4 Куг2
1Кунам Господь Илиям пӧрдшымардеж дене пылпомышко налнеже улмаш, Илия Елисей дене пырля Галгал гыч ошкылын.2Тудо Елисейлан каласен: «Код тышакын. Господь мыйым Вефильыш колта». Но Елисей вашештен: «Господь дене да тыйын илышет дене товатлем: мый тыйым ом кодо!» Да нуно Вефильыш пырля каеныт.3Елисей дек Вефильыште улшо пророк тунемше-влак лектыныт да тудлан каласеныт: «Господь таче тый дечет озатым налеш, тидым палет мо?» «Палем, – Елисей вашештен, – шып лийза».4Илия тудлан каласен: «Елисей, код тышакын. Господь мыйым Иерихоныш колта». Елисей вашештен: «Господь дене да тыйын илышет дене товатлем: мый тыйым ом кодо!» Нуно Иерихоныш каеныт.5Елисей дек Иерихонышто улшо пророк тунемше-влак толыныт да каласеныт: «Господь таче тый дечет озатым налеш, тидым палет мо?» «Палем, – Елисей вашештен, – шып лийза».6Илия Елисейлан каласен: «Код тышакын, Господь мыйым Иордан деке колта». Елисей вашештен: «Господь дене да тыйын илышет дене товатлем: мый тыйым ом кодо!» Нуно коктын умбакыла каеныт.7Нунын почеш витле пророк тунемше каен да умбалнырак ваштарешышт шогалын. А Илия ден Елисей Иордан воктене шогеныт.8Илия шке плащыжым кудашын да пӱтыралын, вара тудын дене вӱдым перен. Вӱд кок могырыш кораҥын, да нуно кукшо мланде дене вонченыт.9Вончымеке, Илия Елисей деч йодын: «Каласе, мыйым тый дечет налме деч ончыч тылат мом ышташ?» Елисей вашештен: «Тек тыйын пророк шӱлышет деч мый кугэрге пайым налам». 10«Тый пеш нелым йодат, – каласен Илия. – Мыйым тый дечет налмым ужат гын, йодмет семын лиеш. А от уж гын, тыге ок лий».11Кунам нуно корно дене кутыркален каеныт, кенета тул орва ден тул имне-влак толын лектыныт. Нуно Илия ден Елисейым икте-весышт деч ойыреныт, да Илия пӧрдшымардеж дене пылпомышко налме лийын.12Елисей тидым ончен шоген да кычкырен: «Ачаем, ачаем – Израильын орван да имнян сарзывийже!» Кунам Илия шинча ончычшо йомын, тудо ӱмбал вургемжым кучен да кок ужашлан кушкедын.13Вара Илия ӱмбач камвоч кодшо плащым налын да мӧҥгеш каен, Иордан серыш толын шогалын.14Тудо кидыштыже улшо Илиян плащыж дене вӱдым перен да каласен: «Кушто Господь, Илиян Юмыжо?» Кунам Елисей вӱдым перен, тунам вӱд кок могырыш кораҥын, да тудо эҥер гоч вончен.15Тидым умбалне шогышо Иерихонысо пророк тунемше-влак ужыныт да каласеныт: «Илиян пророк шӱлышыжӧ – Елисей ӱмбалне». Нуно тудын ваштареш каеныт, Елисейлан вуйыштым мланде марте савеныт16да каласеныт: «Мемнан виян витле еҥна уло. Тек нуно каят да тыйын озатым кычалыт. Ала Господьын Шӱлышыжӧ тудым наҥгаен да иктаж курыкыш але лапверыш кудалтен?» «Огеш кӱл, ида колто», – вашештен Елисей.17Но нуно сӧрвален йодмыштым чарнен огытыл, тудым чот витареныт, да Елисей каласен: «Йӧра, колтыза». Тыге витле еҥым кычалаш колтеныт. Нунышт тудым кум кече кычалыныт, но муын огытыл18да Елисей дек пӧртылыныт. Тудыжо Иерихоныштак кодын улмаш. Елисей нунылан каласен: «Мый тыланда ида кошт манын шым ойло мо?»19Иерихонышто илыше-влак Елисейлан ойленыт: «Мемнан озана, тый шке ужат: олана пеш сай верыште шинча, но тыште вӱд сай огыл, мландат саскам ок пу».20Тудыжо каласен: «Мылам у атым кондыза, тушко шинчалым пыштыза». Нуно тыгак ыштеныт.21Елисей памашшинча деке лектын, тушко шинчалым кудалтен да каласен: «Тыге Господь ойла: ”Мый тиде вӱдым саемдышым. Тетла тудо колымаш ден саскадымылыкым ок кондо”».22Елисейын каласыме шомакше деч вара тушто вӱд сай лийын, таче кече мартеат тыгаяк кодын.23Тушечын Елисей Вефильыш каен. Кунам тудо корно дене ошкылын, ола гыч рвезе-влак куржын лектыныт да тудым игылташ тӱҥалыныт: «Чаравуй, кай тышеч! Кай тышечын, чаравуй!»24Елисей савырнен ончалын да нине рвезе-влакым ужын. Тудо нуным Господьын лӱмжӧ дене карген. Тунам чодыра гыч кок ава маска лектын да нунын кокла гыч нылле кок рвезым кӱрышт пуштын.25Тушеч Елисей Кармил курыкыш каен, а вара Самарийыш пӧртылын.
Institute for Bible Translation, Finland