1 Куг15
1Самуил Сауллан каласен: «Тыйым шке Израиль калыкшын кугыжажлан шӱрен шогалташ Господь мыйым колтен. Ынде Господьын йӱкшым колышт.2Господь Саваоф тыге ойла: ”Мый амалик калыкын Израильлан мом ыштымыжым шарналтышым. Тудо Израильын Египет гыч толмо корныштыжо тудын ваштареш шогалын.3Ынде кай да амалик [ден иерим] калыкым кырен шалате. Нунын мошт уло, чыла пытаре. [Нимом ит нал, мо улым Господьлан надыр шотеш пӧлеклен, чыла пытаре.] Нигӧм ит чамане: пӧръеҥ ден ӱдырамашым, йоча ден изи азам, ӱшкыж ден шорыкым, верблюд ден осёлым чыла пушт”».4Саул шке сарзыж-влакым поген да Телаимыште шотлен луктын. Чылаже кокшӱдӧ тӱжем йолешке да Иуда тукым гыч лу тӱжем еҥ лийын.5Саул амалик-влакын олашт деке миен шуын да тушто коремыште нуным ваҥаш шинчын.6Саул кеней-влаклан каласен: «Мылам тендам амалик-шамыч дене пырля пытараш огыл манын, нунын кокла гыч лекса, нунын деч ойырлыза. Вет израильтян-влакын Египет гыч толмышт годым те мемнан деке поро лийында». Кеней-шамыч амалик-влак кокла гыч лектыныт.7Саул амалик-влакым Хавила гыч Египет чек дене улшо Сур воктенысе верла марте пытарен каен.8Тудо амалик-влакын Агаг кугыжаштым илышым руалтен кучен, а уло калыкым керде дене пуштын, [тыгак иерим калыкым пытарен].9Но Саул ден тудын еҥже-шамыч Агагым, эн сай шорык ден ӱшкыж-влакым, коя пача-влакым да чыла сай арверым коденыт. Тидым пытарымышт шуын огыл, а чыла йӧрдымӧ ден начарым пытареныт.10Тунам Самуиллан Господьын шомакше лийын:11«Саулым кугыжалан шогалтымемлан ӧкынем, вет тудо Мый декем тупынь савырнен да Мыйын мутем шуктен огыл». Самуилын шӱм-чонжылан пеш чот каньысыр лийын, да тудо йӱдвошт Господьым ӱжын кумалын.12Самуил эрден эрак кынелын да Саул дене вашлияш каен. Самуиллан увертареныт: Саул Кармилыш миен коштын да тушан шкаланже чапкӱм шогалтен, [вара тушеч орважым мӧҥгеш колтен], а шкеже Галгалыш волен.13Кунам Самуил Саул деке толын, Саул тудлан каласен: «Тек Господь тыйым суапландара. Мый Господьын мутшым шуктышым».14Но Самуил йодын: «А могай шорык да ӱшкыж ломыжмо йӱк пылышемлан шокта?»15Саул вашештен: «Нуным амалик-влак деч кондымо. Господь Юметлан надырым кондаш манын, калык эн сай шорык ден ӱшкыж-влакым арален коден. Молыжым ме пытарен улына».16Самуил Сауллан каласен: «Шого, мом мылам Господь йӱдым ойлен, тудым мый тылат каласем». «Ойло», – вашештен Саул.17Самуил каласен: «Кунам тый Израиль тукым-влакын вуйлатышыштлан шогалынат, шкендым изиэш ужын отыл мо? Вет тунам Господь тыйым Израильын кугыжажлан шӱрен.18Тыйым Господь корныш колтен, тыге каласен: ”Кай да осалым ыштыше тиде амалик калыкым, Мыланем надыр шотеш пӧлеклен, пӱтынек пытаре, нуным кырен шалатымешке ваштарешышт кредал”.19Молан тый Господьым колыштын отыл да вольык ден погылан кержалтынат, Господь шинча ончылно осалым ыштенат?»20Саул Самуиллан каласен: «Мый Господьым колыштынам. Мый Господьын кӱштымыжым шукташ каенам да Амаликын Агаг кугыжажым кучен конденам, а амалик-влакым, Господьлан надыр шотеш пӧлеклен, пӱтынек пытаренам.21Но руалтен налме да пытараш кӱлмӧ вольык гыч калык эн сай шорык ден ӱшкыж-влакым арален коден. Калык нуным Галгалыште тыйын Господь Юметлан надыр шотеш кондаш шонен».22Самуил вашештен: «Можо Господьлан келша – йӱлалтен пуымаш ден надыр-влак але Тудын мутшым колыштмаш? Мут колыштмаш надырым кондымаш деч сайрак, Тудын кумылжым шуктымаш тага коя деч сайрак.23Мут колыштдымаш – юзыланымаш гаяк сулык, торешланымаш – шояк юмылан кумалме дене иктак. Господьын мутшо деч кораҥметлан Тудат тыйым [Израильын] кугыжаже улмет деч кораҥден».24Саул Самуиллан каласен: «Мый сулыкым ыштенам: Господьын кӱштымыжым да тыйын мутетым шуктен омыл. Мый калык деч лӱдынам да тудым колыштынам.25Но кызыт йодам, кудалте сулыкем да, мылам Господь [Юметлан] вуйым саваш манын, мый денем пырля пӧртыл».26Самуил Сауллан вашештен: «Мый тый денет ом пӧртыл, вет Господьын мутшо деч кораҥметлан Тудат тыйым Израильын кугыжаже улмет деч кораҥден».27Каяш манын, Самуил савырнен. Но Саул тудын вургемжым руалтен кучен, да тудыжо кушкедлен.28Тунам Самуил каласен: «Таче Господь Израильын кугыжаже улметым тый дечет налын да вес еҥлан, тый дечет сайраклан, пуэн.29Израильын Ӱшанлыже ок шойышт да ойлымыжлан ок ӧкынӧ, вет Тудо айдеме огыл, Тудо каласыме шомакшылан ок ӧкынӧ».30Саул каласен: «Мый сулыкыш пуренам. Но кызыт калыкемын кугуракше-влак да Израиль ончылно мыйым пагалыметым ончыкто – пӧртыл мый денем. Мый тыйын Господь Юметлан вуйым савем».31Самуил Саул дене пӧртылын, да Саул Господьлан вуйжым савен.32Вара Самуил каласен: «Мый декем Агагым, Амалик кугыжам, кондыза». Тудын деке, чытырен, Агаг лишемын. Агаг шке семынже шонен: «Тугеже колымашын лӱдыкшыжӧ эртен?»33Но Самуил каласен: «Кузе тыйын кердет ӱдырамаш-влакым йочашт деч посна коден, тыгак тыйын ават моло ӱдырамаш семынак эргыж деч посна кодшо!» Да Самуил Агагым Господь ончылан Галгалыште руэн пуштын.34Самуил Рамаш каен, а Саул мӧҥгыжӧ, Саулын Гивашкыже, пӧртылын.35Тетла Самуил тудым шке колымо кечыж марте ужын огыл. Самуил тудын верч ойгырен, вет Саулым Израильын кугыжажлан шогалтымылан Господь ӧкынен.
Institute for Bible Translation, Finland