1 Куг6
1Господьын шондыкшо Филистим кундемыште шым тылзе лийын, [да тиде мланде коля дене темын].2Филистим-шамыч онаеҥ-влакым, ончыкужшо [ден юзо-шамычым] ӱжыныт да йодыныт: «Господьын шондыкшо дене мыланна мом ышташ? Ойым пуыза, кузе тудым шке верышкыже колташ?»3Нунышт вашештеныт: «Израиль [Господь] Юмын [ойпидыш] шондыкшым пӧртылтынеда гын, тудым нимо деч посна ида колто. Тудлан титак верч надырым кондыза. Тунам те паремыда да пален налыда: молан Тудын кидше тендан деч ок кораҥ».4Филистим-влак йодыныт: «Тудлан ме титак верч могай надырым кондышаш улына?» Нунышт каласеныт: «Филистим вуйлатыше-влакын мыняр улмыштым шотыш налын, вич шӧртньӧ мугыльым да вич шӧртньӧ колям пуыза, вет тендам да вуйлатышыда-влакым ик тӱрлӧ орлык авалтен.5Тугеже, мландыдам пустаҥдыше мугыльо ден коля-влакын тӱсыштым шӧртньӧ гыч велен ыштыза, тидын дене Израиль Юмо дек пагалымашдам ончыктыза. Очыни, тунам Тудо тендан ӱмбач, тыгак юмыда ден мландыда ӱмбач шке кидшым кораҥда.6Молан тыланда египтян-влак да фараон семын шӱмдам вустыкым ышташ? Вет кунам Господь шке вийжым ончыктен, нунылан израильтян-шамычым колташышт логалын, да нунышт каеныт.7Тугеже, ыштыза ик у орвам, налза кок ушкалым – шукерте огыл презым ыштышым, ик ганат омытам чиктыдымым. Нуным орваш кычкыза, а презыштым мӧҥгышкышт наҥгаен кодыза.8Господьын шондыкшым налза да орвашке шындыза, а титак верч надырлан кондымо шӧртньӧ арвер-влакым шондык воктек вераҥдыме яшлыкыш пыштыза. Тидын деч вара шондыкым колтыза, тек кая.9Тудым эскерыза: шондык шке мландыж велке, Вефсамис могырыш, кая гын, тиде кугу орлыкым мыланна Господь колтен. А уке гын, палаш тӱҥалына: мемнам Тудын кидше пытарен огыл, тиде вес амаллан кӧра лийын».10Нуно тыгак ыштеныт: шукерте огыл презым ыштыше кок ушкалым орвашке кычкеныт, а презыштым мӧҥгешышт коденыт.11Орвашке Господьын шондыкшым, тыгак шӧртньӧ коля ден мугыльо-влакым пыштыме яшлыкым шынденыт.12Ушкал-влак вигак Вефсамисыш наҥгайыше корно дек каеныт. Нуно ик корно денак ломыж-ломыж каеныт – пурлашкат, шолашкат кораҥын огытыл. Филистим вуйлатыше-шамыч нунын почеш Вефсамис кундем марте миеныт.13Вефсамисыште илыше-влак тунам лапверыште шыдаҥым тӱредыныт. Вуйыштым нӧлталмеке, нуно Господьын шондыкшым ужыныт да куаненыт.14Орва Вефсамисыште илыше Иисусын пасушкыжо толын да тушан шогалын. Тушто кугу кӱ киен. Орвам пулан шелыныт, а ушкал-влакым Господьлан йӱлалтен пуымо надыр шотеш конденыт.15Левит-влак Господьын шондыкшым, воктеныже улшо шӧртньӧ арверан яшлыкым налыныт да саде кугу кӱ ӱмбаке шынденыт. Вефсамисыште илыше-шамыч тиде кечын Господьлан йӱлалтен пуымо надыр ден моло вольык надырым конденыт.16Тидым ужмеке, вич филистим вуйлатыше тудо кечынак Екроныш пӧртылын.17Филистим-влакын Господьлан титак верч надыр шотеш кондымо шӧртньӧ мугыльо-влак икте Азот верч, икте Газа верч, икте Аскалон верч, икте Геф верч, икте Екрон верч лийыныт.18Шӧртньӧ колят визыт лийын. Нунын чотышт вич филистим вуйлатыше, нунын чоткыдемдыме олашт да йырышт улшо ял-влак дене келшен толын. А Господьын шондыкшым шындыме кугу кӱ Вефсамисыште илыше Иисусын пасуштыжо таче кечынат кия.19[Господьын шондыкшым ужмылан Вефсамисыште илыше-влак кокла гыч Иехоний эрге-шамыч гына куанен огытыл.] Тудын шондыкшым почын ончымылан Господь Вефсамисыште илыше-влакым пытарен, калык кокла гыч витле тӱжемат шымле еҥым пуштын. Господьын калыкым тыге чот пытарымыжлан калык шортын.20Вефсамисыште илыше-влак каласеныт: «Господь ончылно, тиде Святой Юмо ончылно, кӧ шоген кертеш? Мемнан деч Тудо иктаж-кӧ весе деке кайыже ыле!»21Нуно уверзе-влакым Кириаф-Иаримыште илыше-шамыч деке тыге каласаш колтеныт: «Филистим-влак Господьын шондыкшым пӧртылтеныт. Толза да шкендан деке наҥгайыза».
Institute for Bible Translation, Finland