2 Кур.кн16
1Асан кумло кудымшо ий вуйлатымыж годым Вааса, Израиль кугыжа, Иуда ваштареш сар дене лектын. Иуда кугыжа Аса деке нигӧ пурен да лектын ынже керт манын, тудо Рама олам чоткыдемдаш тӱҥалын.2Тунам Аса Господьын пӧртшын да кугыжан пӧртын поянлыкым погымо верлаштыже улшо ший ден шӧртньым налын да Венадад деке, Дамаскыште илыше Сирий кугыжа деке, колтен. Тудо тыге каласен:3«Мыйын ачам ден тыйын ачат коклаште ойпидыш лийын, тек тыгай ойпидыш мемнан коклаштат лиеш. Теве мый тылат ший ден шӧртньым колтем. Израиль кугыжа Вааса дене ыштыме ойпидышетым кӱрл, тек тудо мый дечем чакнен кая».4Венадад Аса кугыжам колыштын. Тудо шке сарзывуйжо-шамычым Израиль ола-влак ваштареш колтен. Нуно Ийоным, Даным, Авелмаимым да Неффалим мландын шапашым аралыме олаже-влакым руалтен налыныт.5Тидын нерген колмеке, Вааса кугыжа Рама олам чоткыдемдымыжым чарнен.6Аса кугыжа уло Иуда калыкым поген, да нуно Рама гыч Ваасан чоткыдемдымыж годым кучылтмо кӱ ден пырня-влакым луктыныт. Нунын дене тудо Гева ден Мицпам чоҥен шогалтен.7Тиде жапыште Иуда кугыжа Аса дек ончыкужшо Ананий толын да каласен: «Тый шке Господь Юметлан огыл, а Сирий кугыжалан инаненат. Садланак Сирий кугыжан сарзывийже тыйын кидет деч утарыме лийын.8Эфиоп ден ливий-влакын сарзывийышт пеш кугу, шуко орва ден имнешкан лийын огыл мо? Но тый тунам Господьлан инаненат, сандене Тудо нуным тыйын кидышкет пуэн.9Вет Господьын шинчаже пӱтынь мландым онча – кӧмыт Тудлан уло шӱм-чон дене ӱшанле улыт, нунылан Тудо полша. Кызыт тый ушдымын ыштенат, сандене тидын деч вара тый денет сар-влак лияш тӱҥалыт».10Аса ончыкужшылан шыдешкен да тудым казаматыш петырен – нине мут-влак кугыжам пеш чот сырыктеныт. Тиде жапыште Аса шке калыкше кокла гыч моло еҥымат шыгыремдылын.11Асан чыла пашаже, тӱҥалтыш гыч мучаш марте, «Иуда ден Израиль кугыжа-влакын курымсерыш книгаштышт» возымо улыт.12Кумло индешымше ий кугыжаланымыж годым Асан йолжо пеш чот коршташ тӱҥалын. Но черын вияҥмекыжат тудо Господь деке савырнен огыл, а эмлызе-влаклан инанен.13Аса нылле икымше ий кугыжаланымыж годым колен да шке кугезыж-влак деке ушнен.14Тудым Давид-Олаште, шке ямдылыме курыкпомышешыже тоеныт. Асам пыштыме верым тамлыпушым лукшо наста, тӱрлӧ тамле пушан ӱй дене теменыт да тудын лӱмеш кугу тулотым ылыжтеныт.
Institute for Bible Translation, Finland