1 Куг8
1Шоҥгеммекыже, Самуил Израильын судьяштлан шке эргыже-влакым шогалтен.2Кугу эргыжын лӱмжӧ Иоиль, а кокымшыжын Авий лийын. Нуно Вирсавийыште судья лийыныт.3Но эргыже-влак ачаштын корныжым тошкен огытыл, а шкаланышт пайдам кычалше лийыныт: пӧлекым наледеныт да чын огыл судитленыт.4Израильын кугуракше-влак чыланат погыненыт да Самуил деке Рамаш толыныт.5Нуно тудлан каласеныт: «Тый ынде шоҥгемынат, а эргыч-влак корнетым огыт тошко. Мыланна кугыжам шогалте: тек тудо, моло калыкын семынак, мемнам вуйлата да судитла».6«Мыланна кугыжам шогалте, тек тудо мемнам вуйлата да судитла» манмышт Самуиллан келшен огыл. Тудо Господьлан кумалын.7Господь Самуиллан каласен: «Калыкым колышт, чыла мом йодмыжым шукто. Нуно тыйым огыл, а Мыйым ӧрдыжкӧ шӱкалыныт. Мыйым нуно шке кугыжашт семын ынешт уж.8Египет гыч лукмо кече гыч таче кече марте нуно, Мый дечем кораҥын, вес юмо-влаклан кумалыныт. Мом нуно Мый денем ыштеныт, тидым кызыт тый денет ыштат.9Йодмыштым шукто, но нуным пеҥгыдын шижтаре да вуйлаташ тӱҥалше кугыжан могай кертыжше лиеш, каласе».10Тудын деч кугыжам йодшо калыклан Самуил Господьын чыла шомакшым ойлен пуэн.11Тудо каласен: «Тендам вуйлаташ тӱҥалше кугыжан теве могай кертыжше лиеш: тудо эргыдам налеш да шке сарлык орваже-влак пелен служитлаш шогалта, шке имнешкыже-влакым ышта, тыгак нуно орваже ончылно тудым куржын ужаташ тӱҥалыт.12Иктыштым кугыжа шкеж пелен тӱжемвуй ден витльывуйлан шогалта, весыштым шке пасужым курал-ӱдаш, шурныжым тӱредаш, шкаланже саргурал ден орвалык ӱзгар-влакым ышташ шогалта.13Ӱдырда-влакым тудо тамлыпушан ӱйым ышташ, кочкышым шолташ да киндым кӱэшташ налеш.14Эн сай пасудам, виноград ден олив пакчадам тудо поген налеш да шкенжын тарзыж-шамычлан пуа.15Шурно ден виноградда деч луымшо ужашым налеш да шке евнухшо ден тарзыже-влаклан пуа.16Тудо пӧръеҥ ден ӱдырамаш кул-влакдам, эн сай рвезе-шамычдам, осёл-влакдам налеш да шке пашаштыже кучылташ тӱҥалеш.17Тыгыде вольыкда деч луымшо ужашым налеш, да те шкежат тудын кулжо лийыда.18Шкаланда ойырен налме кугыжада ӱмбаке те вуйым шияш тӱҥалыда, но Господь тунам тыланда ок вашеште».19Но калык Самуилын ойлымыжым колыштын огыл да манын: «Уке, тек мемнам кугыжа вуйлата.20Меат моло калык гай лийына: мемнам шке кугыжана вуйлаташ да судитлаш тӱҥалеш, тудо мемнан ончыч кая да сарым вуйлата».21Самуил калыкын чыла ойлымыжым колыштын да Господьлан каласкален пуэн.22Господь Самуиллан тыге вашештен: «Йодмыштым шукто – нунылан кугыжам шогалте». Самуил израильтян-влаклан каласен: «Кажныже шке олашкыда кайыза».
Institute for Bible Translation, Finland