3 Куг22
1Сирий ден Израиль коклаште сар кум ий лийын огыл.2Кумшо ийын Иосафат, Иудан кугыжаже, Израиль кугыжа дек каен.3Израиль кугыжа шке полышкалышыже-влаклан каласен: «Галаадысе Рамоф мемнан ола, тидым паледа мо? А ме шып шинчена, тудым Сирий кугыжан кидше гыч шупшын огына нал».4Тудо Иосафат деч йодын: «Мый денем пырля Галаадысе Рамоф ваштареш сар дене кает мо?» Иосафат Израиль кугыжалан вашештен: «Кушко тый, тушко мыят. Кушко тыйын калыкет, тушко мыйынат. Кушко тыйын имнет, тушко мыйын имнемат».5Но тыгодымак Иосафат Израиль кугыжалан каласен: «Эн ончыч йод – мом Господь каласа».6Израиль кугыжа пророк-влакым поген – нунышт нылшӱдӧ наре еҥ лийыныт – да йодын: «Галаадысе Рамоф ӱмбаке мылам сар дене каяш але уке?» Пророк-влак вашештеныт: «Кай, Господь тудым кугыжан кидыш пуа».7Иосафат йодын: «А тыште Господьын эше вес пророкшо уке мо? Тудын дечат йодына ыле».8Израиль кугыжа Иосафатлан вашештен: «Уло эше икте, Господь деч каҥашым тудын гоч йодаш лиеш. Но мый тудым чытен ом керт: мыйын шотышто сай пророк шомакым нигунам ок ойло, лач удам гына. Тиде – Михей, Иемвлай эрге». Иосафат каласен: «Кугыжа тыге ынже ойло».9Израиль кугыжа ик сартӧрам ӱжын да каласен: «Михейым, Иемвлай эргым, тышке писынрак кондо!»10Кугыжан вургемым чийыше Израиль кугыжа ден Иосафат, Иудан кугыжаже, Самарий ола капка воктенысе погынымо верыште шке престолыштышт шинченыт, а нунын ончылно пророк-влак шке пророк шомакыштым ойленыт.11Седекий, Хенаана эрге, шкаланже кӱртньӧ тӱкӧ-шамычым ыштен да увертарен: «Тыге Господь ойла: нине тӱкӧ-влак дене сириян-шамычым ӧргет да нуным пытарет!»12Пророк-влак чыланат тидымак ойленыт: «Кай Галаадысе Рамоф ӱмбаке, тый тудым сеҥет! Господь тудым кугыжа кидыш пуа!»13Ӱжаш колтымо еҥ Михейлан каласен: «Пророк-влак чыланат кугыжалан ик йӱкын сайым гына ойлат. Тек тыйын шомакетат нунын шомакышт дене келшен толеш. Тыят сайым каласе».14Михей вашештен: «Господь дене товатлем: Господь мылам мом каласа, тудым ойлем».15Михей кугыжа дек толын. Кугыжа тудын деч йодын: «Михей, мыланна Галаадысе Рамоф ӱмбаке сар дене каяш але уке?» Тудыжо кугыжалан вашештен: «Кай, тыйым сеҥымаш вуча. Господь тудым кугыжа кидыш пуа».16Ахав тудлан каласен: «Тыйым мыняр гана товатлен ойлыкташ? Господьын лӱмжӧ дене мылам чын деч молым ит ойло!»17Тунам Михей манын: «Мый курыклаште шаланен пытыше израильтян-влакым ужым, нуно кӱтӱчӧ деч посна коштшо шорыкла койыч. Господь тыге каласыш: ”Нунын озашт уке, тек кажныже тыныс дене мӧҥгыжӧ пӧртылеш”».18Израиль кугыжа Иосафатлан ойлен: «Мый тылат шым каласе мо: тудо мыйын шотышто нигунамат сай пророк шомакым ок ойло, лач удам веле?!»19Михей каласен: «[Тиде тыге огыл. Мыйыным огыл, а] Господьын шомакшым колышт. Мый престолышто шинчыше Господьым ужым. Тудын воктене, пурла да шола могырышто, пылпомышысо уло сарзывий шоген.20Господь йодо: ”Ахав Галаадысе Рамофыш кайыже да тушан колыжо манын, кӧ тудым ондален наҥгая?” Икте иктым темлыш, весе – весым.21Тунам ик шӱлыш лекте, Господь ончыко шогале да каласыш: ”Мый тудым ондалем”. Господь йодо: ”Кузе?”22Тудыжо вашештыш: ”Мый каем да чыла пророкшын умшаштышт шояк шӱлыш лиям”. Господь каласыш: ”Тый тудым ондален кертат. Кай, ойлымет семынак ыште”.23Тыгеракын, Господь чыла пророкетын умшашкышт шояк шӱлышым пыштен. А тыйын шотышто Господь сайым огыл каласен».24Тунам Седекий, Хенаана эрге, Михей дек лишемын, тудым совен да ойлен: «Господьын Шӱлышыжӧ мый дечем кораҥын да тыйын гоч кутыраш тӱҥалын мо?»25Михей вашештен: «Тудо кечын, кунам ик пӧлем гыч весыш шылын куржталаш тӱҥалат, тый тидым пален налат».26Тунам Израиль кугыжа каласен: «Кучыза Михейым да ола вуйлатыше Амон ден кугыжа эрге Иоас деке