3 Куг6
1Израиль эрге-влакын Египет мланде гыч кайымышт деч вара нылшӱдӧ кандашлымше ийын, Соломонын Израильыште нылымше ий кугыжаланымыж годым, зиф тылзын – тиде кокымшо тылзе лиеш – Соломон Господьлан храмым чоҥаш тӱҥалын.2Господьлан чоҥымо храмжын кужытшо кудло кынергут, лопкытшо коло да кӱкшытшӧ кумло кынергут лийын.3Храмыш пурымо кыдежын кужытшо, храмын лопкытшо семынак, коло кынергут лийын. Тудо храм деч лу кынергутлан ончыко лектын шоген.4Храмыште Соломон решоткан окна-влакым ыштен, нунын кӧргӧ велышт тӱжвалысе деч кумдарак лийыныт.5Храмын шеҥгел да кок могырысо пырдыжше йыр тудо ешартыш чоҥежым нӧлталын, тушто пӧлем-влак лийыныт.6Чоҥежыште ӱлыл пачаш вич кынергут лопкытан, кыдалаш пачаш куд кынергут лопкытан, а кумшо шым кынергут лопкытан лийыныт. Чоҥежын пырня мучашыже храмын пырдыжышкыже ынже пуро манын, храм пырдыжын тӱжвал могырешыже лондем-влакым ыштен.7Храмым чоҥымо годым тӧр руэн ямдылыме кӱм кучылтыныт, сандене чӧгыт, ий але вес тӱрлӧ кӱртньӧ ӱзгар йӱк шоктен огыл.8Кыдалаш пачашыш храмын пурла вечынже пуреныт. Тушко пӱтырнен кӱзышӧ тошкалтыш дене кӱзеныт, а тушечын – кумшо пачашыш.9Храмым чоҥен пытарымеке, Соломон тудым кедр оҥа дене леведын.10Храм йыр нӧлталме чоҥежыште вич кынергут кӱкшытан пӧлем-влак лийыныт. Нуно храм дене кедр пырня полшымо дене ушалтыныт.11Соломонлан Господь дечын шомак лийын:12«Теве тый храмым чоҥет. Тый Мыйын пунчалем-влак почеш илаш, Мыйын устав ден кӱштымашем-влакым шуктен шогаш тӱҥалат гын, Давид ачатлан каласыме шомакем Мый тый денет шуктем.13Мый израиль эрге-влак коклаште илаш тӱҥалам, шке Израиль калыкем ом кодо».14Тыге Соломон храмым чоҥен шуктен.15Храм пырдыжын кӧргӧ могыржым, кӱвар гыч леведыш марте, кедр оҥа дене комыжлен, кӱварыш кипарис оҥам шарен.16Храмын шеҥгел ужашыштыже, пырдыж деч коло кынергут кутышым висен, кыдежым нӧлталын. Туштат кӱвар гыч леведыш марте чылажымат кедр оҥа дене комыжлен. Тушан святой пӧлемым – Святой деч святой верым – ыштен.17Святой пӧлем ончылно улшо залын кутышыжо нылле кынергут лийын.18Храм кӧргысӧ кедр оҥалаште кавун ден почылташ тӱҥалше пеледышла койшо сӱрет-влак пӱчкеден лукмо лийыныт. Чылажат кедр дене комыжлымо лийын, кӱ нигуштат койын огыл.19Храм кӧргыштӧ улшо святой пӧлемым Соломон Господьын ойпидыш шондыкшым шындаш ыштен.20Тиде пӧлемын кужытшо коло кынергут, лопкытшо коло да кӱкшытшӧ коло кынергут лийын. Тудым Соломон яндар шӧртньӧ дене комыжлен, а жертвенникым – кедр дене.21Храм кӧргым Соломон яндар шӧртньӧ дене комыжлен, святой пӧлем ончылно шӧртньӧ шинчыр-влакым сакалтен да тиде пӧлемымат шӧртньӧ дене комыжлен.22Храмын кӧргӧ могыржым пӱтынек шӧртньӧ дене комыжлен, святой пӧлем ончылно улшо жертвенникымат шӧртньӧ дене комыжлен.23Святой пӧлемыште тудо олив пушеҥге дене лу кынергут кӱкшытан кок херувимым ыштен.24Херувимын ик шулдыржо вич кынергут кутышан, вес шулдыржат вич кынергут кутышан лийын. Ик шулдырын мучашыж гыч вес шулдырын мучашыже марте лу кынергут лийын.25Вес херувимат лу кынергут кутышан лийын. Кок херувимат икгай кугытан да икгай сынан лийыныт.26Кок херувимынат кӱкшытышт лу кынергут лийын.27Соломон нуным храм кӧргысӧ святой пӧлемыш шогалтен. Нунын шулдырышт шаралтыме лийыныт. Ик херувимын шулдыржо ик могыр пырдыж деке тӱкнен, вес херувимын шулдыржо – вес могыр пырдыж деке. А вес шулдырышт икте-весышт деке храм покшелне тӱкненыт.28Херувим-влакым Соломон шӧртньӧ дене комыжлен.29Храмын пырдыжлаштыже – кӧргӧ пӧлемыштат, тӱжвал пӧлемыштат – тудо херувим, пальме да почылташ тӱҥалше пеледыш-влакын сӱретыштым пӱчкеден луктын.30Тыгак храмын кӧргӧ да тӱжвал пӧлемласе кӱварым шӧртньӧ дене леведын.31Святой пӧлемыш пурашлан олив пушеҥге дене кок велыш почылтшо кугу омсам ыштен, тудын янакше вич лукан лийын.32Тиде омсан кок ужашыштыжат тудо херувимым, пальмым, почылташ тӱҥалше пеледышым пӱчкеден луктын да омсам пӱтынек шӧртньӧ дене комыжлен. Херувим ден пальме-влакымат тудо шӧртньӧ дене комыжлен.33Храмыш пурымаште омсаянакым олив пушеҥге дене, ныл луканым ыштен.34А омсам кипарис дене ыштен, тудо кок велыш почылтшо лийын, кок велыштыжат эше кок почылтшо ужаш лийын.35Омсалаште херувим, пальме да почылташ тӱҥалше пеледыш-шамычым пӱчкеден луктын, чыла тидым лачымын шӧртньӧ дене комыжлен.36Кӧргӧ кудывечым тудо савар дене авырен: кум лончо – тӧр руымо кӱ, нунын ӱмбалне – кедр пырня-влак.37Господьын храмжылан негызым Соломонын нылымше ий кугыжаланымыж годым, зиф тылзын, [тиде кокымшо тылзе лиеш,] пыштеныт.38А латикымше ийын, бул тылзын – тиде кандашымше тылзе лиеш – храмым чыла мо кӱлеш дене, кузе шонен пыштыме улмаш, чоҥен шуктеныт. Соломон тудым шым ий чоҥен.
Institute for Bible Translation, Finland