3 Куг20
1Сирий кугыжа Венадад уло сарзывийжым поген. Тудын дек имне да сарлык орва дене кумло кок кугыжа ушнен. Венадад каен, Самарийым авырен налын да тудын ваштареш кредалын.2Олашке Израиль кугыжа Ахав деке тудо шке еҥже-влакым тыге каласаш колтен:3«Тыге Венадад ойла: ший-шӧртнет мыйын улыт, тыгак ватет ден йочат-влак кокла гыч эн сайышт мыйын улыт».4Израиль кугыжа вашештен: «Тек каласымет семынак лиеш, мыйын кугыжа озам. Мый шкеже да мо мыйын уло – чыла тыйын».5Колтымо еҥ-влак адакат толыныт да каласеныт: «Тыге Венадад ойла: мый тый декет тыге ойлаш колтенам: ”Ший-шӧртнетым, ватет ден йочат-влакым мыланем пу”.6Эрла мый тиде жаплан тый декет тарзем-влакым колтем. Тек нуно пӧртетым, лишыл еҥет-влакын пӧртыштым ончен лектыт да мо тыланет шерге, пеленышт наҥгаят».7Израиль кугыжа элын чыла кугуракше-влакым шкеж деке ӱжын да каласен: «Ончалза, Венадад осалым ышташ шонен пыштен. Кунам тудо вате ден эргем-влакым, ший-шӧртнем йодаш колтен, мый тореш лийын омыл».8Чыла кугурак да уло калык каласеныт: «Ит колышт тудым да тидын дене ит келше».9Тунам тудо Венададын колтымо еҥже-влаклан вашештен: «Мыйын кугыжа озамлан каласыза: мом тый икымше гана йодын колтенат – мый, тыйын тарзет, тидым ышташ ямде улам. А мом кызыт йодат – ыштен ом керт». Колтымо еҥ-влак Венададлан вашмутым наҥгаеныт.10Венадад тудын деке ынде тыге ойлаш колтен: «Самарий ола деч кажне еҥемлан пурак кеч ик кормыж дене кодеш гын, тек юмо-влак мыйым пеҥгыдын мут кучаш шогалтат!»11Израиль кугыжа вашештен: «Каласыза тудлан: саргуралым чийымеке огыл, а кредалме деч вара саргуралым кудашмеке моктане!»12Нине шомакым колмеке, омашыште моло кугыжа дене йӱын шинчыше Венадад шке еҥже-влаклан каласен: «Рат дене шогалза!» Сарзе-шамыч ола ӱмбак керылташ ямдылалт шогалыныт.13Тиде жапыште Израиль кугыжа Ахав деке ик пророк толын да каласен: «Господь тыге ойла: ужат мо тиде кугу сарзывийым? Тудым Мый таче кидышкет пуэм, да тый пален налат: Мый Господь улам».14Ахав йодын: «Господь тидым кӧн гоч ышта?» Пророк вашештен: «Тыге Господь ойла: кундемвуй-влакын сарзышт гоч». Ахав эше йодын: «Кредалмашым кӧ тӱҥалеш?» Пророк вашештен: «Тый».15Ахав кундемвуй-влакын сарзыштым шотлен лектын, нунышт кокшӱдӧ кумло кокытыш погыненыт. Вара тудо Израильын чыла сарзыжым шотлен лектын, нунышт шым тӱжем лийыныт.16Нуно кечывалым лектыныт. Венадад гын тиде жапыште тудлан полшышо кумло кок кугыжа дене пырля омашыште йӱын руштын.17Эн ончыч кундемвуй-влакын сарзышт каеныт. Венадад шке еҥже-шамычым колтен, нуно тудлан каласеныт: «Самарий гыч сарзе-влак лектыныт».18Венадад кӱштен: «Нуно тынысым йодаш лектыныт гын, илышынек руалтен кучыза. Кредалаш лектыныт гын, тыгак илышынек руалтен кучыза».19Ола гыч ончыч кундемвуй-влакын сарзышт лектыныт, почешышт – кодшо сарзывий.20Кажне израильтян ваштарешыже шогышо сарзым пуштын. Сириян-влак куржыныт, а израильтян-шамыч нуным поктен каеныт. Сирий кугыжа Венадад имнешке-влак дене пырля имне ӱмбак шинчын кудалын утлен.21Тунам Израиль кугыжа ончыко лектын да имне ден орва-влакым кырен шалатен. Сириян-шамыч пеш шукын пытеныт.22Израиль кугыжа дек пророк толын да каласен: «Кай, вийым пого да сайын шоналте – умбакыже кузе лийман, вет ик ий гыч Сирий кугыжа адакат тыйын ӱмбакет толеш».23Сирий кугыжан лишыл еҥже-шамыч тудлан каласеныт: «Нунын Юмышт – [лапвер-влакын Юмыжо огыл, а] курык-влакын Юмыжо, садлан мемнам сеҥеныт. Ме нунын дене тӧрверыште кредалына гын, чынжымак сеҥена.24Теве мом ыште: кугыжа-влакым кажныжым шке верышт гыч