наҥгайыза.27Тыге манза: ”Кугыжа тыге ойла: тиде еҥым казаматыш шындыза. Мыйын таза-эсен пӧртылмешкем, изишак кинде ден вӱдым пуыза”».28Михей каласен: «Сар гыч таза-эсен пӧртылат гын, мыйын гоч Господь ойлен огыл!» Эше ешарен: «Тек тидым чылан колыт!»29Израиль кугыжа ден Иосафат, Иудан кугыжаже, Галаадысе Рамофыш каеныт.30Израиль кугыжа Иосафатлан каласен: «Мыйым ынышт пале манын, вес вургемым чием да кредалмашыш ушнем, а тый кугыжа вургеманак код». Израиль кугыжа вес вургемым чиен да кредалаш тӱҥалын.31Сирий кугыжа орван сарзывий вуйлатышыже-влаклан – нунышт кумло кокытын лийыныт – тыге каласен улмаш: «Сарзывуй декат, тыглай сарзе декат ида пиж, ик Израиль кугыжа дене веле кредалза».32Иосафатым ужын, орван сарзывий вуйлатыше-влак шоналтеныт: «Кернак, Израиль кугыжа тиде». Ӱмбакше кержалташ манын, нуно тудын велыш савырненыт. Иосафат кычкырал колтен.33Тиде Израиль кугыжа огыл улмым ужын, вуйлатыше-влак Иосафат деч вес могырыш савырненыт.34А ик сарзе пикшыжым чымалтарен да, шкежат тидым палыде, кӱртньӧ тувырышто улшо виш гоч Израиль кугыжам сусыртен. Кугыжа шке улазыжлан каласен: «Мӧҥгеш савырне да мыйым сӧй гыч лук. Мыйым сусыртеныт».35Но кредалмаш тиде кечын пеш чот талышнен, сандене сириян-влак ончылно сӧй пасушто кугыжалан шке орваштыже кодаш логалын. Сусыржо гыч вӱр орвашке йоген, да кастене тудо колен.36Кече шичме годым станыште увертареныт: «Тек кажныже шке олашкыже, шке мландышкыже кая!»37Тыге кугыжа колен, тудым Самарийыш конденыт да тушан тоеныт.38Тудын орважым Самарийысе пӱяште мушкыныт. Господьын каласымыж семынак, пий-влак тудын вӱржым нуленыт, тиде верыштак яжар ӱдырамаш-шамыч мушкылтыныт.39Ахавын моло пашаже, тудын мом ыштымыже, слон лу дене чоҥымо пӧртшӧ да чоҥымо чыла олаже нерген «Израиль кугыжа-шамычын курымсерыш книгаштышт» возымо.40Ахав шке ача-кочаж-влак деке каен. Тудын олмеш кугыжалан Охозий эргыже шогалын.41Ахавын, Израиль кугыжан, нылымше ий кугыжаланымыж годым Иосафат, Аса эрге, Иудан кугыжажлан шогалын.42Престолыш шичмыж годым Иосафат кумло вич ияш лийын да Иерусалимыште коло вич ий кугыжаланен. Аважын лӱмжӧ Азува, тудо Салаилын ӱдыржӧ лийын.43Иосафат чыла шотыштат Аса ачажын корныжым тошкен, тудын деч кораҥын огыл. Тудо Господьлан келшыше пашам ыштен. Лач кӱкшакаласе кумалме вер-влак тыгак кодыныт. Калык тушто надырым конден, тӱтыртышым йӱлалтен.44Иосафат Израиль кугыжа дене келшымаш ойпидышым ыштен.45Иосафатын моло пашаже, могай сеҥымашке шумыжо да кузе кредалмыж нерген «Израиль кугыжа-шамычын курымсерыш книгаштышт» возымо.46Иосафат эше кумалме верлаште яжарланыше пӧръеҥ-шамычым пытарен, нунышт элыште Аса ачажын вуйлатыме жап гычак кодыныт улмаш.47Идумейыште тунам кугыжа лийын огыл, элым кугыжан шогалтыме кундемтӧраже вуйлатен.48Офир гыч шӧртньым кондаш манын, Иосафат [кугыжа] Фарсис корабль-влакым чоҥен. Но корабль-влак каен кертын огытыл, нуно Ецион-Гаверыштак шаланеныт.49Тунам Охозий, Ахавын эргыже, Иосафатлан каласен: «Тек тыйын еҥет-влак дене пырля корабльыште мыйын еҥем-влакат каят». Но Иосафат тидын дене келшен огыл.50Вара Иосафат шке ача-кочаж-влак деке ушнен, тудым нунын пелен Давид кугезе кочажын олаштыже тоеныт. Олмешыже кугыжалан Иорам эргыже шогалын.51Иосафатын, Иуда кугыжан, латшымше ий вуйлатымыж годым Самарийыште Израильын кугыжажлан Охозий, Ахавын эргыже, шогалын. Тудо [Самарийыште] Израильым кок ий вуйлатен.52Господь шинча ончылно Охозий шуко осал пашам ыштен – тудо ачаж ден аважын, тыгак Израильым сулыкыш пуртышо Иеровоамын, Нават эргын, корнышт дене каен.53Тудо Вааллан служитлен да кумалын, ачаж семынак тидын дене Израильын Господь Юмыжым шыдештарен.
Institute for Bible Translation, Finland