2 Кур.кн15
1Тунам Азарий, Одед эрге, ӱмбаке Юмын Шӱлыш волен.2Тудо Аса ваштареш лектын да каласен: «Колыштса мыйым, Аса да пӱтынь Иуда ден Вениамин тукым! Кунам те Господь дене улыда, Тудо – тендан дене. Те Господьым кычалыда гын, Тудым муыда. А Господьым кодеда гын, Тудат тендам кода.3Израиль кужу жап чын Юмо деч посна, туныктышо иерей да закон деч посна лиеш.4Но кунам тудо шке ойгыж дене Израильын Господь Юмыж дек савырна да Тудым кычалаш тӱҥалеш, Господьым муэш.5Нине кечылаште корныеҥлан кошташ лӱдыкшӧ лиеш, вет чыла элым пудыранчык авалта.6Калык калык дене, ола ола дене кредалаш тӱҥалыт – Юмо, тӱрлӧ орлыкым колтен, нуным пудыранчыкыш пурта.7Но те пеҥгыде лийза, киддам ида луштаре – чыла пашаланда пӧлек лиеш».8[Азарийын,] пророк Одедын [эргыжын], пророклен ойлымо тиде мутлажым колмеке, Асан кумылжо нӧлталтын. Тудо пӱтынь Иуда ден Вениамин мланде гыч, тыгак Ефрем курыкышто сеҥен налме олалаж гыч чыла йырнык шояк юмым кораҥден да Господьын пӧртыш пурымо кыдеж ончылныжо жертвенникым уэмден.9Вара тудо пӱтынь Иуда ден Вениамин тукым еҥ-влакым, тыгак Ефрем, Манассий да Симеон тукымла гыч нунын деке илаш куснышо-шамычым поген. Вет Израиль гыч шукышт, Аса пелен Господь Юмын улмыжым ужмеке, тудын велыш вонченыт.10Асан латвизымше ий кумшо тылзе кугыжаланымыж годым нуно Иерусалимыш погыненыт.11Тиде кечын сарыште руалтен налме вольык гыч шымшӱдӧ вуй шолдыра вольыкым да шым тӱжем вуй тыгыде вольыкым Господьлан надыр шотеш конденыт.12Ача-кочаштын Господь Юмыштым уло шӱм-чон дене кычалаш манын, нуно ойпидышым ыштеныт.13А кӧ Израильын Господь Юмыжым кычалаш ок тӱҥал – тудо самырык але шоҥго, пӧръеҥ але ӱдырамаш лийже – пуштмо лийшаш.14Той пуч ден тӱкӧ пучын йӱкшӧ почеш кугу йӱкын, кычкырен, нуно Господьлан товатмутым пуэныт.15Пӱтынь Иуда товатмутым пуымыжлан куанен, вет тиде товатмут нунын шӱм-чонышт гыч лектын. Нуно Тудым тыршен кычалыныт да муыныт. Господь нунылан чыла велымат тыныслыкым пуэн.16Аса кугыжа эсогыл Мааха аважым Ашера меҥгым ыштымыжлан кугыжан аваже лӱм деч посна коден. Аса тиде меҥгым руэн шалатен да Кедрон йогын воктене йӱлалтен.17Кеч тудо Израильыште кӱкшакасе кумалме верлам пытарен огыл, но илыме чыла кечылаштыже Господьлан уло шӱм-чонжо дене ӱшанле лийын.18Господьлан пӧлеклыме шийым, шӧртньым да ате-влакым, кудым ачаже да шкеже пуэныт, тудо Юмын пӧртышкӧ пуртен.19Асан кумло визымше ий вуйлатымыж марте сар лийын огыл.
Institute for Bible Translation, Finland