3 Куг14
1Тиде жапыште Иеровоамын Авий лӱман эргыже черланен.2Иеровоам шке ватыжлан каласен: «Вес вургемым чие – тек нигӧат Иеровоамын ватыже улметым огеш пале, да Силомыш кай. Тушто пророк Ахий уло. Тиде калыкын кугыжаже лият манын, тудо мыланем ончылгоч каласен.3Пеленет [Юмын еҥлан] лу сукыр киндым, лепошкам, кувшин мӱйым нал да тудын дек кай. Тудо тыланет эргына дене мо лийшашым каласа».4Иеровоамын ватыже тыгак ыштен: Силомыш каен, Ахийын пӧртышкыжӧ толын. Тиде жаплан Ахийын шинчаже ужын огыл, шоҥго велеш тудо сокыр лийын.5Но Господь Ахийлан шижтарен: «Иеровоамын ватыже, вес вургемым чиен, тый декет черле эргыж нерген йодаш толеш. Тудлан теве тыге ойло...»6Кунам Ахий омса дене ӱдырамашын ошкылмо йӱкшым колын, тудо каласен: «Пуро, Иеровоамын ватыже. Молан тылат вес вургемым чияш кӱлын? Мыйын тыланет уда увер.7Кай, Иеровоамлан каласе: Израильын Господь Юмыжо тыге ойла: ”Мый тыйым тыглай калык кокла гыч нӧлталынам да Израиль калыкемын вуйлатышыжлан шогалтенам.8Мый кугыжанышым Давидын тукымжо деч налынам да тылат пуэнам. Но тый Мыйын Давид тарзем гай отыл. Тудо Мыйын кӱштымаш-влакем шуктен шоген, Мыланем уло шӱм дене ӱшанле лийын да Мылам келшыше пашам гына ыштен.9Тый дечет ончыч лийше-влакым чылаштым шке осал пашат дене эртен каенат. Мыйын шыдем луктын, шкаланет тӱрлӧ полган ден вес юмо-влакым ыштенат, Мый декем тупынь савырненат.10Тидлан Мый Иеровоамын тукымжылан ойгым кондем: Израильыште чыла пӧръеҥжым изи гыч кугу марте пытарем. Шӱкшакым ӱштыл шумо семын, нимом кодыде, тудын тукымжым пӱтынек ӱштын кудалтем.11Иеровоам тукым гыч кӧ олаште кола, тудым пий-влак кочкыт, а кӧ ола деч ӧрдыжтӧ кола – кайык-влак чӱҥген пытарат. Тыге Господь каласен”.12А тый мӧҥгышкет кай. Кунам тый олашке пурет, эргыч кола.13Тудын шотышто чыла израильтян-влак шорташ тӱҥалыт да эргычым тоят. Иеровоам тукым гыч тудо шкетын шӱгарыш тойымо лиеш. Израильын Господь Юмыжо Иеровоам тукымысо чыла еҥ кокла гыч тиде йочаште гына ала-мом сайым ужын.14Господь Израильлан вес кугыжам шогалта. Тудыжо Иеровоамын тукымжым пытара. Тиде тачак, кызытак лиеш.15Господь Израильым чуриктара, Израиль тале вӱд дене лӱҥгыктымӧ омыжвондо гай лиеш. Ача-кочаштлан пуымо тиде сай мланде гыч Господь израильтян-влакым луктын кудалта да Евфрат эҥер вес велке шалатен колта. Вет нуно шкаланышт Ашера меҥге-влакым ыштеныт, тидын дене Господьым сырыктеныт.16Иеровоамын сулыкшылан да тидын дене Израильым сулыкыш пуртымыжлан Господь Израильым тушман кидыш пуа».17Иеровоамын ватыже тушеч каен да Фирцаш толын. Тудо омсалондем гоч вончен шуктен веле, рвезе колен.18Господьын Ахий пророк гоч каласымыж семынак, рвезым тоеныт, тудын шотышто пӱтынь Израиль шортмо йӱлам эртарен.19Иеровоамын моло пашаж нерген, кузе тудо кредалын да кугыжаланен – «Израиль кугыжа-влакын курымсерыш книгаштышт» возымо.20Иеровоам чылаже коло кок ий кугыжа лийын. Вара тудо шке ача-кочаж-влак деке каен, олмешыже кугыжалан тудын Нават эргыже шогалын.21А Иуда мландыште Соломонын Ровоам эргыже кугыжаланен. Престолыш шичмыж годым тудо нылле ик ияш лийын да Иерусалимыште латшым ий кугыжаланен. Шке лӱмжӧ Иерусалимыште илыже манын, Господь Шкаланже израиль тукым-влакын мландышт гыч тиде олам ойырен налын. Ровоамын аважын лӱмжӧ Наама, тудо аммон калык гыч лийын.22Иуда эрге-влак Господь шинча ончылно тӱрлӧ осал пашам ыштеныт, шке сулыкышт дене Господьым ача-кочашт дечат чот сырыктеныт.23Шкаланышт кажне кӱкшакаште да ӱмылан пушеҥге йымалне кумалме верым, онакӱ ден Ашера меҥге-влакым шогалтеныт.24Тиде мландыште тыгак кумалме верлаште яжарланыше пӧръеҥ-шамыч лийыныт. Иуда эрге-влак Господьын израильтян-шамыч деч поктен колтымо калык-влакын чыла йырнык пашаштым ыштылыныт.25Ровоамын визымше ий кугыжаланымыж годым Иерусалим ӱмбаке Египет кугыжа Сусаким керылтын.26Господьын храмже ден кугыжан пӧртшӧ гыч тудо шергакан арверым, [тыгак Цова кугыжа Адраазарын тарзыже-шамыч деч Давидын налме да Иерусалимыш кондымо шӧртньӧ авыртышыже-влакым] налын. Мо тушто лийын – чыла налын, тыгак Соломонын ыштыме чыла шӧртньӧ авыртышыжым руалтен.27Нунын олмеш Ровоам кугыжа той авыртыш-влакым ыштен да нуным кугыжан пӧртын омсаж воктене шогышо капорол вуйлатыше-шамычлан пуэн.28Кажне гана, кунам кугыжа Господьын пӧртышкыжӧ толын, орол-влак нине авыртышым кидышкышт налыныт да тудым ужатен коштыныт, вара адакат орол пӧлемыш пыштеныт.29Ровоамын илышыже, тудын мом ыштымыж нерген «Иуда кугыжа-влакын курымсерыш книгаштышт» возымо.30Ровоам ден Иеровоам коклаште сар эре каен шоген.31Вара Ровоам шке кугезыже-влак деке ушнен, тудым нунын пелен Давид-Олаште тоеныт. Аважын лӱмжӧ Наама, тудо аммон калык гыч лийын. Ровоам олмеш кугыжалан Авий эргыже шогалын.
Institute for Bible Translation, Finland