1 Кур.кн28
1Давид Израильын чыла вуйлатышыжым – тукымвуй-влакым, кугыжалан служитлыше пӧлка-шамычын вуйлатышыштым, тӱжемвуй ден шӱдывуй-влакым, кугыжан погыж ден кӱтӱжлан вуйын шогышо-влакым, шке эргыж ден евнух-шамычым, чыла патыр еҥ ден тале сарзым – Иерусалимыш поген.2Давид кугыжа кынел шогалын да каласен: «Колыштса мыйым, иза-шольым-влак да калыкем! Господьын ойпидыш шондыкшым шындаш мый пӧртым – Юмыланна йолжым шындыме верым – чоҥаш шонен пыштенам ыле, тидлан мо кӱлешымат ямдыленам.3Но Юмо мыланем каласен: ”Мыйын лӱмемлан пӧртым ит чоҥо, вет тый тале сарзе улат да шагал огыл вӱрым йоктаренат”.4Но Господь, Израильын Юмыжо, мыйын тукымемым курымеш Израильын кугыжажым ышташ манын, ачамын ешыж гыч мыйым ойырен налын. Тудо онлан Иудам ойырен налын, Иуда тукым гыч – ачамын урлыкшым, а ачамын эргыж-влак кокла гыч пӱтынь Израильын кугыжажлан мыйым шогалташ кумылжо лийын.5Чыла эргым кокла гыч – а нуным Господь мыланем шуко пуэн – Господьын кугыжаныш престолыштыжо Израильым вуйлаташ Соломон эргым ойырен налын.6Господь мыланем каласен: ”Соломон, тыйын эргыч, Мыланем пӧртым да кудывече-влакым чоҥа. Тудым Мый Шкаланем эргымлан ойырен налынам, Мый тудлан Ачаже лиям.7Тудо Мыйын кӱштымаш ден пунчалем-влакым кызытсе семынак тыршен шукташ тӱҥалеш гын, Мый тудын кугыжа кучемвийжым курымешлан пеҥгыдемдем”.8Кызыт пӱтынь Израиль, Господьын калыкше, ончылно да Господь Юмына ончылно ойлем: тиде сай мландым кучен илаш да тудым шкендан деч вара курымешлан йочада-влаклан кодаш манын, Господь Юмыдан чыла кӱштымашыжым шуктен шогыза.9Тыят, Соломон эргым, шке ачатын Юмыжым пале да Тудлан уло шӱм-чонет дене служитле. Вет Господь кажне шӱмым терга да чыла шонымашым пала. Тый Тудым кычалаш тӱҥалат гын, муат, но Тудым кодет гын, Тудо тыйым йӧршешлан кода.10Пален шого: Тудлан пӧртым, святой верым, чоҥаш манын, Господь тыйым ойырен налын. Пеҥгыде лий, пашалан пиж!»11Давид шке Соломон эргыжлан храмыш пурымо кыдежын да храм йыр чоҥышаш оралтын, тудын клатлажын, кӱшыл ден кӧргӧ пӧлемже-влакын да шондык шинчыме верын планыштым пуэн.12Тыгак Давид эргыжлан вуйыштыжо улшо уло планым пуэн: тиде – Господьын пӧртшын кудывечыже да тудын йыр улшо пӧлем-влак, Юмын пӧртын поянлык аралыме верже-шамыч да Господьлан пӧлеклыме арверым аралыме вер-влак,13иерей ден левит-шамычын пӧлкашт, Господьын пӧртыштӧ служитлыме тӱрлӧ паша да тушто кучылтмо арвер.14Давид тыгак служитлыме годым кучылтмо кажне шӧртньӧ ден ший арверлан мыняр шӧртньӧ ден ший кӱлмым палемден:15светильник ден лампаде-влакын кузе кучылталтмыштым шотыш налын, шӧртньӧ светильник ден лампадылан мыняр шӧртньӧ кая, тыгак ший светильник ден лампадылан мыняр ший кая,16надыр киндым пыштыме кажне шӧртньӧ ӱстеллан мыняр шӧртньӧ да ший ӱстел-влаклан мыняр ший кӱлеш,17изи шаньык, кӱмыж да кувшинлан мыняр яндар шӧртньӧ кӱлеш, тыгак шӧртньӧ чашылан – мыняр шӧртньӧ, ший чашылан – мыняр ший18да тӱтырымӧ жертвенниклан мыняр яндар шӧртньӧ кӱлеш. Эше тудо шӧртньӧ херувим-влакан орвам – шаралтыме шулдырышт дене нуно Господьын ойпидыш шондыкшым петырен шогеныт – ыштышаш планым пуэн.19«Чыла тидым, кид дене возымым, мылам Господь пуэн да чоҥымо чыла пашам лончылен-лончылен умылтарен», – ойлен Давид.20Давид шке Соломон эргыжлан каласен: «Пеҥгыде да лӱддымӧ лий, тиде пашалан пиж, ит лӱд, ит ӧрткӧ. Вет Господь Юмо, мыйын Юмем – тый денет пырля. Господьын пӧртшым чоҥымо чыла пашам пытарымешкет, Тудо тый дечет ок кораҥ, тыйым коден ок кай.21Теве иерей ден левит-влакын пӧлкашт, нуно Юмын пӧртыштӧ служитлаш тӱҥалыт. Моло тӱрлӧ пашалан тыйын тыршен ыштыше да мастар еҥет-влак ситышын улыт, а вуйлатыше-шамыч да уло калык тыйын чыла кӱштыметым колышташ тӱҥалыт».
Institute for Bible Translation, Finland