3 Куг13
1Тӱтыртышым йӱлалташ манын, Иеровоам жертвенник воктене шоген. Тиде жапыште Иуда мланде гыч Вефильыш Господьын шомакше почеш Юмын еҥже толын.2Тудо жертвенниклан Господьын шомакшым кычкырен ойлен: «Жертвенник, жертвенник! Тыге Господь ойла: Давид тукымышто эрге шочеш, тудын лӱмжӧ Иосий лиеш. Кӱкшакаште служитлыше иерей-влакым, кӧмыт тыйын ӱмбалнет тӱтыртышым йӱлалтеныт, тудо тыйын ӱмбалнетак надырлан конда, тушан айдеме лум йӱлалта!»3Тиде кечынак Юмын айдеме шке шомакшым палдарыше пале дене пеҥгыдемден. Тудо каласен: «Теве Господьын каласымыжлан палдарыше пале: тиде жертвенник шелалтеш, тушто улшо ломыж шаланен пыта».4Вефильысе жертвенниклан Юмын еҥын тыге каласыме шомакшым колмеке, Иеровоам кугыжа шке кидшым жертвенник деч тиде айдеме велыш шуялтен да кӱштен: «Кучыза тудым!» Но кугыжан саде еҥ деке шуялтыме кидше тӱҥын, тудым эсогыл шкеж деке савырен кертын огыл.5Юмын айдемын Господьын шомакше почеш увертарыме палдарыше палыже шукталтын – жертвенник шелалтын, тушеч ломыж йоген.6Тунам [Иеровоам] кугыжа Юмын еҥлан каласен: «Мыйын шотышто Господь Юметлан кумал, тек Тудо мый декем поро лиеш да кидем паремда». Юмын айдеме кумалын да Господьын шыдыжым луштарен – кугыжан кидше паремын, ондакысе гаяк лийын.7Кугыжа Юмын еҥлан каласен: «Мый денем пырля пӧртыш пуро да кочкышым пурл, а мый тылат пӧлекым пуэм».8Но тудо кугыжалан вашештен: «Тый мылам шке пел пӧртетым пуэт гынат, мый тый денет ом кай, тиде верыште киндымат ом коч, вӱдымат ом йӱ.9Вет Господь мыланем тыге кӱштен: ”Тушто киндымат ит коч, вӱдымат ит йӱ. Толмо корнет дене мӧҥгеш ит пӧртыл”».10Да мӧҥгеш тудо Вефильыш толмо корно дене огыл, а весе дене каен.11А Вефильыште ик шоҥго пророк илен. Тудын эргыж-влак толыныт да Вефильыште Юмын еҥын тудо кечын мом ыштымыжым чыла радамын каласкаленыт. Ачаштлан тиде еҥын кугыжалан мом каласымыжымат ойленыт.12Ачашт нунын деч йодын: «Могай корно дене тудо каен?» Эргыж-влак тудлан Иуда мланде гыч толшо Юмын еҥын могай корно дене кайымыжым ончыктеныт.13Шоҥго пророк эргыж-влаклан каласен: «Мылам осёлым ӧртньӧрлыза». Тудлан осёлым ӧртньӧрленыт, ачашт осёл ӱмбаке шинчын14да Юмын айдеме почеш каен. Шоҥго пророк тудым тумо йымалне шинчышым муын. «Иуда мланде гыч толшо Юмын айдеме тый улат мо?» – тудын деч йодын. Тудыжо вашештен: «Мый улам».15Тунам шоҥго пророк каласен: «Мый декем пӧртышкем пуро, киндым пурл».16Юмын еҥ тудлан вашештен: «Мый тый денет мӧҥгеш пӧртылын да тый декет пурен ом керт. Тый денет киндымат кочкаш, вӱдымат йӱаш ом тӱҥал.17Мылам Господь тыге каласен: ”Тушто киндымат ит коч, вӱдымат ит йӱ. Толмо корнет дене мӧҥгеш ит пӧртыл”».18Шоҥго пророк тудлан тыге манын: «Мый тый гаетак пророк улам. Суксо мылам Господьын шомакшым каласыш: ”Тудым мӧҥгышкет кондо, тек тудо киндым кочкеш да вӱдым йӱэш”». А тидыже шояк лийын.19Тунам Юмын еҥ тудын дене пӧртылын, пӧртыштыжӧ киндым кочкын да вӱдым йӱын.20Кунам нуно эше ӱстелтӧрыштӧ шинченыт, тудым мӧҥгеш кондышо шоҥго пророклан Юмын шомакше лийын.21Тудо Иуда гыч толшо Юмын еҥлан каласен: «Тыге Господь ойла: тый Господьын шомакшым колыштын отыл, Господь Юметын тылат пуымо кӱштымашыжым шуктен отыл.22Тый мӧҥгеш пӧртылынат да тылат киндым кочкаш, вӱдым йӱаш чарыме тиде верыште кочкын-йӱынат. Тидлан кӧра тыйын капет ача-кочатын шӱгарыштыже тойымо ок лий».23Юмын еҥын кочкын-йӱмекше, тудым мӧҥгеш пӧртылтышӧ шоҥго пророк тудлан осёлым ӧртньӧрлен.24Юмын еҥ каен, но корнышто ӱмбакше лев кержалтын да тудым пуштын. Тудын капше корнышто киен, воктеныже осёл ден лев шогеныт.25Эртен кайыше еҥ-влак корнышто кийыше капым да воктеныже шогышо левым ужыныт. Нуно каеныт да тидын нерген шоҥго пророкын илыме олаште каласеныт.26Кунам тидын нерген тудым корныж гыч мӧҥгеш пӧртылтышӧ пророк колын, тыге каласен: «Тиде саде Юмын айдеме, кудо Господьын кӱштымыжым колыштын огыл. Господь тудым левлан пуэн. Лев тудым кӱрышт пуштын – тыге Господьын тудлан каласыме шомакше шукталтын».27Пророк шке эргыж-влаклан каласен: «Мылам осёлым ӧртньӧрлыза». Нуно каласымыжым шуктеныт.28Пророк каен да корнышто кийыше капшым муын. Осёл ден лев колышо кап воктене шогеныт. Лев капшым кочкын огыл, осёлымат тӱкен огыл.29Шоҥго пророк Юмын еҥын колышо капшым нӧлталын, осёл ӱмбаке пыштен да, шортмо йӱлам эртараш да тудым тояш манын, шке олашкыже наҥгаен.30Капым тудо шке ешыжын шӱгарышкыже пыштен да тыге шортын ойлен: «О, мыйын шольым!»31Тойымеке, шоҥго пророк шке эргыж-влаклан каласен: «Кунам колем, мыйым Юмын айдемым тойымо вереш тойыза. Мыйын луэм тудын лужо воктек пыштыза.32Вет Вефильысе жертвенник ден Самарий олаласе кӱкшака-влак ӱмбалне улшо чыла кумалме вер шотышто тудын ойлымо шомакше шукталтеш, тиде шомак Господьын кӱштымыж почеш каласыме лийын».33Но тидын деч варат Иеровоам шке уда корныж гыч кораҥын огыл. Тудо кӱкшакаласе иерейым тыглай калык кокла гыч шогалтымыжым чарнен огыл. Кажне кумылан еҥым кӱкшакасе иерейлан святитлен шогалтен.34Тиде сулык Иеровоамын тукымжо ӱмбалне кечен да тудым пытымаш дек, мландымбачын ӱштын кудалтымаш дек наҥгаен.
Institute for Bible Translation, Finland