3 Куг12
1Ровоам Сихемыш каен. Тудым кугыжам ышташ манын, тушко чыла израильтян-влак погыненыт.2Тидын нерген Иеровоам, Нават эрге, колын – тунам тудо Египетыште лийын, тушкыжо Соломон кугыжа деч куржын улмаш – да Египет гыч пӧртылын.3Тудын деке еҥ-влакым колтеныт да толаш ӱжыныт. Иеровоам ден уло израиль калык толыныт да Ровоам [кугыжалан] каласеныт:4«Тыйын ачат мемнан ӱмбаке неле нумалтышым пыштен. Но тый ынде неле пашанам, мемнан ӱмбак пыштыме нумалтышым куштылемде – тунам ме тыланет служитлаш тӱҥалына».5Ровоам нунылан вашештен: «Кызыт кайыза, кум кече гыч мый декем угыч толза». Калык каен.6Ровоам кугыжа Соломон ачажын эше илымыж годым тудлан служитлыше кугурак-влак деч каҥашым йодын: «Тиде калыклан кузе вашешташ, те мом темледа?»7Нунышт каласеныт: «Тиде кечын калыклан тарзе семын лият, тудлан келшышын ыштет да порын вашештет гын, нуно ӱмырышт мучко тыйын тарзет лийыт».8Но Ровоам кугурак-влакын ойыштым шотыш налын огыл, каҥашым эше тудын дене пырля кушшо, тудлан служитлыше самырык еҥ-влак деч йодын:9«Тиде калыклан кузе вашешташ, те мом каласеда? ”Ачатын мемнан ӱмбак пыштыме нумалтышыжым куштылемде” манын, нуно мый дечем йодыт».10Ровоам дене пырля кушшо самырык еҥ-влак вашештеныт: «Тылат ”ачат мемнан ӱмбак неле нумалтышым пыштен, тудым куштылемде” манын ойлышо калыклан тыге каласе: ”Мыйын казаварням ачамын кыдалже деч кӱжгырак.11Ачам тендан ӱмбак неле нумалтышым пыштен, а мый тудым эшеат нелыракым ыштем. Ачам тендам лупш дене кырен, а мый тендам иман лупш дене кыраш тӱҥалам”».12Кум кече гыч Иеровоам да уло калык Ровоам деке толыныт, вет кугыжа нунылан кӱштен улмаш: «Мый декем кум кече гыч толза».13Ровоам калыклан торжан вашештен. Тудо кугурак-влакын каҥашыштым шотыш налын огыл,14а самырык еҥ-влакын ойышт почеш тыге каласен: «Ачам тендан ӱмбак неле нумалтышым пыштен, а мый тудым эшеат нелемдем. Ачам тендам лупш дене кырен, а мый тендам иман лупш дене кыраш тӱҥалам».15Тыге кугыжа калыкым колыштын огыл. Мом Господь Силом гыч улшо Ахий гоч Нават эрге Иеровоамлан каласен, тиде шомак шукталтше манын, Господь тыге ыштен.16Израильтян-влак ужыныт: кугыжа нуным колыштын огыл. Тунам нуно Ровоамлан каласеныт:«Давид дене мемнан пашана уке,Иессей эрге дене мемнан пайна уке!Израильтян-влак, мӧҥгыда, шке омашышкыда кайыза!Давид тукым, шке тукымет дене озалане!»Израильтян-влак шке мӧҥгышкышт каеныт.17Ровоамын кид йымалныже Иуда тукым олалаште илыше израильтян-влак гына кодыныт.18Ровоам кугыжа Израиль эрге-влак деке Адонирамым, ӧкым паша вуйлатышым, колтен, но нунышт тудым кӱм кышкен пуштыныт. Кугыжа писын орвашке кӱзен да Иерусалимыш кудалын утлен.19Тидын деч вара Израиль Давидын тукымжо ваштареш шогаш тӱҥалын. Таче кечынат тыгак кодын.20Кунам израильтян-влак [Египет гыч] Иеровоамын пӧртылмыж нерген колыныт, тудын дек еҥ-влакым колтеныт. Нуно тудым погынымашыш ӱжыныт да пӱтынь Израильын кугыжажлан шогалтеныт. Давид тукым дене пырля лач Иуда [да Вениамин] тукым-влак кодыныт.21Иерусалимыш толмеке, Ровоам уло Иуда тукым да Вениамин тукым гыч шӱдӧ кандашле тӱжем эн сай сарзым поген. Израиль дене кредалын, нуно кугыжанышым Ровоамлан, Соломон эргылан, пӧртылтышаш улыт улмаш.22Тунам Самейлан, Юмын айдемыжлан, Юмо деч тыгай шомак лийын:23«Ровоамлан, Соломон эргылан, Иуда тукымын кугыжажлан, тыгак уло Иуда ден Вениамин тукым-влаклан да моло калыклан каласе:24”Господь тыге ойла: шке иза-шольо израиль эрге-влак дене кредалаш ида кай. Кажныже шке мӧҥгышкыда пӧртылза, вет чыла тиде Мый дечем лийын”». Нуно Господьын шомакшым колыштыныт да Тудын каласымыж семынак мӧҥгышкышт каеныт.25Иеровоам Ефрем курыкышто Сихемым чоткыдемден да тушто илаш тӱҥалын. Тидын деч вара Пенуэлыш илаш куснен да тудымат чоткыдемден.26Иеровоам шке семынже шонен: «Кугыжаныш адакат Давидын тукымжылан куснен кертеш.27Тиде калык надырым кондаш Господьын храмышкыже Иерусалимыш кошташ тӱҥалеш гын, тудын шӱм-чонжо шке озаж деке, Иудан Ровоам кугыжаж деке, савырна. Нуно мыйым пуштыт да Ровоам деке, Иуда тукымын кугыжаж деке, пӧртылыт».28Весе-влак дене каҥашымеке, кугыжа кок шӧртньӧ ӱшкыжым ыштен да [калыклан] каласен: «Тыланда Иерусалимыш кошташ ок кӱл. Теве тыйын юмет-влак, Израиль. Нуно тыйым Египет мланде гыч луктыныт».29Иктыжым тудо Вефилеш, весыжым Данеш шогалтен.30Тыге израильтян-влак сулык корныш шогалыныт. Калык ӱшкыж-шамыч деке, эсогыл Даныш шумеш, кошташ тӱҥалын. [Господьын храмышкыже коштмым нуно чарненыт.]31Кӱкшака-влак ӱмбалне Иеровоам кумалме верым чоҥен, а иерей-шамычым тыглай калык кокла гыч шогалтен. Нуно Левий эрге-влак кокла гыч лийын огытыл.32Иуда мландыште эртарыме пайрем дене келшышын, кандашымше тылзын латвизымше кечыжым Иеровоам пайрем кече семын увертарен. Вефильысе жертвенникыште тудо шке ыштыме ӱшкыжшӧ-влаклан надырым конден. Вефильыштак тудо кӱкшакаште чоҥымо кумалме верлаштыже иерей-шамычым шогалтен.33Кандашымше тылзын латвизымше кечынже тудо Вефильыште чоҥымо жертвенникешыже надырым конден. Израильтян-влак тиде кечым пайрем семын палемдышт манын, Иеровоам тудым шкевуя ойырен налын. Тӱтыртышым йӱлалташ манын, тудо жертвенник деке лишемын.
Institute for Bible Translation, Finland