пуштын. Чамане мыйын чонем!»15Господьын Суксыжо Илиялан каласен: «Кай тудын дене пырля, ит лӱд». Илия кынелын да тудын дене пырля кугыжа деке каен.16Тудо кугыжалан каласен: «Тыге Господь ойла: ”Шке еҥет-влакым Екронысо Веельзевул юмо деч каҥашым йодаш колтыметлан – пуйто ойым йодаш Юмо Израильыште уке – вочмо вакшышет гыч от кынел, тый колет”».17Илиян каласыме Господьын шомакше семынак Охозий колен. Эргыже лийын огылат, тудын олмеш кугыжалан Иорам, [Охозийын шольыжо,] шогалын. Тиде Иуда кугыжа Иорамын, Иосафат эргын, кокымшо ий кугыжаланымыж годым лийын.18Охозийын моло пашажым «Израиль кугыжа-влакын курымсерыш книгаштышт» возымо.
Institute for Bible Translation, Finland