1 Куг7
1Кириаф-Иаримыште илыше-влак толыныт, Господьын шондыкшым налыныт да чоҥгата ӱмбаке, Авинадавын суртышкыжо, конденыт. А тудын Елеазар эргыжым Господьын шондыкшым аралаш святитлен шогалтеныт.2Шондыкым Кириаф-Иаримеш кодымо деч вара ятыр жап эртен, иктаж коло ий. Уло израиль калык Господь деке савырнен.3Самуил нунылан каласен: «Те Господь деке уло шӱмда дене савырнеда гын, шкендан кокла гыч йот юмо-влак ден Астарта-влакым кораҥдыза. Шке шӱмдам Господь деке савырыза да ик Тудлан гына кумалза. Тунам Господь тендам филистим-влакын кидышт деч утара».4Израиль эрге-шамыч Ваал ден Астарта юмо-влакым кораҥденыт да ик Господьлан веле кумалаш тӱҥалыныт.5Самуил каласен: «Чыла израильтян-влакым Мицпаште погыза, мый тендан верч Господьлан кумалам».6Нуно Мицпаште погыненыт, вӱдым кошталын, Господь ончылно йоктареныт да, тиде кечын пӱтым кучен, тыге ойленыт: «Господь ончылно ме сулыкыш пуренна». Мицпаште Самуил израиль эрге-влакын ӱчашымашым лукшо пашаштым судитлен.7Израиль эрге-шамычын Мицпаште погынымышт нерген филистим-влак пален налыныт. Тунам филистим вуйлатыше-шамыч Израиль ваштареш тарваненыт. Тидын нерген колмеке, израильтян-влак филистим-шамыч деч лӱдыныт.8Нуно Самуиллан каласеныт: «Господь Юмына филистим-влакын кидышт деч утарыже манын, мемнан верч Тудлан кумалметым ит чарне». [Самуил манын: «Господь Юмем деч мый ом кораҥ да тендан верч кумалмем ом чарне».]9Самуил ава шӧрым кочшо пачам налын, [уло калык дене пырля] тудым Господьлан йӱлалтен пуэн да Израиль верч Господьым сӧрвален кумалын. Господь тудым колын.10Кунам Самуил йӱлалтен пуымо надырым конден, филистим-влак Израиль дене кредалаш толыныт. Но Господь тудо кечын филистим-шамыч ӱмбалне куатле кӱдырчӧ дене кӱдыртен да нуным кугу лӱдмашыш пуртен. Израиль нуным кырен шалатен.11Израильтян-влак Мицпа гыч лектыныт да филистим-шамычым поктен куржыныт, нуным Вефхор марте да умбакыла пуштеден каеныт.12Самуил ик кӱм налын да тудым Мицпа ден Сен коклашке шогалтен, тудлан Авен-Езер лӱмым пуэн да тыге каласен: «Господь мыланна тиде вер марте полшен».13Тыге филистим-влак сеҥалтыныт, да нуно тетла израиль мландыш коштмыштым чарненыт. Самуилын илыме чыла кечылаштыже филистим-влак ӱмбалне Господьын кидше лийын.14Филистим-шамычын Израиль деч налме ола-влак Екрон деч Геф марте Израильлан пӧртылтымӧ лийыныт. Нунын воктенысе кундем-влакымат Израиль филистим-шамыч деч мӧҥгеш налын. Израиль ден аморрей-влак тунам келшен иленыт.15Самуил чыла илыме кечылаштыже Израильын судьяже лийын.16Ий гыч ийыш тудо Вефильыш, Галгалыш да Мицпаш коштын. Нине верлаште тудо израиль калыкым судитлен,17вара Рамаш пӧртылын. Рамаште тудын пӧртшӧ лийын, туштат Самуил Израильым судитлен. Тушан тудо Господьлан жертвенникым чоҥен.
Institute for Bible Translation, Finland