3 Куг7
1А шке полатшым чоҥаш Соломонлан латкум ий кӱлын.2Полатым тудо Ливанысе кедр дене нӧлтен. Тудын кужытшо шӱдӧ кынергут, лопкытшо витле, а кӱкшытшӧ кумло кынергут лийыныт. Тушто ныл рат кедр меҥге шоген, нунын ӱмбалне кедр пырня-влак киеныт.3Чылаже нылле вич меҥге лийын – кажне ратыште латвизыт дене. Ӱмбалнышт кийыше пырня-влакым кедр леведыш леведын.4Окна-шамыч кум рат дене икте-весе ваштареш лийыныт.5Чыла омса ден омсаянак ныл лукан лийын. Кум рат окна вес пырдыжысе окна-влак ваштареш вераҥдыме лийыныт. 6Соломон тыгак колоннан залым чоҥен. Тудо витле кынергут кужытан да кумло кынергут лопкытан лийын. Тудын ончылныжо – колонно-влакан пӧртӧнчыл, тыгак посна лектын шогышо леведыш.7Соломон эше вес залым чоҥен, туштыжо престол шинчен. Тиде тудын судитлыме залже лийын. Тудо кӱвар гыч леведыш марте кедр дене леведме лийын.8А Соломонын илыме полатше вес кудывечыште, зал шеҥгелне, лийын. Тудым зал семынак чоҥеныт. Марлан налме фараон ӱдырланат Соломон тиде зал гаяк полатым чоҥен.9Чыла оралте тӱжвал могыр гыч кугу кудывече марте да негыз гыч пырдыжын кӱшыл ужашыже марте шерге кӱ дене ыштыме лийын. Кӱ-влакше кугыт дене келшышын тӧр руымо, тӱжвачынат, кӧргӧ гычынат пила дене йыгыме лийыныт.10Негызлан шерге кӱ-влакым пыштеныт. Нуно кугу, лу да кандаш кынергут кутышан, лийыныт.11Нунын ӱмбаке кугыт дене келшышын тӧр руымо вес шерге кӱ-влакым да кедр пырня-шамычым пыштеныт.12Кугу кудывече йыр савар лийын: кум лончо – руымо кӱ, ик лончо – кедр пырня. Господьын храмжын кӧргӧ кудывече ден пурымо кыдежше тыгаяк лийыныт.13Соломон кугыжа Тир гычын Хирамым кондаш колтен.14Тудыжо Неффалим тукым гыч ик тулык ватын эргыже лийын. Ачаже Тир гыч той мастар улмаш. Хирам той дене тӱрлӧ ӱзгар-влакым пеш устан ыштен моштен. Тудо Соломон кугыжа дек толын да йодмо чыла пашажым шуктен.15Хирам кок той колонным ыштен. Кажныжын кӱкшытшӧ латкандаш кынергут, а йыргешке кутышыжым кандыра дене висаш гын, латкок кынергут лийын.16Той дене тыгак кок колонно вуйым велен ыштен. Кок колоннынат вуйышт вич кынергут кӱкшытан лийыныт.17Колонно вуйым пунымо шинчыр дене ыштыме сетке сӧрастарен. Ик колонно вуйышто шым шинчыр да вес колонно вуйышто шым шинчыр лийын.18Колонно вуйым сӧрастараш манын, тудо сетке йыр кок рат дене гранат саска-влакым колтен. Вес колонно вуйыштат тыгак ыштен.19А пурымо кыдежысе колонно вуй-влак лилий пеледышым ушештареныт, нуно ныл кынергут кӱкшытан лийыныт.20Кок колонно вуйышто, сетке воктене посна лектын шогышо ужаш ӱмбалне, йырым-йыр рат дене кокшӱдӧ гранат саскам ыштен.21Колонно-влакым тудо храмыш пурымо кыдежыш шогалтен. Пурла велне шогышо колоннылан Яхин лӱмым, шола велне шогышыжлан Воаз лӱмым пуэн.22Колонно вуй-влак лилий пеледышым ушештареныт. Тыге колонно-шамычым ыштыме паша пытен.23Вара Хирам «теҥыз» манын лӱмдымӧ йыргешке кугу той чаным велен ыштен. Тудын ик тӱржӧ гыч вес тӱржӧ марте – лу кынергут, кӱкшытшӧ – вич кынергут, а йыржын кутышыжым кандыра дене висаш гын, кумло кынергут лийын.24Чан тӱр мучко кок ратын кавунла койшо саска-влак кеченыт. Нуным ик кынергутлан лу дене вераҥден да чан дене ик тичмаш семын велен.25Тиде чан латкок ӱшкыж ӱмбалне шинчен. Кум ӱшкыж йӱдвелыш, кумыт касвелыш, кумыт кечывалвелыш да кумыт эрвелыш онченыт. Нунын шеҥгел ужашышт чан йымалне лийын, а ӱмбалнышт чан шинчен.26Чанын кӱжгытшӧ сово лопкытан лийын, а тӱржӧ лилий пеледышла койшо корка гай койын. Чан кок тӱжем