3 Куг21
1Тидын деч вара теве мо лийын. Изреельыште Самарий кугыжа Ахавын полатше воктене Изреель гыч Навуфей лӱман еҥын виноград аҥаже лийын.2Ахав Навуфейлан каласен: «Мылам шке виноград аҥатым пу. Мый тушан пакчасаскам шындынем, вет тудо – мыйын полатем воктенак. Олмешыже мый тылат сайрак виноград аҥам пуэм але, тылат утларак келша гын, тудын акшым ший дене тӱлем».3Но Навуфей Ахавлан каласен: «Тылат ача-кочамын мландыжым пуаш?! Господь мыйым тидын деч аралыже!»4Изреель гыч Навуфейын «тыланет ача-кочамын мландыжым ом пу» манын вашештымыж деч вара Ахав мӧҥгыжӧ шыдешкыше, иралтше кумылан толын. Тудо вакшышкыже [пудыраныше чонан] пурен возын, чурийжым пырдыж деке савырен, кочкынат огыл.5Тудын дек Иезавель ватыже пурен да йодын: «Молан иралтынат? Молан кочметат ок шу?»6Кугыжа тудлан вашештен: «Мый Изреель гыч Навуфейлан ”мылам шке виноград аҥатым ужале але, тылат утларак келша гын, олмешыже тылат вес виноград аҥам пуэм” манын темлышым. А тудо мыланем вашештыш: ”Виноград аҥам, [ача-кочам-влакын мландыштым,] мый тылат ом пу”».7Иезавель ватыже тудлан каласен: «Тый Израильын кугыжаже отыл мо? Лыплане, кынел да коч. Изреель гыч Навуфейын виноград аҥажым мый тылат налын пуэм».8Тудо Ахавын лӱмжӧ дене серыш-влакым возен, нуным кугыжан печать дене пеҥгыдемден да Навуфейын илыме олашке кугурак ден лӱмлӧ еҥ-шамычлан колтен.9Серышлаште Иезавель тыге возен: «Пӱтым кучымо нерген увертарыза да погынышо калык коклаште Навуфейым ончыко шындыза.10Тудын ваштареш кок йӧрдымӧ еҥым вераҥдыза. Тек нуно Навуфей ӱмбак тыге таныклен ойлат: ”Тый Юмым да кугыжам мыскылен ойленат”. Вара тудым наҥгайыза да кӱм кышкен пуштса».11Навуфейын олаштыже илыше кугурак ден лӱмлӧ еҥ-влак Иезавельын серышлаштыже кӱштымыж семынак ыштеныт.12Нуно пӱтым кучымо нерген увертареныт да Навуфейым калык коклаште ончыко шынденыт.13Кок йӧрдымӧ еҥ толын да тудын ваштареш шинчын. Нуно калык ончылно тудын ӱмбак тыге таныклен ойленыт: «Навуфей Юмым да кугыжам мыскылен ойлен». Навуфейым ола деч ӧрдыжкӧ луктыныт, ӱмбакше кӱм кышкеныт, да тудо колен.14Вара Иезавель дек тыге каласаш колтеныт: «Навуфейым кӱм кышкен пуштыныт».15Тудым кӱм кышкен пуштмо нерген колмеке, Иезавель Ахавлан каласен: «Кай да Изреель гыч Навуфейын виноград аҥажым поген нал, вет тудо ты аҥам тылат оксала ужалаш келшен огыл. Навуфей тетла уке, тудо колен».16[Изреель гыч] Навуфейын колымыж нерген колмеке, Ахав [вургемжым кушкедын да чоштыра вургемым чиен, вара] Навуфейын виноград аҥажым шкаланже налаш каен.17Фесвийыште илыше Илиялан Господьын шомакше лийын:18«Кынел, Самарийыште илыше Израиль кугыжа Ахав ваштареш кай. Тудо кызыт Навуфейын виноград аҥаштыже, Ахав тудым шкаланже налаш толын.19Каласе тудлан: ”Тыге Господь ойла: ’Тый айдемым пуштынат, а ынде погыжым шкаланет налнет?’” Вара каласе: ”Тыге Господь ойла: кушто пий-влак Навуфейын вӱржым нуленыт, тудо верыштак тыйын вӱретымат нулаш тӱҥалыт”».20Ахав Илиялан каласен: «Тый мыйым муыч, тушманем!» Илия вашештен: «Муым. Вет тый Господь шинча ончылно шкендым осал пашалан пуэнат [да Тудын шыдыжым луктынат].21[Тыге Господь ойла:] ”Мый тыйын ӱмбакет ойгым кондем, тыйын чыла тукымет пытарем. Израильыште Ахав тукымын пӧръеҥже-влакым изи гыч кугу марте чылаштым ӱштыл кудалтем.22Мыйын шыдем лукметлан да Израильым сулыкыш пуртыметлан мом Мый Иеровоамын, Нават эргын, тукымжо дене да Ваасан, Ахий эргын, тукымжо дене ыштенам, тидымак тыйын тукымет дене ыштем”.23Тыгак Иезавель шотыштат Господь тыге ойла: ”Изреель пырдыж шеҥгелне Иезавельым пий-влак кочкаш тӱҥалыт”.24Ахав тукым гыч кӧ олаште кола, тудым пий-влак кочкыт, а кӧ ола деч ӧрдыжтӧ кола – кайык-влак чӱҥген пытарат».25Ахав семын Господь ончылно тынар осал пашам ыштыше эше нигӧ лийын огыл, а тидланже тудым Иезавель ватыже таратен шоген.26Шояк юмо-влаклан кумалын, тудо кугу йырныкым ыштен. Лач тыге аморрей-шамыч ыштеныт, нуныштым Господь израиль эрге-влакын чурийышт ончыч поктен колтен.27Кунам Ахав Илиян шомакшым колын, тудо [Господь ончылно ӱҥышемын да шортын коштын,] вургемжым кушкедын, ӱмбакше чоштыра вургемым чиен. Тудо пӱтым кучаш тӱҥалын, чоштыра вургем денак мален да ойган коштын.28Фесвийыште илыше Илиялан [Ахав шотышто] Господьын шомакше лийын. Господь каласен:29«Ужат, кузе Ахав мыйын ончылнем ӱҥышемын? Ончылнем ӱҥышеммыжлан Мый ойгым тудын илыме кечылаштыже ом кондо. Тудын тукымжылан ойгым Мый тудын эргыже илыме жапыште колтем».
Institute for Bible Translation, Finland