кораҥде, олмешышт кундемтӧра-шамычым шогалте.25Мыняр сарзым йомдаренат – шкаланет угыч тынарымак пого, мыняр имне лийын – тынарак имньым, мыняр орва лийын – тынарак орвам. Вара нунын дене тӧрверыште кредалына. Тунам чынжымак нуным сеҥена». Кугыжа нунын ойыштым колыштын да тыгак ыштен.26Ик ий эртымеке, Венадад сириян-влакым поген да, Израиль дене кредалаш манын, Афек ола деке каен.27Израиль эрге-шамычат сарзывийым погеныт. Пеленышт кочкышым налын, нуно ваштарешышт каеныт да нунын ончылно стан дене шогалыныт. Уло кундемым темыше сириян-влак дене таҥастарымаште, нуно кок изи каза кӱтӱ семын койыныт.28Израиль кугыжа дек Юмын еҥ толын да каласен: «Тыге Господь ойла: сириян-шамычын ”Господь – лапвер-влакын огыл, а курык-влакын Юмыжо” манмыштлан Мый тиде кугу сарзывийым тыйын кидышкет пуэм. Тунам те пален налыда: Мый Господь улам».29Нуно стан дене икте-весышт ваштареш шым кече шогеныт. Шымше кечын кредалмаш тӱҥалын. Израиль эрге-влак ик кечыште шӱдӧ тӱжем йолешке сирияным пытареныт.30Молышт Афек олаш куржыныт. Тушто коло шым тӱжем еҥ ӱмбаке пырдыж камвозын. А Венадад шкеже олашке куржын да ик пӧлем гыч весыш шылын куржталын.31Лишыл еҥже-влак тудлан каласеныт: «Ме Израиль кугыжа-шамычын поро кумылан улмышт нерген колынна. Лиеш мо, ме чоштыра вургемым чиена, шӱйышкӧ кандырам кылдена да Израиль кугыжа дек каена? Тунам тудо тыйын чонетым ала арален кода».32Нуно чоштыра вургемым чиеныт, шӱйышкышт кандырам кылденыт да Израиль кугыжа дек толын каласеныт: «Тыйын Венадад тарзет ойла: ”Мыйын чонем арален кодо”». Кугыжа вашештен: «Тудо эше илыше мо? Тудо – мыйын изам».33Толшо еҥ-влак тыште сай палым ужыныт да вигак тудын мутышкыжо пуреныт: «Туге, Венадад – тыйын изат». «Кайыза, кондыза тудым», – кугыжа каласен. Кунам Венадад тудын дек лектын, кугыжа тудым шкеж деке орвашке шынден.34Венадад тудлан каласен: «Ачамын тыйын ачат деч руалтен налме ола-влакым мый мӧҥгеш пӧртылтем. Тыгак тый Дамаскыште пазар-шамычым почын кертат, вет ачамынат Самарийыште пазарже-влак лийыныт». Ахав вашештен: «Тыгай ойпидышым ыштымеке, мый тыйым колтем». Венадад дене ойпидышым ыштымеке, Ахав тудым колтен.35Господьын кӱштымыж почеш пророк тунемше-влак кокла гыч иктыже весылан каласен: «Мыйым кыре». Но тудыжо тидым ышташ тореш лийын.36Тунам пророк тунемше тудлан каласен: «Господьым колыштдыметлан, мый дечем кайымекет, тыйым лев пуштеш». Саде еҥ тудын деч каен, ваштарешыже лев лектын да тудым пуштын.37Пророк тунемше вес еҥым муын да тудлан каласен: «Мыйым кыре». Тудыжо пророкым сусыртымешке кырен.38Тунам пророк тунемше каен да корно воктеке кугыжам вучаш шогалын. Тудым ынышт пале манын, саҥгаже петырыме лийын.39Кунам кугыжа воктечше эртен каен, пророк тунемше тудлан кычкыралын: «Тыйын тарзет сӧй пасушто лийын. Тушто ик айдеме, моло деч кораҥын, мый декем ик еҥым вӱден кондыш да каласыш: ”Тиде еҥым ороло. Тудо куржеш гын, тудын чонжо олмеш тыйын чонет лиеш але олмешыже ик талант шийым тӱлет”.40Кунам тыйын тарзет иктым-весым ыштылын, саде еҥ йомын». Израиль кугыжа тудлан каласен: «Шкаланет пунчалым тый шкеак каласышыч».41Пророк тунемше тунамак саҥгаж гыч пидышым кораҥден, да кугыжа тудын пророк-влак кокла гыч улмыжым пален налын.42Тудыжо кугыжалан каласен: «Тыге Господь ойла: тый кидет гыч Мыйын пытараш палемдыме еҥым колтенат. Садлан тыйын чонет тудын чонжо олмеш, тыйын калыкет тудын калыкше олмеш лиеш».43Израиль кугыжа мӧҥгыжӧ, Самарийыш, шыдешкыше да иралтше кумылан толын пурен.
Institute for Bible Translation, Finland