1 Куг14
1Ик кечын Ионафан, Саулын эргыже, саргурал нумалше тарзыжлан каласен: «Айда вес велыште улшо филистим отряд деке вончена». А ачажлан тидын нерген каласен огыл.2Саул гын Гива тӱрыштӧ, Мигронысо гранат пушеҥге йымалне, лийын. Тудын пелен кудшӱдӧ наре еҥ улмаш.3Нунын коклаште Ахий, Ахитувын эргыже, лийын. Ахитувшо Иохаведын шольыжо, Финеесын эргыже, Илийын уныкаже лийын, а Илийже Силомышто Господьын ефодым чиен коштшо иерейже улмаш. Ионафанын кайымыж нерген калыкат пален огыл.4Ионафан филистим отряд деке курыклоҥ дене лишемаш шонен, тудыжын кок велыштыжат сергӱ улмаш. Иктыжын лӱмжӧ Боцец, весыжын Сене лийын.5Ик сергӱжӧ йӱдвелыш, Михмас могырыш, ончен, весыже – кечывалвелыш, Гева могырыш.6Ионафан саргурал нумалшыжлан каласен: «Айда нине пӱчдымӧ-влакын отрядышт деке вончена. Ала Господь мыланна полша, вет Тудлан шуко еҥ денат, икмыняр еҥ денат утараш неле огыл».7Тудыжо вашештен: «Мом чынлан шотлет, тудым ыште. Кушко шонет, тушко кай, мый тый денет лиям».8Ионафан каласен: «Ме нине еҥ-влак деке вончена да нунын шинча ончыланышт шогалына.9”Мемнан мийымешкына шогыза”, – каласат гын, ме шке верыштынак кодына да нунын деке она кӱзӧ.10”Мемнан деке кӱзыза”, – маныт гын, кӱзена. Тидыже мыланна пале лиеш – Господь нуным мемнан кидышке пуэн».11Кунам нуно коктынат филистим отрядын ужын кертме верыш шогалыныт, филистим-влак каласеныт: «Ончалза, еврей-шамыч шылын шичме курык шелшышт гыч лектыт».12Отрядыште улшо еҥ-влак Ионафан ден тудын саргурал нумалшыжлан кычкыралыныт: «Мемнан деке кӱзыза, ме тыланда икмомак каласена!» Тунам Ионафан шке саргурал нумалшыжлан каласен: «Почешем кай, Господь нуным Израиль кидыш пуэн».13Кидше да йолжо дене кыртмен пижын, Ионафан курыкыш кӱзаш тӱҥалын, тудын почеш – саргурал нумалшыже. Филистим-влак Ионафан ончылно йӧрледеныт, а саргурал нумалше нуным пуштеден.14Икымше гана керылтме годым Ионафан ден тудын саргурал нумалшыже коло наре еҥым пуштыныт. Тидыже кок ӱшкыж дене ик кечыште курал кертме пасун пел кумдыкыштыжо лийын.15Станыште, пасушто уло филистим сарзывийым лӱдмаш авалтен. Ончыл отрядат, йыр улшо кундемлам пустаҥдыше-влакат лӱдын чытыреныт, [нунын кучедалмышт шуын огыл]. Пӱтынь мланде чытырналтын – Господь кугу лӱдмашым колтен.16Вениамин мландысе Гива олаште Саулын оролжо-влак ужыныт: тушман сарзывий шаланен да тӱрлӧ могырыш куржеш.17Саул пеленже улшо калыклан каласен: «Кӧ мемнан кокла гыч каен – ончен лекса, пален налза». Терген лекмеке, пален налыныт: Ионафан ден тудын саргурал нумалшыже уке улыт.18Саул Ахийлан каласен: «Юмын шондыкым кондо». Вет тунам шондык израиль эрге-влак дене лийын.19Саулын тидым иерейлан ойлымыж годым филистим станыште пудыранымаш эшеат чот [шарлен да] кугемын. Тунам Саул иерейлан каласен: «Уке, огеш кӱл, ит кондо».20Саул пеленже улшо еҥ-влакым писын поген да кредалме верыш лупшалтын. Туштыжо кажныжын кердыже лишылъеҥже ӱмбак виктарыме улмаш. Пудыранчык пеш кугу лийын.21Тунам ондак филистим-влак дене лийше да нунын станышт дене пырля коштшо еврей-влакат Саул да Ионафан пелен улшо израильтян-шамыч деке ушненыт.22Ефрем курыклаште шылше израильтян-влакат, филистим-шамычын куржмышт нерген колмеке, кредалмашыш ушненыт.23Тыге Господь тиде кечын Израильым утарен. Кредалмаш Беф-Авен деч умбакыла шуйнен. [Саул дене чылаже лу тӱжем наре еҥ лийын, кредалмаш Ефрем курыклаште улшо ола мучко каен.]24Израиль еҥ-влак тудо кечын ярнен пытеныт, а Саул, [сайын шоналтыде,] калыклан товатмутым пуыктен, тыге ойлен: «Тушманлан ӱчым шуктымешкем, кӧ кас деч ончыч умшашкыже кочкышым налеш гын, каргыме лиеш». Калык кокла гыч нигӧ умшашкыже кочкышым налын огыл.25Сарзе-влак чодыра гоч каеныт, а туштыжо мланде ӱмбалнысе мӱкш пыжашлаште мӱй лийын.26Чодыраш пурымекышт, нуно тушто мӱй улмым ужыныт. Но каргыме деч лӱдын, нигӧат мӱйым умшашкыже налын огыл.27Ионафан гын ачажын калыклан товатмутым пуыктымыжым колын огыл. Тудо кидыште улшо тояжым карашыш чыкен, вара мӱйым кидше дене умшашкыже пыштен, да шинчаже волгыдемын.28Еҥ-влак