бат пурыман лийын.27Хирам эше лу той орвам ыштен. Кажне орван кужыт ден лопкытшо ныл кынергут, а кӱкшытшӧ кум кынергут лийыныт.28Орва-влакым тыге ыштен: нунын рамышт лийын, тушко той панель-влакым пеҥгыдемден.29Раме-влак кокласе панельыште лев, ӱшкыж да херувим-шамычын сӱретышт лийын. Сӱрет-влак рамыштат лийыныт. А лев ден ӱшкыж деч кӱшнӧ да ӱлнӧ – таптыме вуйшӱдыш-влак.30Кажне орван той шӱдыран ныл той ораваже лийын. Ныл лукышто кажне вуйшӱдыш воктене, чан йымалне, велен ыштыме эҥертыш-влак лийыныт.31Орва ӱмбалне йыргешке рож лийын, тудо ик кынергут келгытан да кынергутат пеле лопкытан, орва семынак ыштыме лийын. Тудын йыр – сӱрет-влак. Но орван той панельже-шамыч йыргешке огыл, а ныл лукан лийыныт.32Раме йымалне – ныл орава. Орава шӱдыр-влак орвашке пеҥгыдемдыме лийыныт. Кажне ораван кӱкшытшӧ – ик кынергутат пеле.33Нуно тыглай орвасе орава семынак ыштыме лийыныт, но чылажат – шӱдырышт, тогымышт, пӱйышт, пучышт – велыме лийын.34Кажне орван ныл лукшо гыч ныл эҥертыш лектын шоген, нуно орва дене ик тичмаш семын велыме лийыныт.35Орва ӱмбалне пел кынергут кӱкшытан йыргешке тогым верланен. Туштак орван эҥертышыже-влак лийыныт, нуныжо той панель дене ик тичмаш семын велыме лийыныт.36Эҥертыш ден той панель-влак ӱмбалне, кушто мыняр вер лийын – херувимын, левын да пальме-шамычын сӱретышт, а йырым-йыр вуйшӱдыш-влак лийыныт.37Тыге Хирам лу орвам ыштен. Нуно чыланат ик семын велыме, ик кугытан лийыныт да ик семын койыныт.38Вара тудо лу той чаным ыштен. Кажне чаныш нылле бат пурен. Кажныже ныл кынергут лопкытан лийын да кажныже лу орва гыч иктыж ӱмбалне шинчен.39Вич орвам тудо храмын пурла могырышкыжо да визытым шола могырышкыжо шогалтен. А «теҥыз» манме кугу чаным храмын пурла велкыже, эрвел-кечывалвел могырыш, шынден.40Хирам эше под, изи кольмо да кӱмыж-влакым ыштен. Тыге тудо Господьын храмжылан Соломон кугыжан йодмо чыла пашажым мучашлен.41Теве мом тудо ыштен: кок колонным, чаше семын калыплыме кок колонно вуйым, колонно вуйым сӧрастарыше кок сеткым,42кок сеткыште нылшӱдӧ гранат саскам – чаше семын калыплыме кок колонно вуйым сӧрастарыше кажне сеткылан кок рат гранат саска дене,43лу орвам, орва ӱмбалне улшо лу чаным,44«теҥыз» манын лӱмдымӧ кугу чаным да тудын йымаке латкок ӱшкыжым,45тыгак кӱмыж, изи кольмо да корка-влакым. Хирамын Соломон кугыжа дене Господьын храмжылан ыштыме чыла арвер ягылтарыме той дене ыштыме лийын.46Кугыжа нуным Иордан кундемысе шун мландыште, Сокхоф ден Цартан коклаште, велен ыштен.47Чыла арверым Соломон веран-верышкышт шындылын. Нунын пеш шуко улмыштлан кӧра тойын нелытшым висен огытыл.48Соломон Господьын храмжылан кӱлшӧ моло арверымат ыштен: шӧртньӧ жертвенникым, надыр киндым пышташ шӧртньӧ ӱстелым,49яндар шӧртньӧ дене светильник-влакым – кӧргысӧ святой пӧлемын пурла велныже визыт, шола велныже визыт, тыгак шӧртньӧ пеледыш, лампаде да шипши-влакым,50яндар шӧртньӧ дене кӱмыж ден вашкӱзӧ, изи ден кугу ате, тулшол ате-влакым, кӧргысӧ пӧлемын – Святой деч святой пӧлемын – омса топсаштым, тыгак храмыш пурымо омса-влакын топсаштым. Нуно чылан шӧртньӧ дене ыштыме лийыныт.51Тыге Соломон кугыжан Господьын храмжылан ыштыме пӱтынь паша мучашлалтын. Тидын деч вара Соломон тушко Давид ачажын Господьлан пуымо чыла святой пӧлекшым – ший ден шӧртньыжым, арверже-влакым конден. Нуным тудо Господьын храмын поянлыкшым аралыме верышке пыштен.
Institute for Bible Translation, Finland