2 Кур.кн14
1Вара Авий шке кугезыж-влак деке ушнен, тудым Давид-Олаште тоеныт. Олмешыже кугыжалан Аса эргыже шогалын. Тудын вуйлатымыж годым элыште тыныс илыш лу ий лийын.2Аса шке Господь Юмыжо ончылно поро да чын пашам ыштен.3Тудо йот жертвенник ден кӱкшакасе кумалме верлам пытарен, онакӱ-влакым шалатен, Ашера меҥге-шамычым руэн шуэн.4Иуда эрге-влаклан Господьым, ача-кочаштын Юмыштым, кычалаш да Тудын законжо ден кӱштымашыж-влакым шуктен шогаш кӱштен.5Иудан чыла олаштыже тудо кӱкшакаласе кумалме вер ден тӱтырымӧ жертвенник-влакым кораҥден. Аса вуйлатыме годым элыште тыныс илыш лийын.6Тыныс ийлаште тудо Иуда мландыште ола-влакым чоткыдемден. Тиде жапыште Аса дене нимогай сар лийын огыл – Господь тудлан тынысым пӧлеклен.7Аса Иуда эрге-влаклан каласен: «Нине олам чоткыдемдена, йырышт башнян, капка ден тӱкылтышан пырдыжым нӧлтена. Тиде мланде эше мемнан кидыште, вет ме Господь Юмынан чурийжым кычалына. Ме Тудым шотлен илена, сандене Тудо мыланна чыла велымат тыныслыкым пуэн». Нуно ола-влакым чоҥаш пижыныт, паша воранен каен.8Асан сарзывийже тыгай улмаш: Иуда тукым гыч кумшӱдӧ тӱжем еҥ – нунын саргуралышт авыртыш ден умдо лийын, да Вениамин тукым гыч кокшӱдӧ кандашле тӱжем еҥ – нунын саргуралышт авыртыш ден йоҥеж улмаш. Нине еҥ чыланат тале сарзе лийыныт.9Нунын ӱмбак сар дене эфиоп Зерах шке тӱжем-тӱжемле сарзывийже да кумшӱдӧ орваж дене лектын. Кунам тудо Мареша ола деке толын шуын,10ваштарешыже Аса лектын. Кредалаш манын, нуно Мареша воктенысе Цефат лапверыште рат дене шогалыныт.11Аса шке Господь Юмыжым йодын кумалын: «Господь, вийдымылан виян ваштареш шогаш Тый дечет моло нигӧ ок полшо. Тугеже полшо мыланна, Господь Юмына! Вет ме Тыланет инанена, тиде кугу тӱшка ваштареш Тыйын лӱмет дене лектынна. Господь, Тый мемнан Юмына улат, тек Тыйым айдеме ок сеҥе!»12Господь эфиоп-влакым Аса ден Иуда эрге-шамычын шинча ончылнышт кырен шалатен. Эфиоп-влак куржыныт,13Аса ден тудын калыкше нуным Герар марте поктен каеныт. Эфиоп-шамыч чыланат пытеныт, илыше иктат кодын огыл – нуно Господь да Тудын сарзывийже ончылно пытарыме лийыныт. Иуда эрге-влак пеш шуко погым руалтен налыныт.14Нуно Герар йыр улшо чыла олам шалатеныт, вет тушто илыше-шамычым Господь дечын лӱдмаш авалтен улмаш. Чыла нине олам Иуда эрге-влак аген лектыныт, тушечын пеш шуко погым наҥгаеныт.15Тыгак нуно кӱтӱчӧ-влакын омашышт ӱмбаке керылтыныт, пеш шуко тыгыде вольык ден верблюдым руалтен налыныт. Вара Иерусалимыш пӧртылыныт.
Institute for Bible Translation, Finland