2 Кур.кн1
1Соломон, Давид эрге, кугыжан престолышто вий-куатым поген. Господь Юмыжо пеленже лийын да тудым пеш чот нӧлталын.2Соломон пӱтынь Израильым – тӱжемвуй ден шӱдывуй-влакым, судья-шамычым да Израильын чыла вуйлатышыжым, тукымвуйжым – поген.3Соломон ден погынышо-влак чыланат Гаваон кӱкшакасе святой верыш каеныт. Тушто Юмо дене вашлийме омаш лийын, тудыжым Господьын Моисей тарзыже ир мландыште ыштен улмаш.4А Юмын шондыкым Давид Кириаф-Иарим гыч Иерусалимыш конден, тушто тудлан лӱмын омашым шогалтен улмаш.5Но той жертвенник – кудым Веселеил, Урийын эргыже, Хурын уныкаже, ыштен – Гаваонышто, Господьын скинийже ончылно, кодын. Тушто Соломон погынышо-влак дене пырля Господь деч каҥашым йодын.6Тиде верыште, Господь чурий ончылно, Юмо дене вашлийме омаш ончылнысо той жертвенникеш Соломон тӱжем вуй вольыкым йӱлалтен пуымо надырлан конден.7Тудо йӱдым Соломонлан Юмо кончен да каласен: «Йод, мо тыланет кӱлеш».8Соломон Юмылан ойлен: «Тый Давидлан, мыйын ачамлан, кугу порылыкым ончыктенат да олмешыже кугыжалан мыйым шогалтенат.9Господь Юмем, тек Тыйын Давид ачамлан сӧрымӧ шомакет шукталтеш. Тый мыйым мланде пурак наре шуко чотан калыкын кугыжажлан шогалтенат.10Тиде калыкым вуйлаташ манын, мылам мунлылык ден шинчымашым пу. Уке гын Тыйын тиде кугу калыкетым кӧ вуйлатен кертеш?»11Юмо Соломонлан вашештен: «Тиде тыйын чон кумылет лийын. Тый шкаланет поянлыкым, погым, чапым, тушман-влакетлан колымашым, тыгак кужу ӱмырым огыл, а Мыйын калыкем вуйлаташ мунлылык ден шинчымашым йодынат. Тиде калыкын кугыжажлан Мый тыйым Шке шогалтенам.12Сандене мунлылык ден шинчымаш тылат пуымо лийыт. Тидын деч посна Мый тылат тыгай поянлыкым, погым да чапым пуэм, могайже тый дечет ончыч да тый дечет вара лийше кугыжа-влакын нигӧнат лийын огыл да огеш лий».13Тидын деч вара Соломон Гаваон кӱкшакасе святой вер гыч, Юмо дене вашлийме омаш деч, Иерусалимыш толын да Израильым вуйлатен.14Соломон шкаланже сарлык орван да имнешкан сарзывийым поген. Тудын тӱжем нылшӱдӧ орва ден латкок тӱжем имнешкыже лийын. Нуным орван сарзывийлан ойырымо олалаште да шкеж дене Иерусалимыште кучен.15Тудын кугыжаланымыж годым Иерусалимыште ший-шӧртньӧ тыглай кӱ наре, а кедр гын лоп верыште кушшо ир смоква пушеҥге наре лийыныт.16Имньым гын Соломонлан Египет ден Кува гыч конденыт. Кугыжан купечше-влак нуным Куваште оксала налыныт.17Орвам Египет гыч кудшӱдӧ сикль шийлан, а имньым шӱдӧ витле сикльлан конденыт. Купеч-влак нуным хеттей ден арамей кугыжа-шамычланат конден шогеныт.
Institute for Bible Translation, Finland