кокла гыч иктыже тудлан каласен: «Тыйын ачат калыклан товатмутым пуыктен: ”Кӧ таче кочкеш гын, каргыме лиеш”. Садланак еҥ-влак ярныше улыт».29Ионафан каласен: «Ачам калыкым арам орландара. Ончыза, тиде мӱйым изиш кочмеке, мыйын шинчамат волгыдеме.30Таче калык тушманже деч руалтен налме гыч иктаж-мом кочкеш ыле гын, филистим-влак чотрак огыт кыралт ыле мо?»31Тиде кечын филистим-влакым Михмас гыч Аиалон марте поктен каеныт, сандене израильтян-шамыч пеш чот ярненыт.32Тунам калык вольыкым руалтен налаш пижын: шорыкым, ӱшкыжым, презым мландымбалне шӱшкылын да вӱрге кочкын.33Тидын нерген Сауллан каласеныт: «Калык Господь ончылно сулыкым ышта, шылым вӱрге кочкеш». Саул каласен: «Те законым пудыртенда. Кызытак мый декем кугу кӱм пӧрдыктен кондыза».34Вара кӱштен ойлен: «Калык коклашке кайыза да каласыза: тек кажныже мый декем шке ӱшкыж ден шорыкшым вӱден конда да тышан шӱшкыл кочкеш. Господь ончылно сулыкыш ида пуро, шылым вӱрге ида коч». Тиде йӱдым кажныже шке кидше дене ӱшкыж [ден шорыкшым] вӱден толын да тушан шӱшкылын.35Тунам Саул Господьлан жертвенникым ыштен. Тиде Саулын Господьлан ыштыме икымше жертвенникше лийын.36Саул каласен: «Йӱдым филистим-влак почеш каена, волгыжаш тӱҥалмешке нунын ӱмбак керылтына, ик еҥымат илышым огына кодо». Тудлан вашештеныт: «Чылажымат шонымет семын ыште». Но иерей каласен: «Ончыч Юмо деч йодына».37Саул Юмо деч йодын: «Мылам филистим-влакым поктен каяш мо? Нуным Израиль кидыш пуэт мо?» Но тиде кечын Юмо тудлан вашмутым пуэн огыл.38Тунам Саул каласен: «Тек тышке калык вуйлатыше-влак толыт, да пален налына – могай сулыкым таче ыштыме.39Израильым утарыше Господь дене товатлем: сулыкым Ионафан эргым ыштен гынат, тудат колышаш». Уло калык кокла гыч тудлан иктат вашештен огыл.40Саул израильтян-влаклан каласен: «Те ик велыш шогалза, а мый да Ионафан эргым вес велыш шогалына». Калык Сауллан вашештен: «Чылажымат шонымет семын ыште».41Саул каласен: «Господь, Израильын Юмыжо! [Молан таче шке тарзетлан вашештен отыл? Мыйын титакем мо але Ионафан эргымын? Господь, Израильын Юмыжо!] Палдарыше палым ончыкто. [Титак Тыйын Израиль калыкет ӱмбалне гын, тидым ончыкто]». Шерева Ионафан ден Саулым ончыктен, а калык чыныш лектын.42Тунам Саул каласен: «Мыйын да Ионафан эргым коклаште шеревам кудалтыза. [Кӧм Господь ончыкта, тек тудо кола». Калык Сауллан каласен: «Тыге ышташ ок кӱл!» Но Саул шке шонымыжым вашталтен огыл. Тунам Саул ден Ионафан эргыж коклаште шеревам кудалтеныт]. Шерева Ионафанлан возын.43Саул Ионафанлан каласен: «Мом тый ыштенат, ойло». Ионафан тудлан вашештен: «Мый кидыштем улшо тоя мучашеш налын, изишак мӱйым кочкын онченам, да теве колышаш улам!»44Саул каласен: «Ионафан, таче тый пуштмо от лий гын, тек Юмо мыйым пеҥгыдын мут кучаш шогалта!»45Но калык Сауллан тыге манын: «Ионафанлан мо колыман? Вет тудо Израильлан тыгай кугу утарымашым конден! Тыге лийшаш огыл! Господь дене товатлена: Ионафанын вуйжо гыч ӱп пырчат мландыш ок камвоч, вет таче тудо Юмо дене пырля кредалын». Тыге калык Ионафаным утарен коден, да тудо колен огыл.46Саул филистим-влакым поктымыжым чарнен, да нунышт шке мландышкышт каеныт.47Саул Израиль дене кугыжаланыме кучемвийжым пеҥгыдемден да йыр улшо чыла тушманже дене кредалын: Моав дене, аммон-влак дене, Едом [да Вефор дене], Цован кугыжаж-шамыч дене да филистим-влак дене. Тудо кӧ дене гына кредалын огыл, чылаштым сеҥен.48Талын кредалын, тудо амалик-влакым сеҥен да Израильым агыше-влакын кидышт деч утарен.49Саулын Ионафан, Иессуи да Малхисуа эргыже-влак лийыныт, а кок ӱдыржын лӱмышт тыгай улмаш: кугуракшын – Мерова, изиракшын – Мелхола.50Саулын ватыже Ахиноама, Ахимаасын ӱдыржӧ, лийын. Тудын сарзывий вуйлатышыжын лӱмжӧ Авенир, Саулын Нир чузайжын эргыже, лийын.51Кис, Саулын ачаже, да Нир, Авенирын ачаже, Авиелын эргыже-влак лийыныт.52Саулын кугыжа лийме жапыште филистим-влак ваштареш сар чарныде каен шоген. Кунам Саул виян да лӱддымӧ пӧръеҥым ужын, тудым шкеж деке налын.
Institute for Bible Translation, Finland