1 Кур.кн29
1Давид кугыжа уло погынымашлан каласен: «Мыйын Соломон эргым – лач тудым Юмо ойырен налын – самырык да эше вийым поген огыл. А тиде паша пеш кугу, вет тиде полат айдемылан огыл, а Господь Юмылан.2Мый шке Юмемын пӧртшылан мом кертынам, чыла погенам: шӧртньӧ ӱзгарлан – шӧртньым, ший ӱзгарлан – шийым, той ӱзгарлан – тойым, кӱртньӧ ӱзгарлан – кӱртньым, пу ӱзгарлан – пушеҥгым, тыгак оникс кӱм, пуртен шындышаш кӱм, тӱрлӧ тӱсан мотор кӱм, моло тӱрлӧ шергакан кӱм да шуко мраморым.3Святой пӧртлан ямдылыме тиде шапаш деч посна, шке Юмемын пӧртшым йӧратен, мый эше шкемын погымо шӧртньӧ ден ший поянлыкем Юмемын пӧртшылан пуэм:4кум тӱжем талант шӧртньым – Офирысе шӧртньым – да шым тӱжем талант яндар шийым. Нуно пӧрт пырдыжым кӧргӧ гыч комыжлаш,5шӧртньӧ ден ший ӱзгарлан да кидмастар-влакын тӱрлӧ пашаштлан кучылтмо лийыт. Господьлан надырым таче эше иктаж-кӧ кондынеже мо?»6Тунам Израильысе урлыквуй ден тукымвуй, тӱжемвуй ден шӱдывуй-шамыч да кугыжан погыжлан вуйын шогышо-влак шке кумылын кондаш тӱҥалыныт.7Нуно Юмын пӧртым чоҥымо пашалан чылаже вич тӱжем талант ден лу тӱжем дарик шӧртньым, лу тӱжем талант шийым, латкандаш тӱжем талант тойым да шӱдӧ тӱжем талант кӱртньым пуэныт.8Кӧн шергакан кӱжӧ лийын, нуно тудым Господьын пӧртшын поянлык аралыме верышкыже Гирсон тукым Иехиилын кидышкыже кучыктеныт.9Калык шке вуйлатышыже-влакын Господьлан тыге пуымыштлан куанен, вет нунышт тидым уло шӱм-чон дене ыштеныт. Давид кугыжанат куанже пеш кугу лийын.10Давид уло погынымаш ончылно Господьым чапландарен каласен: «Господь, Израиль ачанан Юмыжо, Тый курым-курымеш чапландарыме улат!11Господь, кӱдыратлык ден куат, алтылык, чап ден сеҥымаш Тыйын улыт, вет мо каваште да мландыште уло – тиде чыла Тыйын. Кугыжанышат, Господь – Тыйын, чыла деч кӱшнӧ Тый улат!12Поянлык ден чап – Тый дечет, Тый чыла дене озаланет, вий-куат – Тыйын кидыштет, кеч-кӧм Тый кӱшкӧ нӧлталын да пеҥгыдемден кертат!13Юмына, кызыт ме Тыйым чаплена да Тыйын кӱдыратле лӱметым моктена.14Но тыгай пӧлекым ышташ мый кӧ улам да кӧ мыйын калыкем? Вет чыла тиде – Тый дечет, Тыйын кидет гыч налмым ме Тылат пуэнна.15Тыйын шинча ончылнет ме, кугезына-влак семынак, жаплан илаш толшо ӧрдыжъеҥ улына. Мландымбалне илыме кечына – ӱмыл гае, мучашдыме нимо уке.16Господь Юмына! Чыла тиде шапашым, кудым Тыйын святой лӱметлан пӧртым чоҥаш ямдыленна – ме Тыйын кидет гыч налынна, тудо – Тыйын.17Тый шӱм-чоным тергет да шӱм яндарлыкым йӧратет – тидым мый палем, Юмем. Чыла тиде пӧлекым мый Тылат яндар шӱм-чон дене пуышым. Кызыт ужам: тыште улшо калыкат Тыланет куанен пуа.18Господь, Авраам, Исаак да Израиль ача-кочана-влакын Юмыжо! Шке калыкетын тыгай яндар шӱм-чон шонымашыжым курымешлан арален кодо, нунын шӱмыштым Шке декет виктаре.19Мыйын Соломон эргымлан Тыйын кӱштымашет, сугынет да пунчалет-влакым шуктен шогаш да пӧртым чоҥаш – тидлан мый чыла ямдыленам – яндар шӱм-чоным пу».20Вара Давид уло погынымашлан каласен: «Господь Юмынам чапландарыза!» Тушто улшо-влак чыланат ача-кочаштын Господь Юмыштым чапландареныт, Господь да кугыжа ончылно кумык возыныт.21Вес кечынже нуно Господьлан йӱлалтен пуымо да моло тӱрлӧ надырым конденыт: тӱжем вуй ӱшкыжым, тӱжем вуй тагам, тӱжем вуй пачам, тыгак нунын пелен йошкар арака надырым да пӱтынь Израиль верч шуко надырым.22Тудо кечын нуно Господь ончылно кугу куан дене кочкын-йӱыныт. Вара Давидын Соломон эргыжым кокымшо гана кугыжалан шогалтеныт да Господь ончылно тудым эл вуйлатышылан, а Садокым иерейлан шӱрен палемденыт.23Соломон шке Давид ачаже олмеш Господьын престолышкыжо кугыжа семын шинчын. Соломонын пашаже воранен толын, тудым пӱтынь Израиль колыштын.24Чыла вуйлатыше ден тале сарзе, тыгак Давид кугыжан моло эргыже Соломон кугыжан кид йымакше шогалыныт.25Господь Соломоным пӱтынь Израиль шинча ончылно кӱшкӧ нӧлталын, тудлан тугай чапым пуэн, могайже Израильыште эше ик кугыжанат лийын огыл.26Давид, Иессей эрге, пӱтынь Израильын кугыжаже лийын.27Тудо Израильыште нылле ий кугыжаланен: Хевронышто шым ий да Иерусалимыште кумло кум ий.28Кужу да тӱвыргӧ ӱмырым илен эртарымеке, поян да чапланыше, тудо колен. Тудын олмеш кугыжалан Соломон эргыже шогалын.29Давид кугыжан ыштыме чыла пашаже, икымше гыч пытартыш марте, ончыкужшо Самуилын, пророк Нафанын да ончыкужшо Гадын возымаштышт серыме улыт.30Тушто Давидын кугыжаланымыже, вий-куатше, тыгак тудын дене, Израиль дене да мландымбалысе моло кугыжаныш дене мо лийын шогымо нерген ойлалтеш.
Institute for Bible Translation, Finland