1 Куг5
1Филистим-влак Юмын шондыкым налыныт да Авен-Езер гыч Азот олаш конденыт.2Тушто нуно тудым шке Дагон юмыштын храмышкыже пуртеныт да Дагонын статуйжо воктеке шынденыт.3Азотышто илыше-влак эрлашыжым эрдене эр кынелыныт да ужыныт: Дагон юмышт Господьын шондыкшо ончылно кумык кия. Нуно Дагоным нӧлталыныт да уэш шке верышкыже шогалтеныт.4Кунам нуно вес кечын эрдене эр кынелыныт, Дагон адакат Господьын шондыкшо ончылно кумык киен. Дагонын вуйжо, [кок йолжо да] кок кидшат катленыт, омсалондемыште киеныт. Тудын капораже веле тичмаш кодын.5Садлан Дагонын онаеҥже-влак да Азотыш Дагонын храмышкыже толшо чыла еҥ таче мартеат Дагонын омсалондемышкыже йолышт дене огыт логал, [тудым вончен каят].6Азотышто илыше-влак ӱмбалне Господьын кидше неле лийын: Тудо нуным капыштышт мугыльо лекме дене чуриктарен. Азотышто да йыр улшо кундемлаште [коля чот пошен, олаште кугу орлык шоген].7Азотышто илыше-влак тидым ужыныт да каласеныт: «Израиль Юмын шондыкшо мемнан дене ынже код, вет мыланна да Дагон юмыланна Тудын кидше пеш неле».8Нуно чыла филистим вуйлатышым ӱжаш колтеныт. Нуным погеныт да каласеныт: «Израиль Юмын шондыкшо дене мыланна мом ышташ?» [Гефыште илыше-влак] каласеныт: «Тек Израиль Юмын шондыкшым [мемнан деке] Гефыш кондат». Тыге Израиль Юмын шондыкшым Гефыш колтеныт.9Шондыкым кондымо деч вара Господьын кидше тиде ола ӱмбалне лийын – еҥ-влакым кугу шучкылык авалтен. Олаште илыше-влакым, изи гыч кугу марте, Господь чер дене чуриктарен: нунын капыштышт мугыльо-влак лектыныт.10Юмын шондыкым нуно Екроныш колтеныт. Кунам Юмын шондыкшо Екроныш толын шуын, тушто илыше-влак кычкыраш тӱҥалыныт: «Мемнам да калыкнам пушташ манын, Израиль Юмын шондыкшым мемнан деке конденыт!»11Нуно чыла филистим вуйлатыше-влакым ӱжаш колтеныт. Нуным погеныт да каласеныт: «Израиль Юмын шондыкшым тышеч колтыза. Мемнам да калыкнам ынже пытаре манын, тек тудо шке верышкыже пӧртылеш». Колымашын шучкылыкшо уло олам авалтен улмаш: [Израиль Юмын шондыкшо толмеке,] нунын ӱмбалне Господьын кидше пеш неле лийын.12Кӧмыт илыше кодыныт, чыланат мугыльо лекме чер дене орланеныт, да варгыжме йӱк ола гыч кава марте нӧлталтын.
Institute for Bible Translation, Finland