1 Куг16
1Господь Самуиллан каласен: «Саул верч эше мыняре ойгыраш тӱҥалат? Тетла тудо Израильын кугыжаже ынже лий манын, Мый тудым кораҥденам. Тӱкышкет елейым теме да кай. Мый тыйым Вифлеемыште илыше Иессей деке колтем, тудын эргыж-влак кокла гыч Мый Шкаланем кугыжам ойыренам».2Самуил каласен: «Кузе мый каем? Саул пален налеш гын, мыйым пуштеш». Господь каласен: «Пеленет кӱтӱ гыч тунам нал да каласе: ”Мый Господьлан надырым пуаш толынам”.3Надыр кондымашке Иессейым [да тудын эргыже-влакым] ӱж. Мом тылат ышташ – Мый ончыктем, да кӧм Мый каласем, тудым кугыжалан шӱрен палемде».4Самуил Господьын кӱштымыж семынак ыштен. Кунам тудо Вифлеемыш толын, оласе кугурак-влак ваштарешыже лӱдын-чытырен лектыныт да йодыныт: «Тыныс дене толынат мо?»5Тудо вашештен: «Тыныс дене. Мый Господьлан надырым пуаш толынам. Шкендам эрныктен святитлыза да мый денем пырля надырым кондаш мийыза». Вара тудо Иессей ден эргыж-влакым святитлен да нуным надыр кондымашке ӱжын.6Нунын толмекышт, Елиавым ужын, Самуил шоналтен: «Мутат уке, Господь ончылно шогышо тиде эрге – Тудын шӱрен палемдышаш еҥже!»7Но Господь Самуиллан каласен: «Тудын сынжым да кугу капшым ит ончо. Тудым Мый Шкем дечын шӱкалынам. Мый айдеме семын ом ончо. Айдеме тӱжвал тӱсым онча, а Господь – шӱмым».8Иессей тидын деч вара Авинадавым ӱжын да Самуил деке конден шогалтен. Самуил каласен: «Господь тидымат ойырен налын огыл».9Вара Иессей Шаммам конден. Самуил манын: «Господь тидымат ойырен налын огыл».10Тыге Иессей шым эргыжым конден, но Самуил тудлан каласен: «Нунын кокла гыч Господь нигӧжымат ойырен налын огыл».11Самуил Иессей деч йодын: «Чыла эргыч тыште мо?» Иессей вашештен: «Эше эн изи уло. Тудо шорыкым кӱта». Самуил Иессейлан каласен: «Тек кондат. Тудын толмешкыже, ме ӱстелтӧрыш огына шич».12Иессей эргыж деке колтен, да тудым конденыт. Тудо чевер чуриян, мотор шинчан, йытыра тӱсан лийын. Господь каласен: «Теве тиде. Кынел, тудым шӱрӧ».13Самуил елейым пыштыман тӱкыжым налын да изаже-влак ончылно Давидым шӱрен. Тиде кече гыч да варажат Давид ӱмбалне Господьын Шӱлышыжӧ лийын. А Самуил Рамаш каен.14А Саул деч Господьын Шӱлышыжӧ кораҥын, тудым ынде Господьын колтымо осал шӱлыш орландарен.15Саулын тарзыже-влак тудлан темленыт: «Теве, Юмын колтымо осал шӱлыш тыйым орландара.16Тек озана тарзыж-влаклан кӱсле дене сайын шоктышо еҥым кычалаш кӱшта. Кунам ӱмбакет Юмын колтымо осал шӱлыш толеш, тиде еҥ кӱслем шоктымыж дене тыйым лыпландараш тӱҥалеш».17Саул шке тарзыж-влаклан кӱштен: «Кӱслем сайын шоктышо еҥым муза да мый декем кондыза».18Тунам тарзыж-влак кокла гыч иктыже каласен: «Мый Вифлеемыште илыше Иессейын эргыжым ужынам. Тудо шоктен мошта, виян да тале сарзе, кутырымаште ушан-шотан, сынжат шинчалан перныше. Господь – тудын пеленже».19Саул Иессей деке уверзе-влакым тыге каласаш колтен: «Мый декем Давидым, кӱтӱ пелен улшо эргычым, колто».20Иессей осёл тупыш киндым пӧштыртен, Давидлан эше йошкар арака шувыш ден ик казапачам пуэн да чыла тидым эргыж пелен Сауллан колтен.21Давид Саул деке толын да тудын тарзыже лийын. Давид тудлан пеш келшен, да Саул тудым шке саргурал нумалшыжлан шогалтен.22Саул Иессейлан каласаш колтен: «Тек Давид мыйын пеленем лиеш, тудо мыйын ончылнем поро кумылым сулен налын».23Кунам Юмын колтымо шӱлыш Саул ӱмбалне лийын, Давид кӱслем налын да шоктен. Тунам Сауллан куштылгырак, сайрак лийын, да осал шӱлыш тудын деч кораҥын.
Institute for Bible Translation, Finland