3 Куг11
1Соломон кугыжа йот калык гыч шуко ӱдырамашым йӧратен: фараон ӱдыр деч посна тудын моав, аммон, идумей, сидон да хеттей калык гыч ватыже-влак лийыныт.2Израиль эрге-шамычлан Господь нине калык шотышто тыге ойлен улмаш: «Нуно тендан шӱмдам шке юмышт дек ынышт савыре манын, ӱдырыштым марлан ида нал, шке ӱдырдамат нунылан марлан ида пу». А Соломон нунын деке шӱмаҥын.3Тудын шымшӱдӧ кугыжанватыже да кумшӱдӧ кулватыже лийын. Нуно Соломоным Господьын корныж гыч кораҥденыт.4Кунам Соломон шоҥгемын, ватыже-шамыч тудын шӱмжым вес юмо-влак деке савыреныт. Давид ачаж семын тудо Господьлан пӱтынек ӱшанле лийын огыл.5Соломон Астарталан, сидон-влакын юмыштлан, да Милхомлан, аммон-шамычын йырнык юмыштлан, вуйжым саваш тӱҥалын.6Господь шинча ончылно Соломон осал паша-влакым ыштен, тудо Господьлан Давид ачаж семын тӱрыснек ӱшанле лийын огыл.7Соломон Иерусалим деч эрвелныла улшо курыкеш Хамослан, моав-шамычын йырнык юмыштлан, да Молохлан, аммон-влакын йырнык юмыштлан, кумалме верлам чоҥен.8Тидымак тудо йот калык гыч улшо чыла ватыжлан ыштен. Нунышт шке юмыштлан тамлыпушым тӱтыреныт да надырым конденыт.9Соломонын Господь деч, Израильын Юмыж деч, кораҥмыжлан Господь шыдешкен. Тудо кугыжалан кок гана кончен10да «вес юмо-влак почеш ит кай» манын кӱштен гынат, Соломон Господь [Юмын] кӱштымыжым шуктен огыл.11Господь Соломонлан каласен: «Тыге ыштылметлан, Мыйын ойпидышем да тыланет пуымо кӱштымаш-влакем пудыртыметлан Мый тый дечет кугыжанышым поген налам да тарзетлан пуэм.12Но Давид ачатлан кӧра тидым тыйын илымет годым ом ыште. Кугыжанышым Мый тыйын эргычын кидше гыч налам,13но уло кугыжанышым огыл: Давид тарземлан да Мыйын ойырен налме Иерусалимлан кӧра тудлан ик тукымым кодем».14Господь Соломон ӱмбаке тушманым, идумей Адерым, колтен. Тудыжо идумей кугыжа тукым гыч лийын.15Кунам Давид Идумейыште лийын, тушко сарзывуй Иоав колышо сарзе-влакым тояш миен да Идумейысе чыла пӧръеҥым пуштын улмаш.16Идумейысе чыла пӧръеҥым пуштын пытарымешке, Иоав ден израильтян-шамыч тушто куд тылзе иленыт.17Но Адер да тудын ачажлан служитлыше икмыняр идумей тӧра Египетыш куржыныт. Адер тунам эше йоча лийын.18Мадиам гыч кайымеке, нуно Фараныш миеныт. Вара, Фаран гыч икмыняр еҥым налмеке, Египетыш фараон деке, тиде элын кугыжаж деке, толыныт. [Адер фараон деке пурен,] фараон тудлан пӧрт ден мландым пуэн, кочкышым конден шогаш кӱштен.19Адер фараонын поро кумылжым сулен налын, да тудо Адерлан Тахпенеса ватыжын шӱжаржым марлан пуэн.20Тахпенесан шӱжарже тудлан Генуват эргым пӧлеклен. Тахпенеса тудым фараонын полатыштыже ончен куштен, Генуват тушто фараонын эргыж-влак дене пырля илен.21Египетыште улмыж годым Адер Давидын шке ача-кочаж-влак деке кайымыже да сарзывуй Иоавын колымыж нерген колын. Тудо фараонлан каласен: «Мыйым шочмо мландышкем колто».22Фараон тудлан манын: «Мо тыланет тыште мый денем ок сите? Молан тый шке мландышкет кайынет?» Тудыжо вашештен: «Чыла сита, но содыки колто мыйым». [Тыге Адер шке шочмо мландышкыже пӧртылын.]23Соломон ваштареш Юмо эше ик тушманым – Разоным, Елиада эргым, колтен. Тудыжо шке Адраазар озаж деч, Цован кугыжаж деч, куржын улмаш.24Давидын Адраазарым кырен шалатымекше, Разон шке йырже еҥ-влакым поген да аген коштшо тӱшкан вуйлатышыже лийын. Нуно Дамаскыш каеныт, тушто илаш тӱҥалыныт да тиде олан озаже лийыныт.25Соломонын илыме чыла кечылаштыже Разон Израильын тушманже лийын. Адер семынак тудо Израильлан шуко зияным конден. Варажым Разон Сирийын кугыжаже лийын.26Кугыжа ӱмбак тыгак Иеровоам, Нават эрге, Соломонын тарзыже, кидшым нӧлталын. Тудо Цереда гыч Ефрем тукым эрге, а аваже Церуа лӱман тулык вате лийын.27Теве кузе тудо кугыжа ваштареш шогалын. Соломон Миллом чоҥен да Давид ачажын олаштыже пырдыж рожлам петырен.28Иеровоам уста айдеме лийын. Тиде самырык еҥын пашам сайын ыштен моштымыжым ужын, Соломон тудым Иосиф тукым пашазе-влакын эскерышыштлан шогалтен.29Икана Иеровоам Иерусалим гыч каен. Корнышто тудым Силом гыч улшо пророк Ахий вашлийын. Тудыжын ӱмбалне у вургем лийын. Нурышто нуно коктын гына лийыныт.30Ахий ӱмбалныже улшо у вургемым кудашын да тудым латкок ужашлан кушкедын.31Вара тудо Иеровоамлан каласен: «Нал шкаланет лу ужашыжым, вет Израильын Господь Юмыжо тыге ойла: ”Соломонын кидше гыч Мый кугыжанышым поген налам да лу тукымым тылат пуэм.32Но Давид тарземлан кӧра да израиль тукым-влакын мландыштышт Мыйын ойырен налме Иерусалим олалан кӧра Мый ик тукымым тудлан кодем.33Тидым Мый теве молан ыштем: тудо Мыйым коден да Астарталан, сидон-влакын юмыштлан, тыгак Хамослан, моав-шамычын юмыштлан, да Милхомлан, аммон-влакын юмыштлан, кумалаш тӱҥалын. Соломон Мыйын корнем дене ок кошт, Давид ачаж семын Мыланем келшыше пашам ок ыште, Мыйын пунчал ден устав-влакем шуктен ок шого.34Мый тудын деч пӱтынь кугыжанышым ом нал. Чыла илыме кечылаштыже тудо вуйлатышак кодеш. Тидым Мый ойырен налме Давид тарземлан кӧра ыштем – тудо Мыйын кӱштымаш ден сугынь-влакем шуктен шоген.35Но Мый Соломон эрге кид гыч кугыжан кучемвийым налам да тушечын тылат лу тукымым пуэм.36Тудын эргыжлан Мый ик тукымым кодем. Тыге Давид тарземын лампыже Мыйын лӱмемлан илаш ойырен налме Иерусалим олаштем Мыйын чурием ончылно эре йӱлаш тӱҥалеш.37А тыйым Мый кугыжалан шогалтем. Тый чыла шонымет дене озаланаш тӱҥалат, Израильын кугыжаже лият.38Мом Мый тыланет кӱштем, тый чыла шукташ, Мыйын корнем дене кошташ, Мылам келшыше пашам ышташ, Давид тарзем семын пунчал ден кӱштымашем шукташ тӱҥалат гын, Мый пеленет лиям да Давидлан ыштыме семын тыйын тукыметым пеҥгыдын шогышым ыштем. Израильым тыйын кидыш пуэн,39Мый Давид тукымым ӱлыкшемдем, но эрелан огыл”».40Соломон Иеровоамым пушташ тӧчен, но тудыжо Египетын Сусаким кугыжаж деке куржын да тушто Соломонын колымешкыже илен.41Соломонын моло пашаже, тудын мом ыштымыже да мунлылыкшо нерген «Соломонын пашаже-влак» книгаште возымо.42Соломон Иерусалимыште пӱтынь Израиль дене нылле ий кугыжаланен.43Вара Соломон шке кугезыж-влак деке ушнен, тудым Давид ачажын олаштыже тоеныт. Тудын олмеш кугыжалан Ровоам эргыже шогалын.
Institute for Bible Translation, Finland